Namibië se tannie Ans laat rekord spat

Henriette Lamprecht - Agter die sensasionale wêreldrekord van die Suid-Afrikaanse naelloper wat Sondag ’n goue medalje by die Olimpiese Spele in Rio de Janeiro losgenael het, staan ’n ouma met Namibiese wortels. Die 74-jarige me. Ans Botha, beter bekend as tannie Ans aan honderde Namibiese atlete wat onder haar wakende oog geoefen het, is die afrigter van die 24-jarige Wayde van Niekerk wat ’n wêreldrekord van 43.02 sek. in die 400 meter aangeteken het. Tannie Ans, ’n nooi Potgieter en Dorslandtrekker, was ook die afrigter van Namibië se Frank Fredericks wat ’n wêreldkampioen en viermalige medaljewenner by die Olimpiese Spele was. Ook die Namibiese naelloper, Gerhard Barnard, wat Springbokkleure verwerf het, is deur tannie Ans afgerig.Tannie Ans se seun, Wenzel, het uit Oudtshoorn in Suid-Afrika vertel sy ma het op Tsumeb skoolgegaan, met die gesin wat later in Windhoek gewoon het. In 1989 het die Bothas na Bloemfontein verhuis.Volgens Wenzel was een van sy ma se trotste oomblikke toe Fredericks tydens die Wêreldkampioenskappe in Beijing verlede jaar die goue medalje aan Van Niekerk oorhandig het.Sy ma was op haar dae ook ’n atleet, terwyl Wenzel en sy suster, Herma, wat ’n onderwyser by WHS is, ook atlete was. Hulle het egter nie by ma Ans geoefen nie. Hy skryf sy ma se slag met atlete toe aan die feit dat sy ’n “ongelooflike aanvoeling vir ’n atleet se bioritmes het”.“Sy weet hoe om hom voor te berei vir die groot dag.“ Sy ken elke atleet se tekortkominge en het ’n baie goeie oog vir sy styl en waar iets skort.”Met verwysing na Van Niekerk sê Wenzel sy het ’n unieke en spesifieke plan gehad waarvolgens hulle gewerk het. Tannie Ans is ’n ouma van vyf kleinkinders en vier agterkleinkinders van wie twee op Tsumeb woon. Volgens Wenzel is sy ma baie aktief. “Toe hulle in Germona in Noord-Italië gaan oefen het, was die stadion sowat 8 km ver van die plek waar hulle gebly het. My ma het elke dag met ’n fiets soontoe en terug gery. “Sy kla nie, sy gaan net aan!”Tydens die onderhoud met Republikein het Wenzel nog nie met sy ma gepraat ná Van Niekerk se wêreldrekord nie.“Die kontak is maar sleg en die lyne maar baie oorlaai.”Hy het egter ’n whatsapp-boodskap gedeel wat tannie Ans verlede Dinsdag aan die familie gestuur het.“Ek is oor halfuur op pad baan toe vir ons laaste oefening in voorbereiding van ’n droom vir Rio 2016! Kon die voorreg smaak om Wayde elke jaar sterker . . . geestelik en ligaamlik, te sien vorder en hoogtes en doelwitte te bereik! Ek was so geweldig bevoorreg om ’n atleet met sy gawes en talent te help voorberei om sy groot droom en ideaal te bereik! Wat nou gaan gebeur, is nie langer in my hande, maar wat hy met alles gaan doen en wat die Groot Afrigter bepaal!”

Namibië se tannie Ans laat rekord spat

Kommentaar

Republikein 2025-06-18

Meld asseblief aan om kommentaar te lewer

Namibië se tannie Ans laat rekord spat

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie