Nege sterf in ongelukke

Nege mense het die afgelope naweek op Namibië se paaie gesterf.Vrydag omstreeks 22:20 het twee mans op die B1-hoofweg tussen Okahandja en Ojiwarongo gesterf nadat drie voertuie in 'n ongeluk was. Volgens die Namibiese polisie se misdaadverslag het die ongeluk 12 km suid van Otjiwarongo plaasgevind toe 'n sedanvoertuig glo twee ander voertuie verbygesteek en trompop teen 'n sportnutsvoertuig gebots het, wat weer met 'n ander klein sedanvoertuig gebots het. Die bestuurders van die sedan- en sportnutsvoertuig, mnre. Haiyambo Haingura (21) en Dominikus Ndango Ndango (36), is op slag dood. Drie ander mense is beseer en na die Katutura-staatshospitaal vervoer. Nóg 'n trompop-botsing tussen twee sedanvoertuie Saterdag omstreeks 18:30 het die lewe van 'n 53-jarige polisieman, mnr. Angustina Immanuel van Oshakati, geëis. Die ongeluk het by Okaku kaNangula op Omungwelume-pad plaasgevind. Ander passasiers het ernstige tot ligte beserings opgedoen. Saterdag omstreeks 15:00 by die Iitapa-nedersetting op die grondpad tussen Okahao en Uutsathima het die bestuurder van 'n dubbelkajuitbakkie wat 'n bakkie gesleep het, glo beheer verloor en albei voertuie het omgeslaan. Die bestuurder van die bakkie, mnr. Amon Shaambeni Ndatyapo (29) van die Okadiva-nedersetting, is op slag dood. 'n Passasier van die dubbelkajuitbakkie is ernstig beseer en in die Oshakati-staatshospitaal opgeneem. 'n Passsier in 'n sedanvoertuig, mnr. Amutakula Kristof (32), is Saterdag omstreeks 15:00 op die pad tussen Omuthiya en Ondangwa naby die Iihwali-lokasie sowat 3 km van Ondangwa in 'n ongeluk oorlede."Dit word beweer dat die 30-jarige bestuurder van die sedanvoertuig probeer het om 'n trompop-botsing met 'n aankomende voertuig te vermy, toe hy beheer oor sy voertuig verloor het," sê die polisie. Drie ander passasiers (34, 28 en 27 jaar oud) is ernstig beseer en in die Onandjokwe-hospitaal opgeneem. Mnr. Haitale Petrus Haufiku (70) van die Ohambungu-nedersetting is Vrydag omstreeks 20:00 op slag dood toe hy beheer oor sy bakkie verloor het. Die ongeluk het by die Ohamupulungushu-nedersetting op die grondpad tussen Uushake en Epembe in die Ohangwenastreek plaasgevind. 'n Passasier (46) is ernstig beseer en na die Okankolo-gesondheidsentrum geneem. Vrydag omstreeks 23:20 is 'n bestuurder van 'n bakkie op die Brakwaterpad naby die hoofstad in 'n ongeluk dood nadat hy beheer oor sy voertuig verloor het. Die slagoffer is die 30-jarige mnr. Benny Amuthenu. Sy 33-jarige passasier is in die Katutura-staatshospitaal opgeneem. TWEE ONGELUKKE BY KALKFELDBy Kalkfeld het twee ongelukke Saterdag plaasgevind. Die eerste ongeluk het om 10:00 sowat 40 km vanaf Otjiwarongo gebeur toe die bestuurder beheer oor sy voertuig verloor het en dit omgeslaan het. Die bestuurder, mnr. Christiaan Seibeb (55), 'n werknemer van Afrox op Otjiwarongo, is op slag dood. Die tweede ongeluk het omstreeks 17:30 op die pad tussen Kalkfeld en Otjiwarongo gebeur toe die 32-jarige bestuurder beheer oor 'n sedanvoertuig verloor en dit omgeslaan het. ‘n Passasier, mnr. Absalom Simeone (33), is by die Kalkfeld-kliniek oorlede. Die bestuurder is ernstig beseer en in die Otjiwarongo-staatshospitaal opgeneem, terwyl die ander passasiers ernstig tot lig beseer is. Volgens die polisie het die bestuurder glo sonder 'n lisensie met 'n onpadwaardige voertuig bestuur.Die bestuurder van 'n sedanvoertuig is van dronkbestuur, roekelose en nalatige bestuur, bestuur sonder 'n lisensie en die bestuur van 'n onpadwaardige voertuig op Mariental aangekla. Dit spruit uit 'n ongeluk Saterdag tussen 17:00 en 18:00 sowat 32 km suid van Mariental toe die bestuurder beheer oor die voertuig verloor en dit omgeslaan het.Volgens die polisie was daar altesaam vyf insittendes in die voertuig en niemand is ernstig beseer nie. Die bestuurder is in hegtenis geneem. Voorts is nog 'n bestuurder Saterdag sonder 'n geldige rybewys by die Siurungu-nedersetting naby Nkurenkuru in hegtenis geneem nadat hy met sy bakkie in 'n boom vasgery het. Die bestuurder en sy passasier is lig beseer. MAN RY OOR BABANog klagte van roekelose en nalatige bestuur is aanhangig gemaak nadat 'n 48-jarige man Vrydag glo per ongeluk met sy bakkie in trurat oor 'n babaseun van sewe maande gery het. Die voorval het omstreeks 15:15 by die Iihongo-nedersetting naby Okatope in die Oshikotostreek plaasgevind. Volgens die polisie het die baba, Tulela Elias Kakolo, van die kombuis gekruip waar sy huishulpma gekook het, en onder die voertuig gaan sit. Die baba, van Angolese afkoms, is in die Onandjokwe-hospitaal opgeneem.

Nege sterf in ongelukke

Kommentaar

Republikein 2025-09-19

Meld asseblief aan om kommentaar te lewer

Nege sterf in ongelukke

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie