NamPower ondersteun Eduvision

Die NamPower-stigting fasiliteer tans interaktiewe lesse tussen Edugate Akademie en drie sekondêre skole in die Otjozondjupastreek. Die stigting se ondersteuning van Eduvision, ’n aanlyn leerprogram en inisiatief van Edugate, stel leerlinge in verskillende skole en liggings in staat om interaktief en regstreeks tydens lesse by Edugate in te skakel. Leerlinge kan ook die lesse opneem en later daarna luister en kyk. Die stigting se ondersteuning van Eduvision sluit in die aankoop en installering van slimborde (smartboards), ’n rekenaar, kamera en klankstelsels by die Junior Sekondêre Skool Waterberg en die Senior Sekondêre Skool Okakarara. asook ’n skool/skryfprogram vir die Senior Sekondêre Skool Tsumkwe. Dit sluit ook in ’n inskrywing van ’n jaar vir toegang tot die Panopto-toep vir die betrokke skole, asook ’n inskrywing van ’n jaar vir die opgradering van bandwydte tussen Edugate en die skool op Tsumkwe, asook ’n optiese kabel vir die skole op Okakarara en Waterberg.