Nampol vier 31 jaar

Augetto GraigLt. genl. Sebastian Ndeitunga, die inspekteur-generaal van die Namibiese polisie (Nampol), het Saterdag die mag se 31ste bestaansjaarvieringe op Katima Mulilo herdenk. Hy sê die polisie het sedert onafhanklikwording van net 800 tot 14 800 lede gegroei.Nampol het ook 113 geriewe landswyd, insluitend die nuwe hoofkantoor en die forensiese wetenskapsinstituut in Khomas, en ses streekhoofkantore in die Zambezi-, Ohangwena-, Oshana-, Omusati-, Oshikoto- en Hardapstreek. In Kavango-Wes word nog ’n hoofkantoor tans voltooi terwyl die polisie ook ’n plaas in die Omahekestreek besit.Vier polisiekolleges is onderskeidelik in Khomas, Oshana, Omaheke en Zambezi gevestig. Verder het Nampol ook drie helikopters, ’n skip en kleiner bote vir die watereenheid mariene-eenheid binne die spesiale taakmag, het hy genoem.Ndeitunga sê misdaad is onder beheer. Vir die boekjaar 2020-’21 is 92 251 strafregtelike sake aangeteken, terwyl 178 987 vanaf die vorige boekjaar oorgedra is, wat op altesaam 271 238 sake teen die einde van die boekjaar neergekom het. Van dié getal is 39% of 105 634 sake opgelos.Ndeitunga sê die meeste misdaad word in Khomas, Oshana en Otjozondjupa gepleeg, terwyl Kavango-Wes, Kunene en Omaheke die minste gevalle aanteken. Gedurende dié boekjaar is 308 gevalle van moord aangeteken; 1 205 van verkragting; 418 van gewapende rooftogte; 4 445 van huishoudelike geweld; 461 van poging tot moord; 256 van die rig van ’n vuurwapen; 13 van ontvoering; 3 160 van veediefstal, 2 115 van dwelmoortreding; 196 van brandstigting; 403 van motordiefstal en 7 487 van huisbrake.Vir die 2021-’22-boekjaar is ’n begroting van N$4,3 miljard aan Nampol bewillig, asook N$10,8 miljoen se skenkings om hoofsaaklik Covid-19 te bekamp. Die Padfondsadministrasie (RFA) het ook onlangs 15 nuwe voertuie geskenk, sê hy.By dieselfde geleentheid het die minister van binnelandse sake, immigrasie, veiligheid en sekuriteit, dr. Albert Kawana, die bevordering van vroue in die polisiemag geprys en die aanstelling van polisiereserviste – wat veral in die Erongostreek ’n verskil maak – aanbeveel. Hy sê polisiebeamptes moet respek verdien deur die handhawing van die Grondwet en die bevordering van menseregte. “Hulle mag burgerlikes nie ‘paneelklop’ nie. Hulle mag slegs minimale krag gebruik, of proporsionele krag, soos met hulle opleiding. Ons sal nie die stryd teen misdaad wen as ons nie die vertroue van ons landsburgers en die gemeenskap wat ons dien, het nie,” het hy gesê.“Dis teleurstellend dat ’n paar vrot appels die goeie naam van ons polisiemag in oneer bring deur in kriminele bedrywighede betrokke te raak,” het die minister gesê en daarop aangedring dat Ndeitunga hulle tot orde moet roep.Kawana wil ook samewerking tussen Nampol en munisipale beamptes in dorpe landswyd bevorder. Wat sekuriteitsmaatskappye betref, sê hy die wet word tans hersien en hy sal help om te verseker dit word vinnig voltooi sodat wagte saam met Nampol kan werk. Ander wetgewing wat hersien word, is onder meer die wet op alkohol en die wet op wapens en ammunisie, terwyl ’n konsepwet voltooi word om belangrike infrastruktuur te beskerm, sê hy.Volgens die minister sal Nampol ’n nuwe strategiese plan ontwikkel ná die huidige vyfjaarplan einde vandeesmaand verval.Adj.komm. Fwambo Siame, die waarnemende provinsiale hoof vir Wes-Zambië, het die geleentheid met sy afvaardiging bygewoon saam met verskeie politieke en munisipale hoofde. Die geleentheid het ’n parade ingesluit en medaljes is toegeken. - augetto@republikein.com.na

Nampol vier 31 jaar

Kommentaar

Republikein 2025-05-06

Meld asseblief aan om kommentaar te lewer

Nampol vier 31 jaar

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie