Net een Air Namibia-roete winsgewend

Ogone Tlhage - Slegs een van Air Namibia se 11 roetes is winsgewend. Mnr. Leon Jooste, minister van staatsondernemings, gee lae passasiersyfers en die hoë bedryfskoste van vliegtuie die skuld.Volgens Jooste word die vliegtuie se bedryfskostes deur huur-, instandhoudings-, brandstof- en ander vaste kostes beïnvloed.Die nasionale lugredery reis na 11 bestemmings in Europa, Suider-Afrika en plaaslik. Die daaglikse roetes is van Windhoek na Frankfurt, Kaapstad, Johannesburg, Gaborone en Durban. Ses keer per week is daar vlugte van Windhoek na die Victoria-watervalle en vier keer per week na Lusaka en Harare.Die plaaslike vlugte is daagliks van Windhoek na Ondangwa en Walvisbaai en vier keer per week van Windhoek na Rundu, Katima Mulilo en Lüderitz.Selfs al kan die redery sekere vliegtuie winsgewend bedryf, waar hoë vragte voortdurend gehandhaaf word, gaan hy steeds verliese ly op roetes waarvan die potensiaal nie ten volle benut word nie.“Hoe die vliegtuie benut word, is 'n ander verwante aspek. Die hoeveelheid tyd wat hulle in die lug deurbring om 'n inkomste te genereer, teenoor die tyd wat hulle op die grond is en geld verloor, is kritiek,” sê Jooste. Die minister is tans aan die stuur van die pogings om die maatskappy te hervorm en meer doeltreffend te bedryf.Jooste sê indien Air Namibia wil gelykbreek of winsgewend wees, sal hulle 'n heel ander besigheidsplan moet volg, en veranderinge aan die huidige vlootsamestelling moet aanbring.VERSOEK AAN REGERING Die lugredery versoek glo al lank reeds van die regering om die Windhoek-Frankfurt-roete af te skaf, wat die grootste verlies ly. Van dié versoeke kom egter dadels.Jooste het nie kommentaar op dié roete gelewer nie, maar wel gesê “roetes wat versigtig uitgesoek is”, sal die lugredery help om weer 'n wins te genereer. “Roetes wat in dié stadium verliese ly, kan nie gehandhaaf word indien hulle nie beslis potensiaal het om binne 'n aanvaarbare tydperk winsgewend te word nie. Andersins gaan beduidende herstrukturering plaasvind en kostes gaan gesny word om die onvolhoubare vlakke van ondoeltreffendheid uit te wis,” sê hy.“Selfs met die bogenoemde maatreëls in plek is die kanse op kommersiële winsgewendheid steeds skraal. Air Namibia sal wêreldklas uitvoerende leiding nodig hê vir die beste moontlike kans om aanvaarbare kommersiële sukses te bereik.”Die lugredery is al sedert 2014, toe sy paaie van me. Theo Namases geskei het, sonder 'n permanente hoof.Die minister sê geen onlangse fondsversoeke vir die lugredery is goedgekeur nie. “Ek wil duidelik maak die regering het geen bykomende fondse vir Air Namibia goedgekeur nie. Ons het slegs 'n regeringswaarborg van N$578 miljoen goedgekeur, wat die maatskappy gebruik het om finansiering te verkry van 'n kommersiële finansiële instansie,” sê hy.Air Namibia het oor die jare verskeie reddingsboeie van die regering ontvang, al het hy sedert sy bestaan geen wins gemaak nie.Toe Jooste gevra is of die huidige status quo onbepaald sal voortgaan, het hy erken die tyd vir verandering of ondergang is naby.Volgens hom vererger Air Namibia se vlootstruktuur die lugredery se probleem verder. Hulle maak tans gebruik van twee Airbus A330-vliegtuie op die Windhoek-Frankfurt-roete, Airbus 319-vliegtuie op die streekroetes en Embraer ERJ 135-vliegtuie op die plaaslike roetes.Die moontlikheid om die lugredery se huurkontrakte vir die Airbus-vliegtuie te kanselleer, is laas jaar ondersoek.Hulle betaal glo N$15 miljoen maandeliks om die Airbus A330-vliegtuie te huur, en kan nie uit die huurooreenkoms tree tot dit in 2025 verval nie.- ogone@namibiansun.com

Net een Air Namibia-roete winsgewend

Kommentaar

Republikein 2025-10-22

Meld asseblief aan om kommentaar te lewer

Net een Air Namibia-roete winsgewend

Kommentaar

Republikein 2025-10-22

Meld asseblief aan om kommentaar te lewer

MELD AAN

Advertensie