Nee vir geblikte leeujag in SA

Francoise Steynberg Die Professionele Jagtersvereniging van Namibië (Napha) het sy skok en afgryse uitgespreek oor die Professionele Jagtersvereniging van Suid-Afrika (Phasa) wat die jag van sogenaamde geblikte leeus nou goedkeur.Die president van Napha, me. Danene van der Westhuyzen, het in 'n mediaverklaring gesê Napha is geskok en “diep teleurgestel in hierdie laagtepunt” wat Phasa bereik het.Phasa het die term “etiese jag” verlede Woensdag op sy 40ste jaarvergadering verander na “alle jag wat deur wetgewing toegelaat word”. Napha sê die oppervlakkige definisie van die begrip “eties” maak nou die deur oop vir misbruik en uitbuiting - bloot vir finansiële gewin - vir diegene wat geen waarde heg aan die toekoms van jag in Afrika of in die wêreld nie.“Daar is 'n reuseverskil tussen 'wettig' en 'eties'. Ons glo die meerderheid jagters in Suid-Afrika ondersteun nie hierdie verandering nie,” sê Van der Westhuyzen.Napha meen daar is 'n baie fyn lyn tussen die jag van leeus in aanhouding en geblikte leeujag, en beide word oral in die wêreld veroordeel en “kan nie as jag geag word nie”.Napha meen Phasa se nuwe definisie van etiek druis lynreg in teen die beginsels van die Kode van Etiese Sportjag in Afrika, wat in 1997 in Victoria Falls deur Phasa onderteken is. Napha meen die verandering aan Phasa se grondwet is deur minder as 'n derde van die vereniging se lede goedgekeur. “Deur hierdie besluit te neem, het Phasa besluit om die meerderheidsopinie van beide die jag- en die nie-jaggemeenskap in die wêreld te ignoreer en sodoende al die harde werk in gevaar geplaas wat deur verskeie instellings onderneem is ter ondersteuning van volhoubare jag as instrument van bewaring,” sê Napha.Van der Westhuyzen meen Phasa skaad hiermee die goeie beeld van die hele jagbedryf in Afrika. Dit druis ook lynreg met Phasa se vroeëre standpunt in.“Beide Napha en talle ander professionele jagverenigings in Afrika het Phasa in die verlede gewaarsku dat hulle, selfs as hulle hierdie optrede oorweeg, op gevaarlike terrein beweeg waar kortsigtige besluite die hele jagbedryf wêreldwyd benadeel. Napha ondersteun alle jagters in Afrika wat eties jag en 'n dier 'n regverdige kans gee om voor die jagter uit te vlug.”Die Operateurs van Professionele Jagtersverenigings in Afrika (Ophaa) het Phasa intussen as lid uitgeskop, berig Netwerk24.

Nee vir geblikte leeujag in SA

Kommentaar

Republikein 2026-02-04

Meld asseblief aan om kommentaar te lewer

Nee vir geblikte leeujag in SA

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.