NBC-werkers woedend oor geldsake

Augetto Graig - Werknemers van die NBC sal nie langer wanbestuur duld nie.

Een van die grootste kwessies is die nasionale uitsaaikorporasie se versuim om derde partye te betaal, ondanks aftrekkings wat van werkers se salarisse gemaak is.

Van die werkers word nou met die hof gedreig oor private rekeninge en lenings wat nie betaal is nie, sê hulle. Ontstoke NBC-personeel het Woensdag hul klagskrif en lys eise aan die direkteur-generaal van die uitsaaikorporasie, mnr. Stanley Similo, oorhandig.

By vorige betogings voor die hekke van die televisiestasie se hoofkwartiere het me. Taucy Tjijombo, die werkers se verteenwoordiger van die Namibiese Unie vir Staatsdienswerkers (Napwu), geweier om die klagskrif aan NBC-bestuurslede te oorhandig. Sy het aangedring op die voorsitter van die NBC se direksie, mnr. Sven Thieme, se teenwoordigheid of minstens dié van 'n ander direksielid. Similo het as direksielid die petisie aanvaar en onderneem om dit so gou as moontlik onder Thieme en die res van die raad se aandag te bring. Volgens die NBC se hoofwoordvoerder, me. Umbi Karuaihe-Upi, sal die raad vergader sodra Thieme beskikbaar is.

Volgens Tjijombo kom onreëlmatighede soos wanbetaling van diensverskaffers wyd by die NBC voor. Werknemers se rekeninge by instansies soos Nedloans, polisverskaffers, waaronder Old Mutual, en pensioenfondse is nie betaal, maar die geld is van salarisse afgetrek, het sy gesê.

“Dit is dieselfde probleem as laas jaar en wat veroorsaak het dat ons van mediese fonds verander het. Ons is by NMC weg oor wanbetaling. Selfs PC Centre, wat die NBC se voertuie monitor, is nie betaal nie en nou staan die karre.” Volgens haar het die Namibiese Toesighoudende Owerheid vir Finansiële Instellings (Namfisa) skriftelik met die NBC in verbinding getree oor die stand van sake.

Vrae wat aan Namfisa gestuur is oor meer inligting in die verband, is teen druktyd nie beantwoord nie.

Sy woordvoerder, me. Victoria Muranda, het wel bevestig dat Namfisa met die NBC in gesprek is.

Nedbank se hoofwoordvoerder, mnr. Gernot de Klerk, het gesê hulle bespreek nooit kliënte-inligting in die openbaar nie. “Al was dit so, sou ek dit nie vir jou kom sê nie,” het hy aan Republikein gesê.

Tjijombo het gesê sy verwag vinnige terugvoering. Die petisie lui: “Ons, die werkers van die NBC, gee die bestuur en die raad van direkteure tot 21 Junie 2018 om die saak op te los. Anders sal ons geen ander opsie hê as om ongespesifiseerde en ongunstige aksie - veral teen die regering - te neem nie en als afskakel.”

Voorts word gesê hulle werk onder enorme stres weens 'n onsekere toekoms wat 'n negatiewe impak op produktiwiteit en hul lewensbestaan het. Die werkers sê die regering, as eienaar van die NBC, luister nie na hul pleidooie nie.

Hulle dring onder meer aan op 'n 6%-salarisverhoging, terugwerkend tot 1 April 2017. Die NBC moet ook alle agterstallige bedrae en rente by finansiële instansies teen die einde van Junie aflos. Wat die Julie-loonlys betref, moet paaiementbetalings direk aan werknemers oorbetaal word wat dan self hul onderskeie finansiële instansies sal betaal.

Hulle dring ook aan dat onderhandelinge tussen die NBC en Napwu oor salarisse, voordele en beter en werksomstandighede in die 2018-’19-boekjaar begin. Voorts moet die NBC gehoor gee aan die arbeidswet wat betref kontrakwerkers, en werknemers wat akademies presteer, moet beter poste kry.