Namibiërs bal vuis teen korrupsie

Denver Kisting – Die baas van die Teenkorrupsiekommissie (ACC), mnr. Paulus Noa, sleep met opset voete met wetshervormings wat sy kantoor meer mag sal gee.Dít omdat Noa weet die beplande wysigings maak voorsiening vir ’n oorsigliggaam om sy kantoor op hul tone te hou.Boonop vat hy ook sy tyd omdat hy weet die voorgenome wet sal van sy vriende agter tralies laat beland.Dít is deel van ’n vyf bladsy lange “memorandum van eise” wat ’n groep besorgde inwoners Maandag op Internasionale Teenkorrupsiedag aan Noa oorhandig het.Terwyl mnr. Dimbulukeni Nauyoma, van die Regstellende Herposisioneringsbeweging (AR), die dokument aan Noa voorgelees het, het die ACC se baas gestaan en glimlag terwyl hy deur polisielede omring is.Nauyoma het gesê die griefskrif word nie onder ’n spesifieke politieke vaandel aangebied nie.Volgens hom het sekere vrygheidsvegters en van die politieke elite die afgelope 29 jaar die bevrydingstryd verraai.In skrille kontras met wat pres. Hage Geingob deurgaans aanvoer, het Nauyoma voet by stuk gehou korrupsie ís in die land ingeburger.Hy sê die ACC moet vir dié toedrag van sake pa staan. “Dit hou ’n reusegevaar vir ons demokrasie en die funksionaliteit van staatsinstellings in. ’n Groot bydraende faktor is die ongekoördineerde beleidsrigtings van die ACC.”Korrupsie, sê Nauyoma, raak nie net ekonomiese ontwikkeling negatief nie, dit perk ook die billike verspreiding van hulpbronne in wat tot verdere inkomsteongelykheid lei.Volgens die aktivis is korrupsie niks anders as terreur nie. “’n Sterk en duidelike boodskap moet aan dié wat korrupsie pleeg, gestuur word dat hulle terroriste is – nie net witboordjiemisdaad-kunstenaars nie.”Nes ander misdadigers, veral dié wat bereid is om omkoopgeld te aanvaar, buit terreurorganisasies skuiwergate in wetgewing uit, meen hy. “Gevolglik is geen land immuun daarteen nie. Dié voorvalle kan gesien word in die sentrale bank se onvermoë om die spoor te kry van omkoopgeld soos in die Fishrot-saak.”Dié internasionale skandaal, sê hy, het talle lewens geëis en huishoudings in ellende gedompel.Noa het op sy beurt die groep bedank vir die vreedsame betoging en dat hulle opnuut die ACC se aandag op sekere voortslepende sake gevestig het.Die dokument lig naas Fishrot ook die verdwene miljoene van die Staat se pensioenfonds (GIPF) uit, asook die miljoene wat weens die volksmoord vir prokureurs in die Verenigde Koningryk opgedok is.Die groep eis dat die wysigingswetsontwerp onmiddellik aan die parlement voorgelê word.Voorts verwelkom hulle Noa se voorstel dat hy nie nog ’n termyn as ACC-baas sal oorweeg nie. “Ons benodig mense wat hul werk sonder inmenging na die beste van hul vermoë wil doen om Namibië skoon te maak.” - denver@republikein.com.na

Namibiërs bal vuis teen korrupsie

Kommentaar

Republikein 2025-09-19

Meld asseblief aan om kommentaar te lewer

Namibiërs bal vuis teen korrupsie

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie