Ndeitunga nou onseker oor staatsvoertuie sonder lisensies

Mathias Haufiku – Die inspekteur-generaal van die Namibiese polisie (Nampol), lt.genl. Sebastian Ndeitunga, het Donderdag gesê hy het dalk ultra vires opgetree toe hy verlede jaar ’n interne memorandum aan verkeersbeamptes landswyd uitgereik het om nie verkeerskaartjies aan staatsvoertuie met vervalde lisensieskyfies uit te reik nie.Dié stap, wat verlede week in die openbaar aan die lig gekom het, het lede van die publiek laat rooi sien en bewerings is gemaak dat Ndeitunga van die oppergesag van die reg afgewyk het om ’n onwettige opdrag te bekragtig. Ndeitunga, wat steeds met vakansie is, het Donderdag gesê hy kan nie die motief vir sy opdrag onthou nie, maar hou vol dit was om ’n “goeie rede”.“Daar moet ’n goeie rede wees hoekom ek daardie opdrag uitgereik het, maar ek kan nie die rede onthou nie. Wanneer ek terug op kantoor is, sal ek my lêers deurgaan,” het hy gesê.Hy het bygevoeg: “Miskien het ek ultra vires opgetree, maar ek moet dit bevestig wanneer ek by my lêers uitkom.”Die polisiehoof, wat homself gereeld midde omstredenheid bevind, het in Julie 2021 dié opdrag aan verkeersbeamptes in alle streke uitgereik nadat sy kantoor tevore talle klagtes ontvang het oor bestuurders van staatsvoertuie wat verkeerskaartjies ontvang het vir vervalde lisensieskyfies. Bestuurders van staatsvoertuie het glo koue voete gekry oor die gereelde verkeerskaartjies wat aan hulle uitgeskryf is weens die toestand van die voertuie wat hulle moes bestuur – tot só ’n mate dat ’n droogtehulp-verspreidingsprogram in landelike gebiede nie kon realiseer nie..STADSPOLISIE SAL NIE INGEEIn reaksie op Ndeitunga se opdrag, het Windhoek se stadspolisiehoof Abraham Kanime gewaarsku sy magte sal nié lisensieskyfies op staatsvoertuie wat verval het ignoreer nie omdat “niemand bo die wet verhewe is nie”.“Die wet is duidelik en dit moet gelyk vir almal geld. Ek moes selfs gister [verlede week Dinsdag] een van die stadspolisievoertuie onttrek het weens ’n gekraakte venster,” het hy aan ons susterkoerant Namibian Sun gesê.Op die vraag of die munisipale polisie in Ndeitunga se voetspore sal volg, het Kanime geantwoord: “Waar sal ek daardie mag kry om so ’n vrystelling toe te staan? Die hof moet ons vrystellings gee.”“Wette is daar vir ’n rede, anders kan ek môre net wakker word en vir my beamptes sê om nie boetes aan my vriende uit te reik nie,” het hy verder gesê. Terwyl die Namibiese polisie in die duister is oor die aantal verkeerskaartjies wat sedert die begin van 2021 uitgereik is aan bestuurders van staatsvoertuie met lisensies wat verval het, het bronne binne die regering gesê Ndeitunga se vrystelling kon maklik ‘n inkomstetekort van honderdduisende – wat in die Paaieowerheid (RA) se geldkoffer sou beland – tot gevolg hê.“Jy moet onthou die geld wat deur die Paaieowerheid ingesamel word, word aangewend vir bedrywighede en ontwikkelings soos die bou en instandhouding van paaie. Waar dink Ndeitunga moet hierdie geld vandaan kom?” het ‘n staatsamptenaar, wat verkies het om anoniem te bly, gevra.ONBEïNDRUKOpenbare vervoeroperateurs, wat agentskappe vir verkeerswetstoepassing dikwels daarvan beskuldig dat hulle hul doelbewus teiken, was onbeïndruk toe hulle van Ndeitunga se “eensydige besluit” verneem het.Die sekretaris-generaal van die Namibiese Bus- en Taxivereniging (Nabta), mnr. Pendapala Nakathingo, het die besluit bevraagteken en gevra wat die rasionaal daaragter is om voertuie wat met staatshulpbronne gekoop is, vry te stel.“As dit gesê kan word, Nabta is vrygestel vanweë Covid-19 omdat ons nie geld gemaak het nie – dit kan mens verstaan. As die regering met sy eie begroting, sy eie geld, vrygestel word, wat was die redenasie? Ons as Nabta wil weet wat die rede agter die besluit is. Dit klink onregverdig,” het hy gesê. - republikein@republikein.com.na

Ndeitunga nou onseker oor staatsvoertuie sonder lisensies

Kommentaar

Republikein 2026-02-06

Meld asseblief aan om kommentaar te lewer

Ndeitunga nou onseker oor staatsvoertuie sonder lisensies

Kommentaar

Republikein 2026-02-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.