Nóg geskiedenis wink vir Mboma, Masilingi

Tielman van LillChristine Mboma en Beatrice Masilingi (beide 18) kan vandeesweek opnuut by die o.20-wêreldatletiekkampioenskap in Kenia se hoofstad Nairobi hul landgenote en die internasionale gemeenskap se verbeelding met sensasionale vertonings aangryp.Mboma (200 meter), Masilingi (100 en 200) asook Elvis Gaseb (100) sal van môre af tot Sondag met individuele items hul merk maak.Masilingi, Ndawana Haitembu, Carien Oosthuizen en Nandi Vass sal Vrydag aan die uitdunne van die 4x100-aflos deelneem. Indien hulle deurdring, sal die Namibiërs die volgende dag vir die finaal aantree.Volgens Wêreldatletiek sal nagenoeg 1 000 atlete (119 spanne) in 44 items op Nairobi vir dié globale skouspel toesak. Die skouspel se afskop is met een dag tot môre uitgestel, vanweë die Covid-19-komplikasies vir internasionale reisigers, asook om atletiektoerusting na Nairobi te vervoer.Met Nairobi op 'n verhewe 1 795 meter bo seespieël, sal naellopers soos Mboma en Masilingi die aansienlike dunner lug (as byvoorbeeld Tokio, op seevlak) vir goeie tye en rekorddoeleindes kan uitbuit.KORT NAELLOOPMasilingi het laasjaar Desember in Pretoria (1 339 m) met 11.38 sekondes in die 100 die kwalifiserende standaard vir Nairobi (11.85) oortref. Ongelukkig is sy Aprilmaand by die senior nasionale kampioenskap in Windhoek in die 100 gediskwalifiseer toe sy te vroeg weggespring het.Dieselfde het haar die volgende maand oorgekom toe sy in Pretoria by 'n Atletiek Gauteng-Noord-byeenkoms vir 'n ongeldige wegspring gepenaliseer is.Dié glipse het Masilingi verhinder om haar beste 100-tyd dalk verby die kwalifiserende merk vir die Olimpiese Spele in Tokio (11.15) te stoot. Indien sy in Tokio in die 100 se wegspringblokke kon aantree, sou sy selfs nog meer selfvertroue en ondervinding voor haar deelname in Kenia teen die res van die wêreld se tienerjarige blitse kon hê.Agt maande later sal Masilingi dalk ietwat onseker wees wat op haar in die 100 wag, maar in die 200 sal sy en Mboma moeilik gekeer word en hul toenemend vinniger rekordtye van die afgelope maande kan opnuut onder skoot kom.Wat Mboma (silwermedalje) en Masilingi (sesde) in Tokio in die 200-finaal vermag het, is reeds Olimpiese geskiedenis. Mboma, wat in die agtste plek op Wêreldatletiek (WA) se ranglys van aktiewe 200-vrouenaellopers vereer word, se o.20-wêreldrekord van 21.81 wat sy vroeg vandeesmaand in Tokio in die finaal behaal het, loop gevaar om dalk uit die rekordboeke gevee te word.Nigerië se Favour Ofili kan naas Masilingi in die 200 Mboma se strafste teenstand wees. Ofili, met 'n persoonlike beste van 22.30, sal deur haar landgenoot, Anita Taviore, met 23.18 ondersteun word. Die VSA se Tamari Davis (22.64), Rhashidat Adeleke (Ierland, 22.90) en Brianna Lyston (Jamaika, 23.38) kan ook in die 200 in aksie wees. Masilingi (negende op WA se ranglys) het ook 'n goeie kans om haar beste (22.28) te laat spat wat sy in die 200-finaal in Japan beklink het. Dit is egter die 100 waar Masilingi reusetreë kan gee. Sy kon in Tokio lag-lag verby die 100-uitdunne gevorder het – indien die helfte van haar 200 meter-tye in al drie rondtes rofweg as 'n barometer gebruik word.In die 200-uitdun het sy 22.63 (11.32 vir 100), semifinaal 22.40 (11.20) en finaal 22.28 (11.14) aangeteken. Met die geluksgodin aan haar kant kon Masilingi dus dalk selfs die 100-finaal gehaal het.Die vinnigste kwalifiserende tyd vir die Olimpiese 100-semifinaal was Marie Josée Ta Lou van die Ivoorkus met 10.78, terwyl Anna Bongiorni van Italië in 11.35 die stadigste was. In die semifinaal behaal Bongiorni slegs 11.38, Tatjana Pinto 11.35 en Tynia Gaither 11.31.Die kampioen Elaine Thompson-Herah (Jamaika) in 10.76, landgenot Shelly-Anne Fraser-Pryce in 10.73 en Ta Lou met 10.79 wen hul semifinale met Shericka Jackson (Jamaika) in 10.79, Mujinga Kambundji (Swede) in 10.96, Ajla del Ponte (Switserland, 11.01) in tweede posisies deur na die finaal. Teahna Daniels (VSA) 10.98 en Daryll Neita (Brittanje) 11.00 was die volgende vinnigste verloorders deur na die eindwedloop. In die finaal kon Neita in 11.12 slegs agtste en laaste klaarmaak.WÊRELD SE VINNIGSTE TIENERSMasilingi se topmededingers vir die 100 in Nairobi sluit twee Jamaikaanse spoedvrate in wat sover vanjaar die vinnigste ter wêreld was.Tina Clayton (17 jaar, 11.17) en Kerrica Hill (16, 11.43) is beide van Jamaika. Die 17-jarige Joella Lloyd van Antigua (11.19) is selfs nog vinniger as Hill.Uit die VSA kan Jasmine Montgomery (11.27), Shawnti Jackson en Jadyn Mays (beide met 11.28) ook hul vlerke sprei. Ander naellopers wat onlangs vinniger as Masilingi se 11.38 van agt maande gelede was, is Rhasidat Adeleke van Ierland (11.31), Camille Rutherford van Bahamas (11.32), Minke Bisschops van Nederland (11.35) en die Amerikaners Kennedi Sanders (11.36) en Victoria Perrow van die VSA (11.37).Ivana Ilic van Serwië en Kenondra Davis van die VSA spog beide met 11.38, onderskeidelik in Junie en Julie vanjaar.In Tokio het Joella Lloyd 11.54 in haar uitdun behaal en kon nie vir die semifinaal kwalifiseer nie. Williams het nie vir die 100 aangetree nie, maar was 'n lid van Jamaika se 4x100-aflosspan wat goud in Tokio opgeraap het. Williams sal in Nairobi vir die 100-hekkies haar spykerskoene aantrek.• Gaseb (18) se tot dusver ietwat besadigde persoonlike beste van 10.52 in die 100 lyk dalk nie op peil met sy mededingers nie, maar hy is gemotiveerd om sy grense uit te daag en nogtans sy merk te maak, of minstens topklas ondervinding op te doen.Jaylen Slade en Marcellus Moore van die VSA is beide naellers wat gereeld onder 10.12 draai, terwyl Afrika se haastigste tiener vanjaar, Godson Oke Oghenebrume van Kenia, met 10.13 spog.– tielman@republikein.com.na

Nóg geskiedenis wink vir Mboma, Masilingi

Kommentaar

Republikein 2025-12-16

Meld asseblief aan om kommentaar te lewer

Nóg geskiedenis wink vir Mboma, Masilingi

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.