Nóg ’n eis teen die polisie

Kristien KrugerDie afgelope jaar was daar ’n sigbare toename in die hoeveelheid sake teen die ministerie van binnelandse sake, immigrasie, veiligheid en sekuriteit vir die onwettige aanhouding en/of aanranding van lede van die publiek deur die Namibiese polisie.Die polisie het na bewering mnre. Reinhold Dhiginina Nangolo en Naftal Fiindje Nafital op 9 Januarie 2021 omstreeks 00:30 by die Omuthiya- informele nedersetting in hegtenis geneem.Hulle beweer hulle is ongrondwetlik by die Omuthiya-polisiekantoor aangehou en is glo eers op 11 Januarie op borgtog vrygelaat.Die twee mans het gister in die hoërhof in Windhoek verskyn en die hof ingelig dat hulle hul eis met N$140 000 elk sal verminder. Elkeen sou aanvanklik N$260 000 geëis het – N$180 000 vir skadevergoeding en N$80 000 vir regskostes - maar eis nou slegs N$120 000.Die ministerie het die aanvanklike eis teengestaan en moet nog die hof in kennis stel of die nuwe eise teengestaan sal word.Volgens hofstukke beweer die twee mans daar was nie ’n lasbrief vir hul inhegtenisneming nie, asook geen geldige bewyse dat hulle die wet oortree het nie.“Al was daar ’n vermoede dat hulle die oortreding gepleeg het, is dit nie genoegsame rede om hulle in hegtenis te neem nie,” lui die hofstukke.Die twee mans beweer die Namibiese hoof van misdaadondersoeke, komm. Morris Naruseb, het op 9 Januarie – dieselfde dag wat hulle in hegtenis geneem is – die polisie opdrag gegee om hul vry te laat, maar die opdrag is blatant geïgnoreer.“Dit het hul reg tot waardigheid en vryheid geskend en die klaers het as gevolg daarvan skade gely en eis daarom skadevergoeding.”NOG ’N N$2,5 MILJOEN EISIn ’n ander saak eis ’n gevangene van die Elizabeth Nepemba-gevangenis op Rundu, Tonata Oliver Martin, sowat N$2,5 miljoen van dieselfde ministerie vir goedere wat gesteel of weggeraak het.Martin skryf glo boeke terwyl hy in aanhouding is en het vir tronkpersoneel gevra om sy handgeskrewe werk te stoor en te bewaar, maar die boeke is volgens hom skoonveld.Hy eis skadevergoeding vir onder meer die geld wat hy sou verdien het, sy idees en denke, die tyd, moeite en navorsing wat daarin gegaan het en dat dit sy toekomstige loopbaan as ’n skrywer vernietig het. - kristien@republikein.com.na

Nóg ’n eis teen die polisie

Kommentaar

Republikein 2025-06-18

Meld asseblief aan om kommentaar te lewer

Nóg ’n eis teen die polisie

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie