Namport se kapasiteit kry hupstoot

Leandra Louw – Namport se splinternuwe vraghouerterminaal op Walvisbaai is Vrydag amptelik deur pres. Hage Geingob ingewy. Die terminaal is teen N$4,2 miljard opgerig en verdubbel die hawe se kapasiteit. Die verskuiwing van tussen 2 500 en 3 500 vraghouers van die ou houerterminaal af vind van 17 tot 23 Augustus plaas.Geingob het tydens die amptelike opening gesê die geriewe moet ten volle tot Namibië se voordeel aangewend word. “Ons moet dié oomblik van groei en ontwikkeling aangryp om die ontwikkeling van Walvisbaai se waterfront te bespoedig,” het hy gesê.Die president het voorts gesê ‘n belofte is aan Namibiërs gemaak om ekonomiese groei, werksgeleenthede en vooruitgang vir alle Namibiërs te verseker.“Die projek is ‘n aanduiding van ons toewyding om ‘n verenigde, ontwikkelde en moderne Namibiese huis te bou,” het hy gesê.Die goewerneur van die Erongostreek, mnr. Cleophas Mutjivikua, het uitstekende kliëntediens beklemtoon en gemaan alle rolspelers moet onverpoos werk om Walvisbaai se hawe een van die mededingendste hawens in Afrika én wêreldwyd te maak. Volgens mnr. Li Yin, visepresident van China Harbour Engineering Company (CHEC), was die nuwe houerterminaal die maatskappy se uitdagendste projek tot dusver. Dit het meer as 100 kenners uit 30 lande betrek en vier miljard werksure tydens die bouproses ingesluit. Die projek het meer as 2 000 werksgeleenthede aan Namibiërs verskaf en CHEC het N$1,2 miljard aan die plaaslike mark bestee, en N$200 miljoen se steun aan die ontwikkeling van klein- en mediumsakeondernemings gebied.“Ek glo die projek sal die manier waarop Nambië sake doen, verander en die land na hoër hoogtes neem. Namibië word beskou as een van die beste lande in Afrika om mee sake te doen,” het hy gesê. Yi het gesê Namibië sal verder in grootskaalse infrakstruktuur moet belê om Visie 2030 te bereik.“Namibië sal sy spoor- en padnetwerk en varswaterhulpbronne moet opgradeer om in nywerheidsbehoeftes te voorsien, asook groter lughawens moet bou om aan die toerismebedryf se vereistes te voldoen.”Die projekbestuurder van die nuwe houerterminaal, mnr. Elzevir Gelderbloem, het gesê verskeie projekopsies is ontleed voor die hawe verder op land uitgebrei is.“Deur die hawe só uit te brei, is werksaamhede by die hawe tydens konstruksie minimaal ontwrig en groot ruimte vir verdere uitbreiding gelaat,” het hy gesê.Volgens Gelderbloem wys hersiene vooruitskattings van verkeer die huidige kapasiteit is voldoende vir die volgende paar dekades. Wanneer 65% van die huidige kapasiteit bereik word, sal ‘n nuwe projek volgens hom weer geïmplementeer word om die kapasiteit vir die hantering van houers te verhoog. leandrea@republikein.com.na

Namport se kapasiteit kry hupstoot

Kommentaar

Republikein 2026-02-05

Meld asseblief aan om kommentaar te lewer

Namport se kapasiteit kry hupstoot

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.