Namibië wil 170 olifante verkoop

Ellanie SmitNamibië het 170 olifante te koop geadverteer in reaksie op die droogte, 'n toename in hul getalle, tesame met groeiende mens-dier-konflik. Dié olifante is van kommersiële boerderygebiede by Omatjete en Kamanjab, asook van die Grootfontein-Kavango- en die Grootfontein-Tsumkwe-gebiede.Dit is volgens 'n advertensie wat verlede week in plaaslike media deur die ministerie van die omgewing, bosbou en toerisme geplaas is. 'n Aanbod kan gemaak word om die olifante in hul onderskeie familiegroepe aan te koop. Belanghebbers moet 'n geskrewe aanbod aan die ministerie rig waarin hul die prys per individuele dier aandui.Die ministerie het gesê die diere sal aan enigeen binne Namibië of elders verkoop word wat aan die streng kriteria voldoen, wat insluit dat kwarantyngeriewe beskikbaar is, asook 'n sertifikaat vir 'n wildwerende heining vir die eiendom waar die olifante aangehou gaan word. “Die tender is vir lewende diere, nie trofeejag nie. Die geleentheid is nie net vir internasionale bieërs nie, plaaslike belanghebbers kan ook tender, het die ministerie se woordvoerder, mnr. Romeo Muyunda, gesê.BUITELANDSE KOPERSVir uitvoerdoeleindes moet aan die vereistes van die Konvensie vir die Handel in Bedreigde Spesies (Cites) voldoen word, het die ministerie gesê. Buitelandse kopers moet kan bewys dat bewaringsowerhede in hul onderskeie lande hulle sal toelaat om die olifante in te voer. Aansoeke om die olifante te koop moet teen 29 Januarie 2021 ingehandig word en suksesvolle kopers sal die koste moet dra om die olifante te vang en te vervoer. 'n Olifant kan ongeveer 6 000 kg weeg. BEVOLKINGSGROEIDie ministerie het onlangs gesê Namibië se olifantbevolking het oor die afgelope drie dekades toegeneem, terwyl die meeste olifantbevolkings in Afrikalande 'n afname oor dieselfde tydperk ervaar het.Namibië het na raming tussen 23 663 en 24 091 olifante, met 'n geskatte bevolkingsgroei van sowat 5,36%.Nie net wedywer mense en olifante vir dieselfde water, grond en ruimte nie, maar is stroping van olifanttande ook 'n beduidende bedreiging. BEWARINGSPROGRAMMEDie omgewingsminister, mnr. Pohamba Shifeta, het onlangs gesê daar is 'n beperking op hoeveel invloed Namibië vanaf die buiteland oor die gebruik van sy natuurlike hulpbronne kan aanvaar – veral as dit by olifante kom.Hy sê die waarde wat die land uit die handel met ivoor kan genereer, word ernstig belemmer deur diereregtegroepe wat besluitneming by Cites beïnvloed en so Namibië se bewaringsprogramme ondermyn. Tydens die 18de Cites-vergadering, wat verlede jaar in Switzerland aangebied is, het Namibië, tesame met Botswana, Suid-Afrika en Zimbabwe, 'n voorstel gemaak dat hulle toegelaat word om opgebergde ivoor te verkoop. Die voorstel is verwerp.– ellanie@namibiansun.com

Namibië wil 170 olifante verkoop

Kommentaar

Republikein 2025-12-18

Meld asseblief aan om kommentaar te lewer

Namibië wil 170 olifante verkoop

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.