Namibiër vorder goed in liedjiekompetisie

Jessica Botes Die jong Namibiese liedjieskrywer en musikant, Vincent Simphiwe (Squeeze) Mjethu, het die volgende rondte van KykNET se Afri-Visie: Skryf ’n Treffer-kompetisie gehaal. Hy sal volgende week die uitdunne in Kaapstad bywoon waar hy ’n optrede van sy liedjie “Pangas ’n’ Bottelkoppe” moet uitvoer.Die kompetisie vir liedjieskrywers is geïnspireer deur die suksesse van Eurovision wat soveel kunstenaars en liedjies internasionale roem laat verwerf het. Dit spog met bekende aanbieders soos Heinz Winckler, Emo Adams, Anna Davel, Emil Struwig, William Loots en Pierre Rossouw.Mjethu sê hy was baie opgewonde oor die nuus dat sy liedjie na die volgende rondte van die kompetisie deurgedring het.“Ek was verskriklik opgewonde toe ek die e-pos, waarin ek in kennis gestel is dat ek as semi-finalis in die liedjieskrywer-kompetisie gekies is, van die Afri-Visiespan ontvang het. Vir jare het niemand my musiek en skryfwerk ernstig opgeneem nie, dus voel dit baie goed om nou erkenning daarvoor te kry.”Vir hom is die bevordering van Afrikaanse musiek in Namibië baie belangrik en hy hoop om binnekort meer plaaslike Afrikaanse liedjies op die radio te hoor.“Ek het in 1995 begin om liedjies te skryf, maar ek het eers in 2009 liedjies in my moedertaal begin skryf. Dít het begin toe ’n visserman van die Kaap, wat by ons familie op Lüderitz kom kuier het, vir my gesê het dat my musiekloopbaan baie verder sal vorder as ek Afrikaanse liedjies skryf.”In 2012 was hy as die beste Afrikaanse kunstenaar vir die Namibiese Jaarlikse Musiektoekennings (NAMA's) genomineer. Hy kon egter weens omstandighede nie die geleentheid bywoon nie, maar vir hom is dié kompetisie ’n tweede kans om ’n suksesvolle musiekloopbaan te hê.Volgens die organiseerders is meer as 1 500 inskrywings vir die liedjieskrywerkompetisie van 411 skrywers ontvang. Die volgende fase van die kompetisie behels ’n regstreekse verhoogplatvorm beoordeling wat by die All Star Theatre in Brackenfell, Kaapstad, vanaf 16 tot 18 Januarie sal plaasvind.Hiertydens sal Mjethu sy liedjie voor beoordelaars en die gehoor moet uitvoer. “Dit sal die eerste keer wees wat ek op televisie verskyn, maar ek is reg daarvoor. Ek sien baie uit daarna om my land op so ’n groot skaal te verteenwoordig. Ek is ’n gebore kunstenaar en ek het ’n groot liefde daarvoor.”Die 24 liedjies wat uit hierdie rondte gekies word, word dan opgeneem (fase 4 van die kompetisie), voor die topagt liedjies tydens die kompetisie se semi-finaal gekies moet word (fase 5 van die kompetisie). Die finale rondte vind tydens die Suidoosterfees in Februarie 2015 in die Artscape, Kaapstad plaas.“Ek is opgewonde oor die geleentheid om my geboorteland in Suid-Afrika te verteenwoordig en om my storie met my landgenote te deel. Ek wil ook graag vir die goeie samaritane vra om my aan die hand te vat en geldelik te help, anders glo ek nie ek dit oor die grenslyn maak nie.”Groot pryse is op die spel – ’n kontantbedrag en plasing by ’n plaaslike en oorsese uitgewer.

Namibiër vorder goed in liedjiekompetisie

Kommentaar

Republikein 2025-12-25

Meld asseblief aan om kommentaar te lewer

Namibiër vorder goed in liedjiekompetisie

Kommentaar

Republikein 2025-12-25

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.