NEEEF is 'doring in private sektor se vlees'

Estelle de BruynDie Nuwe Raamwerk vir Gelyke Ekonomiese Bemagtiging (NEEEF) is ‘n doring in die vlees van die private sektor omdat dit buitelandse beleggers afskrik en onsekerheid teweeg bring.Só sê die president van die Namibiese Werkgewersvereniging (NEA), Cor Beuke, in sy presidentsverslag wat tydens die algemene jaarvergadering van die vereniging gelewer is.“Dit is openbare kennis dat die NEA die opheffing van alle Namibiërs en die uitwissing van armoede steun. Ons is egter van mening dat NEEEF in sy huidige formaat dit nie sal bewerkstellig nie.“Dit is noodsaaklik dat die voordele van enige projek van hierdie aard na die voetsoolvlak moet deurvloei. Dit verg beleggings in opleiding en onderwys, iets waaraan die private sektor binne ‘n bemagtigingskema kan deelneem,” sê Beuke.Hy sê die regering kyk die feit mis dat werkgewers en die eienaars van sakeondernemings enige projek vir die opheffing van diegene op of onder die armoedsgrens sal ondersteun, aangesien dit tot ‘n groter besteebare inkomste in die ekonomie sal lei wat weer sakeondernemings sal help om meer goedere en dienste te verkoop en groter wins te maak. “Die private sektor het die aansporing om die armes op te hef. Dit moet egter gedoen word deur meer welvaart te skep en nie van die een deel van die ekonomie weg te neem en aan ‘n ander te gee nie. Dit bemagtig nie ‘n nasie nie. Die eienaarskap-pilaar van NEEEF is die achilleshiel en fataal vir enige vooruitsig van sukses,” sê Beuke.Hy sê dit ontmoedig nie net regstreekse buitelandse beleggings en die private sektor se vermoë om te groei en werksgeleenthede te skep nie, maar lei ook daartoe dat die rykes ryker en die armes armer word.Beuke gee die versekering dat die NEA bereid is om met die regering saam te werk om ‘n suksesvolle model te ontwikkel. Om die rede het die NEA ‘n oudiënsie met pres. Hage Geingob versoek.Hy sê die afgelope jaar was moeilik vir die ekonomie en dat lede van die NEA die druk gevoel het. Hy noem die voorbeeld van die konstruksiesektor wat ‘n swaar slag toegedien is met die opskorting van regeringsprojekte. Dit het nie net ‘n rimpeluitwerking gehad op diensverskaffers wat die konstruksiebedryf bedien nie, maar ook die meeste ander sakeondernemings benadeel.Die betalingsprobleme wat die staat se mediese fonds ondervind, het volgens Beuke ‘n reuse-impak op die bedryf wat druk op die private sektor verhoog het.Tydens ‘n vergadering van die NEA in Februarie met die minister van finansies, Calle Schlettwein, het Schlettwein die regering se posisie verduidelik en die versekering gegee dat die laagste ekonomiese punt nou bereik is. Hy het ook gesê vanweë die fiskale beperkings wat die regering ingestel het, behoort die ekonomie te stabiliseer en begin herstel.“Die NEA is van mening die herstel sal tussen 18 en 20 maande neem. Indien sakeondernemings vir hierdie tydperk kan uithou, behoort dit deur die krisis te kom,” het Beuke gesê.Hy het Schlettwein ook bedank vir die fiskale leierskap wat hy aan die dag gelê het.Voorts wys hy op verbeterde betrekkinge met die ministerie van arbeid, nywerheidsbetrekkinge en werkskepping wat die afgelope jaar bewerkstellig is. In Februarie vanjaar is Beuke vir ‘n termyn van drie jaar op die Raadgewende Raad op Arbeid aangestel. Hy het ook met die Internasionale Arbeidsorganisasie (ILO) in verbinding getree ten einde bystand en ondersteuning vir plaaslike aktiwiteite te kry.Beuke het ook die aanstelling van me. Eva-Liza Nailenge as adjunk-sekretaris-generaal van die NEA verwelkom. Sy sal binne die volgende drie maande die leisels as sekretaris-generaal by mnr. Simon Raines oorneem.

NEEEF is 'doring in private sektor se vlees'

Kommentaar

Republikein 2026-02-03

Meld asseblief aan om kommentaar te lewer

NEEEF is 'doring in private sektor se vlees'

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.