NCF-bestuur verklaar sy doelwitte

Andrew Poolman – Die teenwoordigheid van Namibiese fietsryers by ses opeenvolgende Olimpiese Speles is 'n prestasie om op trots te wees, maar die Namibiese Fietsryfederasie (NCF) gaan nie bloot op sy louere rus nie en wil seker maak dat op hierdie grondslag voortgebou word.“Die ontwikkeling van fietsry op alle vlakke – vanaf grondvlak tot die uitbreiding en afronding van ons groep elite ryers – is een van die drie gebiede waarop die NCF oor die volgende paar jaar fokus wil plaas,” sê die NCF se president, mnr. Axel Theissen.Die NCF het 'n paar vakante posisies op sy topbestuur gevul tydens sy algemene jaarvergadering wat verlede week in Windhoek afgehandel is.Drie nuwe lede is tot die uitvoerende komitee verkies, naamlik Elanor Grassow, Vaino Kali en Andrew Simon.Brendan Dickerson het hom nie weer verkiesbaar gestel nie. “Ons is dankbaar dat Brendan oor die laaste drie jaar sy portefeulje rakende NCF-byeenkomste met groot deeglikheid hanteer het en ook bygestaan het in verskeie sake wat met die UCI (die sport se wêreldbeheerliggaam) verband hou,” het Theissen in sy presidentsverslag gesê.Volgens Theissen het die NCF nou weer 'n voltallige topbestuur. Die individue se portefeuljes sal by hul eerste komiteevergadering op 16 September bevestig word, met bemarking en byeenkomste die twee wat nog toegeken moet word.Dit is reeds bekend dat Elanor Grassow die taak as sekretaresse sal opneem, wat oor die laaste tyd deur Irene Steyn verrig is ná die vertrek van Josefina Endjala.Sommige van die ander punte wat Theissen in sy presidentsverslag (Julie 2020 tot Augustus 2021) uitgelig het:• Die nasionale Covid-19-inperkings op die toegelate getalle by byeenkomste het daartoe gelei dat die NCF se finansiële verslag 'n betekenisvolle afname in inkomste uit wedrenne wys. “Die kritiese hersiening van die Federasie se uitgawes was dus 'n bron van kommer, maar ek is bly om te kan bevestig dat die NCF hierdie abnormale jaar kon afsluit sonder om finansiële verliese te ly.”• Theissen het spesiaal melding gemaak dat Namibië se 2020 Tokio Olimpiese span van elf atlete vier fietsryers ingesluit het. Hy het sy dank uitgespreek vir die rol van Hans du Toit, Nick du Plessis en Heiko Diehl om die Federasie by te staan om ter elfder uur 'n plaasvervangende ryer na Japan te reël toe Dan Craven ongelukkig was om kort voor sy vertrek positief vir Covid-19 te toets. “Ons afrigters Mannie Heymans en Hans du Toit, die meganikusse Martin Nghilifavali en Ermin van Wyk, spandokter dr. David Weber en fisioterapeut Anna-Mart Kruger het help verseker dat ons atlete tot die beste van hul vermoë kon presteer.”• Een van die Federasie se ambisieuse hoofdoelwitte vir die pad vorentoe is om fietsry aan meer klubs en streke in die land toeganklik te maak.“Ons vergaderings sal op Zoom gevolg kan word deur belangstellendes van buite Windhoek. “Ons sal ook tyd en energie moet bestee om ons RMB BMX-program na alle dele van die land uit te rol. Antje Tietz het groot werk verrig, ondanks die Covid-beperkings in die laaste jaar wat reise in die wiele gery het, maar ons wil hierdie projek weer optel.”• Die NCF het “groot treë vorentoe gegee” sedert die aanbieding van 'n slypskool vir opkikkervrye sport in middel Maart verlede jaar, met Namibia Health Plan (NHP) as medeborg en met Dominic le Roux en Stefan Böhlke as medewerkers.• Met die steun van verskeie liggame en inisiatiewe is die Fietsryfederasie positief dat hy oor die volgende twee jaar beduidende vooruitgang kan maak op die gebied van padveiligheid vir fietsryers in Windhoek. Horst Heimstädt en Justin Ellis is twee van die dryfvere op hierdie subkomitee.• Die NCF bied komende Saterdag sy nasionale bergfietsry-veldresieskampioenskap by Farm Windhoek aan, met Nedbank as hoofborg.

NCF-bestuur verklaar sy doelwitte

Kommentaar

Republikein 2026-02-05

Meld asseblief aan om kommentaar te lewer

NCF-bestuur verklaar sy doelwitte

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.