Namibië kan help met hervestiging

Elvira Hattingh Namibië kan Angola help om sy kameelperde opnuut te vestig in gebiede waar hulle is tydens dié land se 40 jaar lange burgeroorlog verdryf is. Dit is die bevindinge van ‘n plaaslike navorser, mnr. Jackson Hamutenya, wat die afgelope Junie sy meestersgraad in natuurlike hulpbronnebestuur aan die Universiteit van Wetenskap en Tegnologie (Nust) voltooi het.In ‘n gesamentlike studie deur Nust, die Hoër Instituut vir Onderrigdienste in Angola (ISCED) en die Giraffe Conservation Foundation (GCF), het navorsers bevind habitatte in Angola is steeds gepas vir die langnekke. Dit omdat plante wat ‘n gunsteling in hul diëte is, steeds daar voorkom en plaaslike inwoners hulle graag daar sal wil hê. Die navorsers meen die risiko vir stroping van die kameelperde kan verminder word deur hulle fyn te monitor en plaaslike steun vir hul beskerming in te win.Inwoners van die Iona Nasionale Park is baie ontvanklik vir kameelperde en die toerismepotensiaal wat dit bied. Aangesien kameelperde nie met vee om weiding meeding nie en nie water benodig nie (diegene in Namibië verkry vog uit die blare van die plante wat hulle eet), is die konflik tussen mens en kameelperde onwaarskynlik,” sê Hamutenya.Die Angolese kameelperd het aanvanklik oraloor suid-sentraal-Angola voorgekom, insluitend in die suidelike Huila-provinsie in die Iona Nasionale park asook in gebiede wes van Cuito en die Cuando-Cubango-riviere.Die GCF beraam dat meer as 14 500 kameelperde in Namibië se nasionale parke en op beide kommunale en kommersiële grond voorkom, met sowat 425 van hulle wat in die noordweste van die land, of die Kaokoveld voorkom. Laasgenoemde bied ‘n soortgelyke habitat as byvoorbeeld die Iona Nasionale Park. “Gevolglik bied Namibië ‘n ideale bron van kameelperde vir moontlike hervestiging in Angola,” sê Hamutenya.“Kameelperde floreer in die Namibiese kant van die die Kavango-Zambezi-oorgrensbewaringsgebied (Kaza TFCA) en het ‘n ikoniese deel van die Kaokoveld asook die Skedelkus se landskappe geraak. Hier woon gemeenskappe vreedsaam saam met hulle. “Die herbekendstelling van kameelperde aan Angola uit ‘n gesonde Namibiese bevolking, sal ‘n wonderlike manier wees om oorgrens-bewaring te demonstreer,” het Hamutenya in Conservation Namibia se weeklikse nuusbrief geskryf. “Noudat Angola weer vrede geniet, is dit tyd om die vreedsame kameelperd terug na sy vorige woonplek te bring.”Die navorser sê tydens Angola se oorlog is nasionale parke verlate gelaat en is geen beskerming vir die natuurlewe gebied nie. Toe die burgeroorlog uiteindelik in 2002 eindig, het die Angolese regering sy verbintenis tot bewaring hernu. “As sy suidelike buurland, is Namibië gereed om Angola se pragtige wildlewe in hul glorie te herstel.” - elvira@republikein.com.na

Namibië kan help met hervestiging

Kommentaar

Republikein 2026-02-02

Meld asseblief aan om kommentaar te lewer

Namibië kan help met hervestiging

Kommentaar

Republikein 2026-02-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.