NamPost van N$300 000 beroof

Drie beweerde rowers het NamPost op Fransfontein glo Dinsdag van sowat N$300 000 beroof. Dit volg nadat hulle die posmeester na bewering in sy huis aangerand en vasgebind het, sodat hy die poskantoor se sleutels aan hulle oorhandig.Die Namibiese polisie het in 'n verslag gesê hulle is tans op die spoor van die verdagtes, maar het 'n beroep op die publiek gedoen om met enige inligting vorendag te kom. Die polisie is van mening hierdie voorval is haarfyn beplan. Volgens die polisie is NamPost se Fransfontein-tak in die Kunenestreek Dinsdag omstreeks middernag beroof.Dit volg nadat 'n sekuriteitswag naby die poskantoor glo twee mense onder verdagte omstandighede van die poskantoor sien weghardloop en die polisie gekontak het. Die polisie het gesien die deure van die poskantoor staan wawyd oop, insluitende 'n traliedeur, asook die van die kluis. Die polisie het na die posmeester se huis gery om hom van die voorval in kennis te stel. Hy is egter in 'n bedenklike toestand – erg aangerand en bebloed op die vloer – gevind terwyl hy met elektriese kabels vasgemaak is.Hy is tans op Khorixas in die staatshospitaal. Volgens hom is hy deur drie onbekende persone aangerand, met twee wat balaklawas gedra het. Hulle het hom glo geslaan en die poskantoor se sleutels geëis, wat hy naderhand oorhandig het. Dit volg nadat hy glo vroeër die dag N$300 000 in kontant ontvang het, wat as pensioengeld uitbetaal moes word. Die polisie sê die kluis is leeg gevind.Die polisie kon die verdagtes se spore vir sowat 5 km langs 'n grondpad volg, tot waar hulle waarskynlik opgelaai is. Enigiemand met meer inligting, kan die polisie by 081 129 8238 kontak.

NamPost van N$300 000 beroof

Kommentaar

Republikein 2025-07-16

Meld asseblief aan om kommentaar te lewer

NamPost van N$300 000 beroof

Kommentaar

Republikein 2025-07-16

Meld asseblief aan om kommentaar te lewer

MELD AAN

Advertensie