‘Nee’ vir notering druk bitcoin-prys af
Die waarde van die bitcoin het Vrydag met tot 18% teenoor die dollar geval nadat Amerikaanse owerhede ’n stokkie gesteek het voor ’n beursverhandelde fonds (ETF) in dié virtuele geldeenheid.
Die Securities and Exchange Commission (SEC), die beheerliggaam oor genoteerde maatskappye in die VSA, het ’n voorstel vir ’n ETF bekend as Coin verwerp wat ingedien is deur die welbekende Winklevoss-tweeling.
Dié twee internet-entrepreneurs wou hul Winklevoss Bitcoin Trust op die Bats-beurs noteer.
Die waarde van die bitcoin het ná die besluit Vrydag tot $978,76, die laagste in meer as ’n maand, gedaal. Dit het daarna weer ietwat herstel.
Die afgelope maand het die bitcoin tot selfs $1 300 gestyg omdat beleggers gehoop het die notering van ’n bitcoin-ETF sal wyer belangstelling daarin lok en dus die waarde verder opstoot. Dit is tans méér werd as ’n fynons goud, wat op die oomblik in die omgewing van $1 200 verhandel.
Tyler en Cameron Winklevoss is bekend om hul twis met Mark Zuckerberg oor die oorsprong van Facebook. Die twee Harvard-studente (waar Zuckerberg ook gestudeer het) het Zuckerberg in 2003 gevra om te werk aan die sosiale netwerk ConnectU (aanvanklik HarvardConnection), maar hy het toe ’n mededingende webwerf vir Harvard-studente, www.thefacebook.com, ontwikkel. Hulle en ander medewerkers het eindelik ’n uitbetaling van $65 miljoen van Facebook ontvang.
Ná die SEC-besluit sê die Winkelvoss-tweeling hulle gaan steeds met die SEC saamwerk om hul bitcoin-droom te verwesentlik. Hulle onderhandel al vier jaar lank daaroor. Tyler het in ’n verklaring gesê hulle bly “optimisties en verbind daartoe” om die ETF te noteer.
Die SEC sê die verhandeling in bitcoin sal teen Amerikaanse wetgewing, spesifiek die Exchange Act, wees omdat “beduidende markte vir bitcoin ongereguleer is”.
Bitcoin word deur sommige mense ingespan as ’n veilige hawe, amper soos goud. Dit is veral waar in lande met wisselvallige geldeenhede, soos Brasilië en Rusland, het prof. Nafis Alam van die Sunway-Universiteit en prof. Graham Kendall van die Universiteit van Nottingham die afgelope week op die webwerf The Conversation geskryf.
Bitcoin het in 2016 beter gevaar as die meeste geldeenhede, aandelebeurse en hulpbron-termynkontrakte.
Spekulante speel ook ’n groot rol om die waarde daarvan op te druk. Dit skep ’n risiko dat die geldeenheid in duie kan stort.
Daar is egter ook ’n relatief beperkte aantal bitcoins (nagenoeg 16,2 miljoen) in omloop, en ’n onderneming dat ’n maksimum van 21 miljoen op enige gegewe tyd sal bestaan. Dit kan die prys ondersteun.
Vertroue in die bitcoin is die afgelope paar jaar ietwat geskend deur kuberaanvalle waarin groot hoeveelhede van die kriptogeldeenheid “gesteel” is, en deur voorvalle van bedrog.
Daar is wel ’n beweging deur banke en sentrale regerings om kriptogeldeenhede en die verhandeling daarin te reguleer, met die Britse regering wat onlangs ’n witskrif daaroor uitgereik het.
Banke sien ook al hoe meer die waarde in die blokketting-tegnologie wat bitcoin rugsteun.
Aansoeke vir nog twee bitcoin-ETF’s, Bitcoin Investment Trust en SolidX Bitcoin Trust, moet nog oorweeg word. Die Winklevoss-beslissing maak dit egter onwaarskynlik dat dié ETF’s die jawoord sal kry.
Die SEC se verklaring laat wel die deur oop dat sy besluit kan verander indien die bitcoin-mark voldoende ontwikkel.
Bronne: Bloomberg, CNBC, The Conversation, Wikipedia
Die Securities and Exchange Commission (SEC), die beheerliggaam oor genoteerde maatskappye in die VSA, het ’n voorstel vir ’n ETF bekend as Coin verwerp wat ingedien is deur die welbekende Winklevoss-tweeling.
Dié twee internet-entrepreneurs wou hul Winklevoss Bitcoin Trust op die Bats-beurs noteer.
Die waarde van die bitcoin het ná die besluit Vrydag tot $978,76, die laagste in meer as ’n maand, gedaal. Dit het daarna weer ietwat herstel.
Die afgelope maand het die bitcoin tot selfs $1 300 gestyg omdat beleggers gehoop het die notering van ’n bitcoin-ETF sal wyer belangstelling daarin lok en dus die waarde verder opstoot. Dit is tans méér werd as ’n fynons goud, wat op die oomblik in die omgewing van $1 200 verhandel.
Tyler en Cameron Winklevoss is bekend om hul twis met Mark Zuckerberg oor die oorsprong van Facebook. Die twee Harvard-studente (waar Zuckerberg ook gestudeer het) het Zuckerberg in 2003 gevra om te werk aan die sosiale netwerk ConnectU (aanvanklik HarvardConnection), maar hy het toe ’n mededingende webwerf vir Harvard-studente, www.thefacebook.com, ontwikkel. Hulle en ander medewerkers het eindelik ’n uitbetaling van $65 miljoen van Facebook ontvang.
Ná die SEC-besluit sê die Winkelvoss-tweeling hulle gaan steeds met die SEC saamwerk om hul bitcoin-droom te verwesentlik. Hulle onderhandel al vier jaar lank daaroor. Tyler het in ’n verklaring gesê hulle bly “optimisties en verbind daartoe” om die ETF te noteer.
Die SEC sê die verhandeling in bitcoin sal teen Amerikaanse wetgewing, spesifiek die Exchange Act, wees omdat “beduidende markte vir bitcoin ongereguleer is”.
Bitcoin word deur sommige mense ingespan as ’n veilige hawe, amper soos goud. Dit is veral waar in lande met wisselvallige geldeenhede, soos Brasilië en Rusland, het prof. Nafis Alam van die Sunway-Universiteit en prof. Graham Kendall van die Universiteit van Nottingham die afgelope week op die webwerf The Conversation geskryf.
Bitcoin het in 2016 beter gevaar as die meeste geldeenhede, aandelebeurse en hulpbron-termynkontrakte.
Spekulante speel ook ’n groot rol om die waarde daarvan op te druk. Dit skep ’n risiko dat die geldeenheid in duie kan stort.
Daar is egter ook ’n relatief beperkte aantal bitcoins (nagenoeg 16,2 miljoen) in omloop, en ’n onderneming dat ’n maksimum van 21 miljoen op enige gegewe tyd sal bestaan. Dit kan die prys ondersteun.
Vertroue in die bitcoin is die afgelope paar jaar ietwat geskend deur kuberaanvalle waarin groot hoeveelhede van die kriptogeldeenheid “gesteel” is, en deur voorvalle van bedrog.
Daar is wel ’n beweging deur banke en sentrale regerings om kriptogeldeenhede en die verhandeling daarin te reguleer, met die Britse regering wat onlangs ’n witskrif daaroor uitgereik het.
Banke sien ook al hoe meer die waarde in die blokketting-tegnologie wat bitcoin rugsteun.
Aansoeke vir nog twee bitcoin-ETF’s, Bitcoin Investment Trust en SolidX Bitcoin Trust, moet nog oorweeg word. Die Winklevoss-beslissing maak dit egter onwaarskynlik dat dié ETF’s die jawoord sal kry.
Die SEC se verklaring laat wel die deur oop dat sy besluit kan verander indien die bitcoin-mark voldoende ontwikkel.
Bronne: Bloomberg, CNBC, The Conversation, Wikipedia
Kommentaar
Republikein
Geen kommentaar is op hierdie artikel gelaat nie