Nasie word in Augustus getel

Augetto Graig – Die Namibiese Statistiekagentskap (NSA) berei voor vir die reuse-onderneming om binne twee weke in Augustus die inwoners in elke woning in Namibië te tel. “Namibië sal vir die eerste keer ’n ruimte-geaktiveerde en digitale sensus doen,” het die statistikus-generaal, mnr. Alex Shimuafeni, gister by hul hoofkantoor aangekondig.Die nasionale sensus moet elke tien jaar geskied, maar is laas jaar uitgestel weens die stand van die Covid-19-pandemie in Namibië, asook weens beperkings in die begroting, sê hy. Shimuafeni sê aanvanklik was N$1,1 miljard vir die hele opnameproses vanaf 2017 tot en met 2025 begroot. Vanaf ’n aanvanklike begroting van N$950 miljoen is die verwagte koste van die sensus self tot N$606 miljoen afgebring, sê hy. Die regering dui egter aan dat net N$500 miljoen vrygestel sal word, terwyl by ’n geldinsameling aan die begin van verlede jaar beloftes vir nog N$40 miljoen ontvang is. Altesaam N$30 miljoen van die N$40 miljoen is kontant vanaf die ministerie van stedelike en landelike ontwikkeling, geoormerk vir die opstel van ’n nasionale behuisingsdatabasis en die verkryging van hoëgehalte satellietfoto’s, sê hy. Die NSA soek nog oplossings hoe die tekort van 18% gefinansier moet word.Die adjunkstatistikus-generaal, me. Ottilie Mwazi, sê koste word gedurig hersien om nog besparing te bring. Sy doen ’n beroep op alle Namibiërs, insluitend sakelui, om te help waar hulle kan. “Byvoorbeeld, dink aan die koste van die druk van T-hemde, iemand kan ons help om dit aan te koop, of die koste van data. Miskien kan MTC of Telecom vir ons daardie dienste skenk?” sê sy.Die sensus sal behels dat aangewese beamptes elke huisgesin in Namibië in persoon sal besoek, die woning se inwoners boekstaaf en ander maatskaplike en demografiese inligting sal opneem. Shimuafeni gee die versekering alle inligting sal vertroulik hanteer en só verwerk word dat niemand se persoonlike inligting uit die eindresultaat se publikasies verkry kan word nie.Uit die nasionale oogpunt is dit goeie nuus dat die sensus tydelike werk vir 11 500 werkloses sal bied. Verder sal 2 400 voertuie gehuur moet word en 11 500 tabletrekenaars moet verkry word, sê hy. Die NSA is in gesprek met sy eweknie in Kenië om 12 000 tabletrekenaars by hulle te leen, volgens die statistikus-generaal. Shimuafeni sê die bestaande databasis voldoen nie meer aan Namibië se vereistes nie. “Namibië is nie op die stadium waar ons administratiewe inligting vir ’n sensus kan gebruik nie, omdat die land steeds nie ’n verpligte nasionale addresstelsel het waarmee almal aan ’n huisadres gekoppel kan word nie. Die databasis van Namibië se bevolking word nog opgebou en die NSA het geen ander keuse nie as om fisies koppe te tel in die konteks om niemand uit te los nie. “Die bevolking- en behuisingsensus tel nie net mense nie, maar versamel meer as 80 veranderlikes wat nodig is vir alle aspekte van nasionale beplanning,” sê hy.Volgens hom bly die ekonomiese bemagtiging uit die sensus nie net beperk tot die tydperk waarin duisende huisgesinne en plaaslike diensverskaffers ’n inkomste verdien nie. “Die massiewe logistiek wat vereis word, kan vele mans en vroue tot aksie mobiliseer. Verder as hierdie ekonomiese hupstoot kan die nasie verwag om blywende kapasiteit vir toekomstige sensusse te bou. Ja, ons stem saam dat die insameling van statistiek duur is, veral met primêre dataversameling, maar oorweeg dan ook hoe duur dit sal wees om sonder statistiek te moet beplan,” sê hy.Mnr. Israel Tjizake, die sensusbestuurder, sê Namibië is een van min lande wat sy nasionale sensus op ’n digitale en geografiese inligtingstelsel-geaktiveerde grondslag aanpak. Die ambisieuse projek kry steun vanaf die VSA, die Afrika Unie, die Verenigde Nasies, die Verenigde Koninkryk en Suid-Afrika, sê Tjizake oor die buitelandse kundiges wat Namibië met toepontwikkeling, opleiding en kapasiteitbou bystaan.– augetto@republikein.com.naFOTODie statistikus-generaal mnr. Alex Shimuafeni wys hoe lyk die tabletrekenaars wat vir die opname van sensusdata in Augustus gebruik sal word. Foto Augetto Graig

Nasie word in Augustus getel

Kommentaar

Republikein 2026-06-15

Meld asseblief aan om kommentaar te lewer

Nasie word in Augustus getel

Kommentaar

Republikein 2026-06-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.