Naspers baklei terug ná grootste daling in 10 jaar

Hanlie Stadler Naspers-beleggers het die markte senuagtig dop gehou nadat die maatskappy Woensdag R121 miljard se markwaarde verloor het weens kommer oor Tencent se winspad vorentoe.Naspers besit 31% van die Chinese internetreus, wat Woensdag kwartaalsyfers uitgereik het wat ontleders nie genoegsaam beïndruk het nie.Donderdagoggend het dit gelyk asof Naspers se aandeelprys gestabiliseer het nadat dit Woensdag ná ’n skerp duikslag van tot 10% uiteindelik 8,22% laer op R3 060,88 gesluit het. Dit was Naspers se laagste sluitingsprys sedert 6 Januarie en die grootste intradagdaling in meer as tien jaar.Die aandeel het teen 11:30 1,8% hoër op R3 115,28 verhandel.Dis ondanks die feit dat Tencent se aandeelprys Donderdag aangehou val het nadat hy Woensdag US$15 miljard se markwaarde verloor het en op die laagste vlak in byna ’n jaar, sedert 28 September 2017, gesluit het.Donderdag teen 11:30 Suid-Afrikaanse tyd het Tencent nog 3,04% tot HK$325,80 verloor.Die Suid-Afrikaanse batebestuursmaatskappy Avior meen die mark het oorreageer. “Tencent is steeds goed geposisioneer, met sterk kernmaatstawwe van gebruikers, om voordeel te trek uit ’n snelgroeiende en betreklik bekostigbare wêreldwye vorm van vermaak, naamlik videospeletjies. Met ’n beduidende aantal (15) nuwe speletjies waaraan hy werk, sal dit Tencent in staat stel om sy verkope te laat groei en sy inkomste uit speletjies te diversifiseer.”Tencent maak steeds ’n enorme bedrag wins, maar die maatskappy se netto wins het vir die eerste keer in byna 13 jaar effens gedaal.Die grootste probleem is egter die feit dat die Chinese regering nie wil sê wanneer hy geld sal mag maak uit sy gewildste speletjie, PlayerUnknown’s Battlegrounds, nie.Tencent moes ook verlede week sy nuwe speletjie, Monster Hunter: World, aan China onttrek net dae nadat dit bekend gestel is omdat klagtes daaroor ontvang is. Die reguleerders het geen besonderhede van die aard van die klagtes bekend gemaak nie.Martin Lau, president van Tencent, het Woensdag net gesê die inhoud voldoen nie ten volle aan die regulasies nie.China het in Maart ’n moratorium geplaas op die uitreiking van nuwe speletjies wat eers in September opgehef sal word. Die moratorium is ingestel omdat China die reguleerders herstruktureer.China is die grootste mark vir speletjies ter wêreld en die inkomste daaruit verteenwoordig 40% van Tencent se inkomste.Reguleerders is nou al langer as ’n jaar besig om op mobiele speletjies toe te slaan, onder meer weens kommer oor die aantal kinders wat daaraan verslaaf word.Sommige ontleders beskou die sensuur as ’n tydelike terugslag.John Choi van Daiwa Capital in China het aan Bloomberg gesê hy beskou die “ontwrigting” as tydelik en Tencent as “struktureel gesond”.· Netwerk24 is ’n publikasie van Media24, ’n filiaal van Naspers. – Netwerk24

Naspers baklei terug ná grootste daling in 10 jaar

Kommentaar

Republikein 2025-11-07

Meld asseblief aan om kommentaar te lewer

Naspers baklei terug ná grootste daling in 10 jaar

Kommentaar

Republikein 2025-11-07

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.