Namibië staak saam in groen protes

Francoise Steynberg - Namibiese skoolkinders, studente en omgewingsbewustes het die afgelope Vrydag in Windhoek se strate opgeruk as deel van die Fridays for Future School Strike, ’n wêreldwye bewusmakingsveldtog oor klimaatsverandering.Hulle was deel van verskeie ander optogte wat Vrydag soos ’n groen protesgolf oor die aarde gespoel het.Dié internasionale optrede was gemik op wêreldleiers wat vir die Verenigde Nasies (VN) in New York byeen is.Die boodskap aan politici is “doen jul werk en keer klimaatsverandering”.Greta Thunberg, die 16-jarige Sweedse omgewingsaktivis wat die betogings geïnspireer het, was aan die voorpunt van ’n optog na die VN-gebou in New York.Namibiërs wat aan die optog deelgeneem het, het ’n petisie aan owerhede by die ministerie van die omgewing en toerisme oorhandig om te sê hulle is bekommerd dat die land se nasionale strategie oor klimaatsverandering van 2011 en die aksieplan vir 2013 swak toegepas word.Die ministerie van die omgewing en toerisme het op sy Facebook-blad bevestig die waarnemende omgewingskommissaris het die petisie ontvang, waarin strenger maatreëls teen klimaatverwante kwessies geëis word.“Ons het die petisie met vreugde ontvang en ons is opgewonde om te sien dat jong mense leiding neem in omgewings- en klimaatsveranderingskwessies, wat gewoonlik as vervelig en onbelangrik geag word,” het die ministerie gesê."Ons is toegewy daaraan om die groep se bekommernisse te oorweeg en sal op ’n geskikte tyd reageer.”Die ministerie het die groep geluk gewens en soortgelyke inisiatiewe aangemoedig, asook meer betrokkenheid by omgewingskwessies.President Hage Geingob gaan vandag Namibië se vyfjaar- klimaataksieplan by die VN se algemene vergadering in New York oorhandig.Thunberg het Donderdag die Amerikaanse kongres toegespreek en gesê sy kom nie na hulle met ’n voorbereide toespraak nie – sy dien eerder ’n VN-verslag oor aardverhitting in as haar “toespraak”, “sodat julle nie na my hoef te luister nie, maar na die wetenskaplikes”.Thunberg, wat vir die Nobelprys vir vrede benoem is, was tot dusver met haar besoek aan Amerika bitter krities oor dié land se gebrekkige benadering tot aardverhitting.BETOGINGS ELDERSDie Australiese uitsaaidiens ABC het gesê sowat 180 000 mense het daar aan optogte deelgeneem. Die saamtrekke was baie kleurryk en vlae is saam met plakkate rondgeswaai. Musiek was aan die orde van die dag.“Ons is moeg mooi gevra,” het ’n plakkaat in Brisbane gelui.In Londen was die plakkaatwoorde “Ons mis ons lesse om julle een te leer” baie gewild onder leerlinge. Groot betogings het ook in Ierland en Skotland plaasgevind.In die Duitse hoofstad, Berlyn, was die saamtrekpunt van betogers die beroemde Brandenburg-poort.Thunberg het later gesê ’n Duitse eko-organisasie het gesê 1,4 miljoen mense het in dié land aan die optogte deelgeneem.Op die Solomon-eilande in die Stille Oseaan het kinders op die strand in grasrompies betoog.Altesaam 200 jongmense het die gebou van die minister van omgewingsake in Thailand bestorm en gemaak of hulle op die trappe sterf.Sowat 500 aktiviste het in Kenia deur die hoofstad, Nairobi, gestap en daarop aangedring dat die planne vir ’n nuwe steenkoolkragstasie laat vaar word.In Kolkata, Indië, het leerlinge strooibiljette by bedrywige bushaltes uitgedeel wat lui: “Hierdie is die enigste planeet wat ons het.” - Bykomende bronne: Netwerk24/Reutersfrancoise@republikein.com.na

Namibië staak saam in groen protes

Kommentaar

Republikein 2026-01-20

Meld asseblief aan om kommentaar te lewer

Namibië staak saam in groen protes

Kommentaar

Republikein 2026-01-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.