NDF-plase: 'Ek soek my 5%-kommissie'

N$10 miljoen as roukoop toe transaksie vou

21 August 2019 | Plaaslik
Ronelle Rademeyer



'n Voormalige werkgewer van mnr. Kurt Steinhausen, die Duitse gasteplaas-eienaar wat in 2017 sy plase Oropoko en Otjisemba aan die Namibiese weermag (NDF) verkoop het, eis N$2,3 miljoen as kommissie op die transaksies.

Dit is 3,33% van die verkoopsom van N$69 miljoen vir die twee plase. Hy wou aanvanklik 5% (N$3,45 miljoen) gehad het, terwyl Steinhausen net 1% aangebied het vir sy middelman-rol in die transaksies.

Dié twee plase van sowat 16 000 ha is nagenoeg 130 km van Windhoek af langs die Okahandja-Karibib-pad geleë.

Nuus oor die transaksies het vroeg verlede jaar skokgolwe deur die Namibiese gemeenskap gestuur. Nóg pres. Hage Geingob nóg die minister van finansies, mnr. Calle Schlettwein, was bewus daarvan dat die weermag die plase gekoop het.

Die N$24 miljoen-kooptransaksie vir Otjisemba het intussen deur die mat geval en Steinhausen het aanspraak gemaak op die roukoopbedrag van N$10 miljoen waarvoor daar in die kontrak voorsiening gemaak is.

Dit blyk uit korrespondensie in Republikein se besit dat mnr. Jona Levi, wat by Steinhausen as sjef in diens was, op 8 Julie vanjaar via laasgenoemde se prokureur, mnr. Heiko Stritter van Engling, Stritter & Partners, 'n brief oor die verskuldige kommissie gestuur het.



OPDRAG

Hy eis daarin dat Steinhausen binne sewe dae terugvoering gee.

Levi is in 'n daaropvolgende e-pos deur Stritter in kennis gestel dat hy nie 'n opdrag oor só 'n betaling ontvang het nie. Hy deel Levi ook daarin mee dat Steinhausen intussen vir mnr. Sisa Namandje van Sisa Namandje & Co Inc aangestel het om hom te verteenwoordig.

Op 29 Julie vanjaar versoek Levi mnr. Jackson Janson van laasgenoemde prokureursfirma vir 'n afspraak om die aangeleentheid te bespreek.

Levi sê in die brief, wat hy in Duits aan Steinhausen in Nümbrecht in Duitsland gerig het, hy “weier” om die voorgestelde kommissie van 1% te aanvaar.

“Dit is bekend dat jy in die verlede gespog het jy sal aan wie ook al daarin slaag om vir jou kopers vir die twee eiendomme te kry, ­kommissie van 5% betaal.

“Jy weet beter as enigiemand anders hoe moeilik dit was om jou eiendomme te verkoop. Vorige pogings deur buitelanders het almal misluk, aangesien die prys as onrealisties hoog beskou is.”

Hy sê verder hy is dronkgeslaan oor die “ondankbaarheid en uiterse disrespek” vir hom as mens nadat hy die transaksies met die ministerie van verdediging moontlik gemaak het.

Levi gaan voort en sê aangesien Steinhausen “hardkoppig” weier om aan hom die 5% te betaal, hy 'n bedrag van N$2,3 miljoen (dit is 3,33% van die koopsom) eis.

Republikein is ook in besit van korrespondensie wat toon Steinhausen se persoonlike assistent, mnr. Sackey Shikwambi, het in Maart 2018 'n skikkingsaanbod van 1%, of N$690 000, aan Levi vir die verkoop van die twee plase gemaak. Hy wys egter in sy skrywe daarop dat die N$24 miljoen vir Otjisemba nog nie deur die NDF betaal is nie en die N$240 000 se kommissie vir hierdie plaas dus nie betaal kan word nie.

Levi het by navraag die verskuldigde kommissie ontken en gesê Steinhausen skuld hom geld, maar bygevoeg “dit is vir my agterstallige salaris”. Hy het ontken dat hy die NDF as koper gewerf het.

Stritter het by navraag gesê hy kan nie die Steinhausen-transaksies bespreek nie, aangesien sy firma hom nie meer verteenwoordig nie.

Intussen het Namandje vyf dae nadat 'n skriftelike navraag per SMS aan hom gerig is, nog nie daarop gereageer nie. Toe Republikein hom bel om kommentaar te kry, het hy gesê hy bestuur en kan nie gesels nie.



KOOPKONTRAK

Dit blyk uit 'n afskrif van die koopkontrak wat op 19 Mei 2017 tussen mnr. Willem Goeieman, uitvoerende direkteur van werke en vervoer, en Steinhausen gesluit is, dat N$10 miljoen as roukoop aan Stritter, Engling & Partners oorbetaal is.

Roukoop dien as deposito en word aan die verkoper oorbetaal indien die kooptransaksie deur die mat val.

In 'n oproep aan Steinhausen in Duitsland het 'n woordvoerder bevestig dat hy vrae wat oor die Otjisemba-transaksie en die verskuldigde kommissie aan hom gerig is, ontvang het, “maar nie kan kommentaar lewer nie aangesien die kwessie hangend is”. Die woordvoerder het haar as “mevrou Steinhausen” geïdentifiseer.

Goeieman het vroeër verduidelik hoewel die plaas deur die NDF gekoop is, hy die kontrak “as die rekenpligtige beampte van die regering onderteken het”.

Schlettwein het intussen by navraag oor die roukoopbetaling gesê hy “is ingelig oor 'n uitstaande betaling vir een van die plase, waarvoor nie begroot is nie”.

Hy sê die transaksies het strydig met instruksies deur die tesourie geskied.

“Ek wil benadruk die kooptransaksie wys nou vrugtelose uitgawes was die gevolg, en dit is vir my 'n saak van groot kommer. Dit dui op herhaaldelike en grootskaalse fiskale ongedissiplineerheid,” sê Schlettwein.

Dit blyk uit 'n ministeriële ouditverslag van die ministerie van verdediging vir 2017-'18, die boekjaar waarin die plase gekoop is, dat N$491,7 miljoen in dié en die twee voorafgaande boekjare sonder tesourie-toestemming bestee is, berig Nampa. Dit is 'n oortreding van die Wet op Staatsfinansies van 1991.

[email protected]

Soortgelyk

 

Damme voller

7 ure gelede | Weer

Elvira Hattingh - Terwyl 99,671 Mm³ (miljoen kubieke meter) water altesaam 10 nasionale damme die afgelope week binnegevloei het, het die weerkantoor opnuut ’n waarskuwing...

Groot kommer oor sprinkaanplaag in Zambezi

7 ure gelede | Omgewing

Ronelle Rademeyer - ’n Plaag van bruin sprinkane uit vermoedelik Botswana teister kommunale boere by Muhundu en ander nedersettings in Katima Mulilo se landelike kiesafdeling...

Goliath, the giant

7 ure gelede | Mense

Elizabeth Joseph Born and raised in Windhoek, Romio Goliath started wrestling when he was 10. Being part of the After School Centre Wrestling...

Weerlig slaan meisie (11) dood

7 ure gelede | Misdaad

Weerlig het Saterdag die lewe van 'n elfjarige kind geëis. Volgens die Namibiese polisie se weeklikse misdaadverslag is Aini Shilongo Saterdag omstreeks 18:00 in 'n...

Weer vir 25 Februarie

7 ure gelede | Weer

WEERWAAK: Swaar storms word in die noordoostelike streke, Otjozondjupa-, Khomas- en suidelike streek verwag. Die nodige voorsorgmaatreëls moet getref word. BINNELAND: Gedeeltelik bewolk in die...

NamWater to fix Opuwo’s supply woes

7 ure gelede | Plaaslik

Uakutura Kambaekua – Since 2017, Opuwo town has been faced with diminished water supply, a predicament blamed on high water loss in distribution systems, which...

Havana, Otjomuise powered by June

7 ure gelede | Energie

The ministry of urban and rural development has committed a total of N$14 million for electrification for the 2019/20 financial year, an amount that is...

A significant contributor to Namibia's economic landscape

7 ure gelede | Byvoegsels

Hangana Seafood (Pty) Ltd is a 100% Namibian-owned company, passionate about “Creating a future, enhancing life” for its employees, country and the people of Namibia....

Corona: Afrika 66% gereed

7 ure gelede | Gesondheid

Henriette Lamprecht – Afrika se algehele gereedheidsvlak vir die coronavirussiekte (covid-19) staan op 66%. Volgens dr. Matshidiso Moeti, die Wêreldgesondheidsorganisasie (WHO) se streeksdirekteur vir Afrika,...