Namibiese vroue neem voortou met vrede

Augetto Graig - Die adjunk- eerste minister en minister van internasionale betrekkinge en samewerking, me. Netumbo Nandi-Ndaitwah, sê Namibië neem die voortou wat die bevordering van vroue se betrokkenheid by wêreldvrede betref. Sy het melding gemaak van Namibië se voorstel in 2000 aan die Verenigde Nasies (VN) se veiligheidsraad, wat tot die aanneem van resolusie 1325 oor vroue, vrede en veiligheid gelei het.Op 22 Junie vanjaar het Namibië dit weer op Suider-Afrika se agenda geplaas toe die Suider-Afrikaanse Ontwikkelingsgemeenskap (SADC) ministers in Luanda, in Angola, ontmoet het. Ná Duitsland in Mei vanjaar gasheer in Berlin gespeel het by die VN-geleentheid wat op vroue, vrede en veiligheid fokus, sal Namibië volgende jaar dié rol oorneem, het die adjunk- eerste minister gesê. Sowat 150 afgevaardigdes het hiervoor in Berlin bymekaargekom.Nandi-Ndaitwah het dié inligting verlede week in die hoofstad as deel van haar jaarlikse terugvoersessie met die land se diplomate-gemeenskap gedeel. Sy het teenwoordiges van ander lande vir hul hulp oor die afgelope en bedrywige eerste deel van 2018 bedank. Nandi-Ndaitwah het gesê sy en die president, mnr. Hage Geingob, waardeer die reëlings wat getref word vir gereelde interaksie met verskeie staatshowe en leiers van internasionale organisasies.Namibië se leiding in die streek sal van nóg meer belang wees wanneer die land op 17 en 18 Augustus vanjaar voorsitterskap van die SADC in Windhoek sal oorneem.Volgens haar sal Namibië gedurende die 38ste SADC-beraad vir staatshoofde die leiding neem om industrialisering te bevorder, sê sy.Die tema van die byeenkoms sal wees “Die bevordering van infrastruktuurontwikkeling en jeugbemagtiging vir volhoubare ontwikkeling”.Oor die vasteland sê sy: “Afrika is op pad na ’n meer voorspoedige toekoms waarin al sy burgers bemagtig is om hul volle potensiaal te besef, terwyl die ‘Afrika wat ons wil hê’-beginsel nagestreef word.”Sy beskryf die aanvaarding van die Afrika-unie (AU) se ooreenkoms in Maart in Kigali as ’n mylpaal wat die vasteland se ekonomiese ontwikkeling en integrasie versterk.Dié ooreenkoms vestig die vasteland as vryhandelgebied. “Ons is saam met die res van Afrika trots om die grootste vryhandelgebied ter wêreld te wees,” het sy gesê. Volgens haar is Afrika se lugvervoer- en handelsmark, wat in Januarie vanjaar voorgestel is, nóg ’n tree in die regte rigting. Air Namibia se vlugte na Wes-Afrika is net so belangrik, het sy gesê. “Vryheid van beweging vir die mense van Afrika is belangrik en as vasteland moet ons werk om vrede te bewerkstellig sodat ons ons hulpbronne vir ekonomiese en sosiale ontwikkeling kan aanwend,” het sy gesê. Namibië is gekies om tot 2020 op die Statebond se ministeriële aksiegroep te dien.Namibië sien ook uit na die forum vir China-Afrika samewerking in September en die sewende internasionale konferensie oor Afrika-ontwikkeling volgende jaar in Tokio, het sy gesê. Die adjunk- eerste minister het gesê Namibië vorder daarmee om belanghebbende internasionale groepe by die hervorming van die VN se veiligheidsraad te betrek. Die komitee oorweeg om verdere onderhandelinge skriftelik voort te sit en om staatshowe direk te nader.Nandi-Ndaitwah het van die geleentheid gebruik gemaak om Namibië se standpunt oor Saharawi en Palestina te beklemtoon. “Kolonialisme verteenwoordig een van die ernstigste skendings van die nasionale soewereiniteit van state en is in stryd met internasionale reg,” het sy gesê. Namibië versoek dat alle VN-resolusies wat betrekking op Palestina en Wes-Sahara het, toegepas word, asook die VN se vestigingsplan vir Wes-Sahara.Namibië sal ook aanhou dien op die komitee vir die onafhanklikheid van koloniale lande en mense, het die adjunk- eerste minister gesê.

Namibiese vroue neem voortou met vrede

Kommentaar

Republikein 2025-05-02

Meld asseblief aan om kommentaar te lewer

Namibiese vroue neem voortou met vrede

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie