Nóg hoës kry hervestigingsplase

Augetto Graig Benewens adv. Vicki ya Toivo het die ministerie van grondhervorming ook hervestigingsplase aan hoofman Sam Kambazembi, me. Angelina Sinvula, wat by die ministerie van finansies werk, en die hoof van grondhervestiging in die Omahekestreek, me. Mclesia Mbaisa, toegeken. Mee. Paulina Soreses, Alwina Mujetenga en mnr. Kapuuo Ngumeritiza het ook vandeesweek plase in die Omahekestreek ontvang en dit wissel in grootte tussen 2 061 hektaar en 2 409 hektaar. Dit is gedeeltes van die plase Joyce (198), Riverside (200), Tweeling (276) en Heatherbelle (197).Die hervestigingskommissie onder leiding van die permanente sekretaris van grondhervorming, mnr. Peter Amutenya, het sedert Maandag vergader oor die toekenning van hervestigingsplase wat reeds geadverteer is. Die geslote vergadering het Amutenya so besig gehou dat hy nie op skriftelike vrae oor die kwessie kon reageer nie. Vrae aan minister Utoni Nujoma se kantoor is eers na die ministeriële woordvoerder, mnr. Chrispin Matongela, en toe na Amutenya verwys. Nie een van hulle het teen druktyd op dié navrae geantwoord nie.Mbaisa was ook nie op kantoor nie aangesien sy 'n amptelike slypskool in Windhoek moes bywoon. Sy het nie op e-posse gereageer nie en haar kantoor het geweier om 'n selfoonnommer te verskaf. 'n Werknemer in haar kantoor het wel bevestig dat geen wet Mbaisa verhoed om aansoek te doen of vir 'n hervestigingsplaas goedgekeur te word nie.Die nuwe, hersiene, nasionale hervestigingsbeleid vir 2018 tot 2027 meld spesifiek dat grond onregverdig uitgedeel word aan vooruitstrewende en welgestelde lede van die samelewing, wat 'n afwyking van die oorspronklike 2001-beleid is. Dit maak egter geen verskil aan die voorwaardes vir die toekenning van hervestigingsplase nie, wat alle Namibiërs bo die ouderdom van 18 insluit en nie toegang tot grond het nie, en veral gemik is op diegene wat voorheen benadeel was. REAKSIEDie Congress of Democrats (CoD) se waarnemende president, mnr. Elago Vaino Amuthenu, het Dinsdag in 'n verklaring só op die nuutste toekennings gereageer: “Dit sê vir ons, die armes, baie hardop en duidelik dat die enigste kriteria vir hervestiging voortrekkery en politieke verbintenisse is. Dit is ook die rede hoekom die volledige lys begunstigdes nooit in die openbaar bekend gestel is nie.”Hoofman Kambazembi sê daar is beslis niks van die aard betrokke by sy toekenning van 'n deel van Plaas Joyce nie. “Ek het ook die advertensie gesien. Niemand van die ministerie het my gebel of ingelig nie. Ek doen al sedert 1995 aansoek. Ek probeer elke keer omdat ek nie grond op my naam het nie. Dié sal die eerste wees,” sê hy. “Ek is nie verbind met die hoës nie en ek ken niemand by daardie ministerie wat my kan bevoordeel nie.”Intussen het adv. Ya Toivo ook uitgewei oor haar toekenning. “My aansoek was die voortsetting van my oorlede man, Andimba Toivo ya Toivo, se poging om besit van 'n geskikte hervestigingsplaas vir ons gesin te verseker,” sê sy. Volgens haar is haar man in 2011 grond toegeken op Plaas Otjimue, sowat 60 km buite Omaruru, maar die plaas was nie geskik nie, en sonder plaashuis, werkende boorgat en volledige heinings. Wyle Ya Toivo het die minister van grondhervorming genader om sy plaas vir 'n beter een te verruil. Ná sy dood het adv. Ya Toivo die plaas op haar eie naam oorgedra. “Toe dit onder my aandag kom dat ander huurpagplase deur die ministerie geadverteer word, het ek einde verlede jaar om twee verskillende plase aansoek gedoen. In my aansoek het ek die agtergrond aangeheg en ook aangedui dat ek die plaas wil verruil of afstaan vir een van die twee waarvoor ek aansoek gedoen het. Die grond waarvoor ek aansoek gedoen het, is beter toegerus, het beter water en is nader aan Windhoek,” sê sy.“My gesin en ek is dankbaar om die deel van Plaas Joyce te kon ontvang sodat ons kan voortgaan om die familieprojek wat my Andimba begin het, onder gunstiger omstandighede uit te brei. “Ek voel baie hartseer omdat my man nie meer hier is om deel te wees van die boerdery en op die plaas te ontspan wanneer hy wil nie. Dit was sy droom.”

Nóg hoës kry hervestigingsplase

Kommentaar

Republikein 2026-05-05

Meld asseblief aan om kommentaar te lewer

Nóg hoës kry hervestigingsplase

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.