Namibiese beesvleis kry ‘groenkaart’

Elvira Hattingh - “Namibiese beesvleis het sy groenkaart gekry! Dit beteken Meatco kan nou amptelik na Amerika uitvoer.”Só het mnr. Ronald Kubas, die Meatco-raad se ondervoorsitter, gister tydens ’n nuuskonferensie gesê waartydens Meatco aangekondig het hy stuur sy eerste besending van 25 ton beesvleis na Philadalphia in Amerika. Dit ná sowat 18 jaar se onderhandelinge met dié land. Namibië is dus die eerste land in Afrika om vleis na Amerika, wat as die grootste beesvleismark ter wêreld bekend is, uit te voer. Die plan is om dié land se kitskosbedryf te teiken.Dit volg nadat Namibië verlede jaar ook die eerste land in Afrika was om beesvleis na China te kon uitvoer en intussen reeds meer as 3 000 ton aan dié land gelewer het.Kubas het verduidelik ingevolge die ooreenkoms kan Namibië vanjaar altesaam 860 ton beesvleis na Amerika uitvoer. Teen jaar vyf sal Meatco tot 5 000 ton beesvleis per jaar kan uitvoer. Me. Lisa Johnson, die Amerikaanse ambassadeur in Namibië, het gister tydens ’n nuuskonferensie verduidelik Meatco se uitvoere sal boonop belastingvry wees. Dít danksy Amerika se Afrikagroei- en -geleentheidswet, oftewel Agoa.Die eerste besending bestaan hoofsaaklik uit gesogte snitte soos beeste se ontbeende voorkwarte, het Namibië se adjunk- eerste minister en minister van internasionale betrekkinge en samewerking, me. Netumbo Nandi-Ndaitwah, tydens die geleentheid gesê. “Dit volg nadat die Namibiese regering in 2002 en weer in 2005 met onderhandelinge begin het om beesvleisprodukte na Amerika te kan uitvoer. “Niks goeds kom maklik nie,” het Nandi-Ndaitwah gesê. Sy het verduidelik Meatco moes verskeie streng oudits slaag. Ook moes Namibië die afgelope 24 maande voortdurend vleismonsters na Amerikaanse laboratoriums vir ontleding stuur.Nandi-Ndaitwah het gesê Meatco se hooffokus is die immer groeiende, gesondheidsbewuste verbruiker wat organiese kos, soos Namibiese beesvleis, wil eet. “Ek kan trots bevestig Meatco voldoen voortdurend aan al die standaarde wat die Amerikaanse departement van landbou vereis, asook die Amerikaanse voedselveiligheidinspeksiediens vir beesproduksie en prosessering,” het Johnson gesê.Sy het bygevoeg die ooreenkoms hou ekonomiese voordele vir Namibië in omdat dit nou deel kan wees van “die wêreld se grootste verbruikersmag met ’n koopkrag van tot USD 13 triljoen”. “Terselfdertyd sal Amerikaanse verbruikers voordeel trek uit hul toegang tot Namibië se beesvleis wat van hoë gehalte is, asook hormoon- en antibiotikavry is, en van vrylopende, grasgevoerde beeste af kom.”MEATCO ’N LANDBOUREUSMnr. Ronald Kubas, die Meatco-raad se ondervoorsitter, het gesê Namibië se lewendehawesektor is jaarliks sowat N$3,9 miljard werd en Meatco se aandeel daarin is soveel as 60%. “Meatco kon daarin slaag om produsentepryse te stabiliseer en betaal mededingende pryse as dit vergelyk word met ander streek- en internasionale beesproduserende lande soos Botswana, Brasilië en Argentinië,” het hy gesê. “Tydens die verwoestende 2019-droogte het ons produsente N$7 meer per kg betaal as wat in Suid-Afrika betaal is,” het hy gesê. Hy sê verlede jaar het Meatco se Windhoek-fabriek teen 120% van sy kapasiteit gewerk en altesaam 115 000 beeste geslag en verwerk. “In totaal het ons ook meer as N$1,1 miljard se direkte betalings aan produsente gemaak,” het Kubas gesê. Hy het bygevoeg Meatco onderneem om marktoegang vir produsente noord van die veterinêre kordonheining te ontsluit en werk hieraan sal reeds voor Mei vanjaar begin. – elvira@repulikein.com.na

Namibiese beesvleis kry ‘groenkaart’

Kommentaar

Republikein 2025-12-16

Meld asseblief aan om kommentaar te lewer

Namibiese beesvleis kry ‘groenkaart’

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.