Namibiese argitek wen groot toekenning

Francoise Steynberg - Die bekende Namibiese argitek me. Nina Maritz is een van die wenners van die gesogte internasionale toekenning vir volhoubare argitektuur. Maritz, wat bekend is vir haar omgewingsvriendelike ontwerpe, gaan op 14 Mei haar toekenning tydens 'n glansgeleentheid by die Cité de l'Architecture in Parys, Frankryk, ontvang. Daar gaan sy tydens die driedaagse simposium skouers met die wêreld se beste argitekte skuur, soos onder andere wenners van die Pritzker-argitektuurprys, wat beskryf word as die Nobelprys vir argitekte. Die tema vir vanjaar se geleentheid is “Argitektuur vir burgerlike bemagtiging”, en die Franse minister van kultuur gaan tydens die toekenningseremonie ook teenwoordig wees. “Ek het glad nie geweet 'n vorige wenner het my vir die toekenning genomineer nie. Ek was ná Kersfees van die plaas af op pad terug Windhoek toe, toe ek die oproep met die goeie nuus ontvang,” het Maritz aan Republikein vertel.“Ek was 25 jaar gelede in Parys en sien uit na die geleentheid wat by die Cité de l'Architecture aangebied word en glo 'n pragtige uitsig op die Eiffeltoring het.” Maritz is die vierde wenner uit Afrika naas argitekte uit Suid-Afrika en Burkino Faso, wat ook al met die prys weggestap het. Die toekenning erken vyf argitekte wêreldwyd wat beide die beginsels van volhoubare ontwikkeling en deelnemende argiteksbenadering tot die behoeftes van die samelewing deel. “Die kriteria behels konsepte van bewaring, maar ook gemeenskapsontwikkeling. Dit gaan nie oor een spesifieke projek nie, maar oor die werk wat jy in die tyd gedoen het,” verduidelik Maritz. UNIEKE ONTWERPEDie internasionale toekenning vir volhoubare argitektuur is in 2006 deur die argitek prof. Jana Revedin gestig in vennootskap met die Cité de l'Architecture et du Patrimoine en sy lidinstellings van die internasionale wetenskaplike komitee. Sedert 2010 is die Verenigde Nasies se agentskap vir Onderwys, Wetenskap en Kultuur (Unesco) die beskermheer hiervan. Die direkteur-generaal van kultuur van Unesco en die president van Cité de l'Architecture et du Patrimoine gaan ook by die seremonie teenwoordig wees. Maritz se unieke ontwerpe word in alle uithoeke van Namibië gesien, soos onder meer die Habitat Hulpbronne- en Ontwikkelingsentrum in die hoofstad, die Twyfelfontein-besoekersentrum, die uitkykpunt van die Visriviercanyon, die ministerie van finansies se kantore op Keetmanshoop, die landdroshof op Okakarara in die Otjozondjupastreek, asook verskeie landelike skole. Sy het ook verskeie lodges ontwerp soos onder meer Kalahari Game Lodge, Ongava se Andersson's Camp en Taleni Etosha Village. Haar nuutste projek is die Shipwreck Lodge in die Skedelkus Nasionale Park, sowat 68 km noord van Möwebaai. Dit is 'n unieke ekologies-vriendelike ontwerp wat daarop geskoei is dat al die strukture van die lodge weer later verwyder kan word om geen konstruksievoetspoor in die sensitiewe woestynomgewing agter te laat nie.Shipwreck Lodge se hoofgebou en 10 houtchalets met abstrakte skeepswrakselemente is op die duine op die suidelike oewer van die Hoarusibrivier geleë met groot vensters wat op die see uitkyk. Die ontwerp spruit uit die skeepswrakke aan die Skedelkus en die oorlewendes wat moes skuiling soek teen die ongenaakbare natuurelemente van die woestyn. Shipwreck Lodge maak in Junie sy deure vir gaste oop.

Namibiese argitek wen groot toekenning

Kommentaar

Republikein 2025-05-06

Meld asseblief aan om kommentaar te lewer

Namibiese argitek wen groot toekenning

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie