‘Nat’ nywerhede in gedrang

Catherine Sasman

Verdere beperkings op water­verbruik mag verreikende ekonomiese gevolge hê as die Windhoekse munisipaliteit meer as die huidige 30% in besparings op “nat” nywerhede begin eis.
“Ons is feitlik op die punt waar ons nie in staat gaan wees om verder water te bespaar sonder om ons bedrywighede te staak nie,” het die besturende direkteur van Namibia Dairies, mnr. Gunther Ling, gewaarsku.
Ling het gesê enige bykomende beperkings sou nie net ernstige gevolge vir Namibia Dairies hê nie, maar vir meeste nywerhede.
Ná waterbeperkings aan die begin van die jaar op water-intensiewe nywerhede opgelê is, het Namibia Dairies minstens N$50 000 in besparingsmaatreëls belê.
Ling het gesê besparingsmiddels soos herwinning, asook drukknoppies op storte en self-geïmplementeerde beperkings deur werknemers, is reeds in gebruik.
Namibia Breweries Limited (NBL) het ook noemenswaardige beleggings gemaak om water te bespaar, het die besturende direkteur, mnr. Wessie van der Westhuizen, gesê.
“Die huidige waterkrisis raak dus nie NBL se bedrywighede nie,” het hy gesê.
NBL het beleggings gemaak in water­toevoer vanaf sy eie boorgate, wat ook ’n bykomkende watersuiweringssaanleg behels.
Van der Westhuizen het bygevoeg dat NBL in die afgelope tien jaar die doeltreffende gebruik van water aansienlik verbeter het en sal die maat­skappy voortgaan om op ander waterbesparingsinisiatiewe te fokus.
“Ons gaan voort om ander hulpbronne en ­alternatiewe te soek wat ons minder afhanklik sal maak van die munisipaliteit se waterbronne, wat om die beurt meer water vir die gemeenskap sal beskikbaar maak,” het hy gesê.
Meatco het ook reeds in 2011 verskeie water­besparingsmaatreëls ingestel terwyl die maatskappy nog steeds ander maniere ondersoek om meer te spaar. Die doelwit is om elke dag tot 30% van die water by die aanlegte in Windhoek en Okahandja te spaar.
Die aanleg in Okahandja is tans gesluit met personeel wat na Windhoek verplaas is.
As ’n waterbesparingsmaatreël het Meatco reeds “diepreiniging” uitfaseer, wat behels dat areas wat met vleis in aanraking kom, met oormatige hoeveelhede water skoongemaak word.
Deur die jare het Meatco in Windhoek en Okahandja meeste van sy gras met plaveisel vervang en lekkasies word onmiddellik aangemeld en herstel.
Daar is ook ’n waterkomitee gestig wat werknemers se watergebruik monitor. Al Meatco se bedrywighede – die slagpale in Windhoek en ­Okahandja, die Okapuka-voerkraal, looiery en inlêfabriek – maak van dieselfde waterbron gebruik.
Meatco sê hulle gebruik slegs 1,29% van Windhoek se jaarlikse waterverbruik van 25,528 Mm³. Die maatskappy het ook daarop gewys dat waterverbruik in Windhoek se noordelike nywerheidsgebied wat industrieë soos NBL, Coca Cola en Nakara insluit, minder is as die 9% wat die munisipaliteit elke jaar gebruik.
Die besturende direkteur van Coca Cola, mnr. Frik Oosthuizen, het gesê die maatskappy gaan weens die water­tekort ophou om hulle produk in 1 liter inruilbare bottels in Windhoek te vervaardig. Dié verpakking (in alle geure) sal net in die noorde van Namibië beskikbaar wees. Die maatskappy gaan ook ophou om alle blikkieskoeldrank in die hoofstad te maak en sal dit voortaan vanaf Suid-Afrika ingevoer word. Dit sal egter in die kort termyn beteken pryse gaan aangepas word.
Oosthuizen het verbruikers gewaar­sku teen sporadiese tekorte van Coca-Cola produkte in plastiek wat in Windhoek vervaardig word.