Namibië nou deel van AU-meganisme

Danksy pres. Hage Geingob is Namibië nou deel van die Afrika eweknie-hersieningsmeganisme (APRM).Die APRM is in 2003 deur die Afrika-unie (AU) aanvaar. Politieke ontleders het destyds gesê Namibië se weiering om 'n lid van die meganisme te word, was in solidariteit met Zimbabwe wat nie die pyp met enige hersiening sou rook nie.Tydens die Afrika-unie se spitsberaad in Addis Abeba het Geingob gesê dit is vir die land 'n eer om deel van die APRM te word.“Dié meganisme is op die aanvaarding van beleide, standaarde en praktyke gemik wat tot politieke stabiliteit, hoë ekonomiese groei, volhoubare ontwikkeling en versnelde ekonomiese integrasie moet lei. “Dit moet 'n sleutelrol speel ten Afrika in staat te stel om die edel aspirasies en ontwikkelingsdoelwitte van Agenda 2063 en die eerste tien-jaar-plan van implementering te verwesenlik. “Meganismes soos die APRM bied ons 'n geleentheid om ons prosesse, stelsels en instansies te ondersoek, ten einde tekortkominge asook sterk punte te identifiseer,” het Geingob gesê.Hy sê regerings het talle beleide aanvaar asook instrumente bekragtig en dat tasbare en verreikende resultate slegs deur die implementering van die APRM behaal kan word.“Die vrywillige aard van die APRM laat lidlande toe om openlik en realisties in 'n gemoedelike eweknie-tot-eweknie-stemming vordering met ontwikkeling te evalueer en te monitor,” het hy gesê.Ter verduideliking hoekom Namibië nie aanvanklik toe die meganisme tot stand gekom het lid daarvan geword het nie, het Geingob gesê Namibië en Botswana is destyds wêreldwyd as goeie voorbeelde van demokrasie in Afrika beskou.“Ons het besluit om nie by die APRM aan te sluit nie omdat ons nie as verwysingspunt gebruik wou word waarvolgens ons mede-Afrikalande gemeet sou word nie,” het Geingob bygevoeg.“Ons visie vir ons unie, naamlik 'n geïntegreerde, voorspoedige en vreedsame Afrika, aangedryf deur sy burgers en verteenwoordigend van 'n dinamiese mag in die globale arena, kan net verwesenlik word wanneer ons verenig is en saamtrek in die gees van Harambee. “Die voorspoed van ons onderskeie nasies is die voorspoed van die hele vasteland. “Daarom moet ons positiewe resultate behaal wat spruit uit gesonde staatsbestuurstrukture, beleide en programme wat daarop gemik is om armoede uit te wis, asook inklusiwiteit en volhoubare ekonomiese groei wat op die verhoging van die lewenstandaard van ons mense gefokus is.” Geingob sê hy is in sy persoonlike hoedanigheid verheug dat Namibië nou deel van die APRM is omdat hy, saam met mnr. Thabo Mbeki, voormalige president van Suid-Afrika, en professore Wiseman Nkuhlu en Adebayo Adedeji, in die aanvanklike fase by die opstel van die APRM betrokke was.

Namibië nou deel van AU-meganisme

Kommentaar

Republikein 2025-07-17

Meld asseblief aan om kommentaar te lewer

Namibië nou deel van AU-meganisme

Kommentaar

Republikein 2025-07-17

Meld asseblief aan om kommentaar te lewer

MELD AAN

Advertensie