Namibië beplan groen waterstof vir kunsmis

Augetto Graig President Hage Geingob het Woensdag die Afrika-vasteland ingelig van Namibië se plan om met vennote wêreldwyd en saam te werk “om ons wêreldgehalte hernubare energiebron vas te vang en te gebruik om groen waterstof te vervaardig. “Dié uitlatingvrye waterstof sal omskep word in ammoniak, wat ’n noodsaaklike bousteen vir verskeie kunsmisprodukte is.”Die staatshoof se virtuele voorlegging is as deel van die Africa Green Revolution Forum 2021 se beraad van presidente in Nairobi, Kenia gedoen. Geingob het aan sy eweknieë gesê: “Plaaslik vervaardigde kunsmis met nul uitlatings (emissions) kan gebruik word om ’n vrugbare geleentheid vir plaaslike en streekswye volhoubare ekonomiese ontwikkeling te skep. “Dit sal betekenisvol bydra tot die wêreld se pogings om koolstof uit die ekonomie te verminder, terwyl dit ook Afrika se ambisie versterk om hongersnood te laat verdwyn.“Hierdie nuwe skoon sintetiese brandstofbedrywe het die potensiaal om ons BBP te verdubbel, werk te skep vir duisende Namibiërs en baie belangrik, by te dra tot ’n skoner en meer volhoubare tuiste vir ons kinders en ons kinders se kinders. Die omgewing, hongerte en billikheid is op komplekse wyse verbind en moet tegelykertyd aangepak word,” sê Namibië se president.Geingob het die kans aangegryp om Namibië se prestasies in die stryd teen hongerte uit te lig. “Sedert onafhanklikwording, gegewe ons omvattende maatskaplike veiligheidsnetprogramme, is meer as 500 000 Namibiërs uit erge armoede opgehef,” het hy gesê. Oor sy eie inisiatief om die Voedselbank in Namibië te vestig, het die president gesê 42 081 mense baat daaruit. “Gedurende dié tyd was geen Namibiër aangemeld as ’n sterfgeval as gevolg van hongerte nie, ongeag een van die ergste droogtes wat die land in onlangse geskiedenis deur is,” sê hy.Die impak van Covid-19 op Namibië lei tot voorspellings dat armoede met 4,2% sal toeneem, weens verliese aan inkomste, sê die president, en dis hoekom die Voedselbank omskep word om kontantuitbetalings te doen, “as ’n eerste stap om ’n voorwaardelike basiese inkomstetoelaag te vestig,” sê hy.Geingob sê Namibië is ’n klein oop ekonomie, kwesbaar vir onafhanklike veranderlikes, insluitend klimaatsverandering en die ontwrigtende gevolge daarvan, sê hy. “Gevolglik moet Namibië oplossings verwant aan klimaatsverandering skep om in die geheel wanvoeding en ongelykheid te bekamp,” sê hy.Aanvullend tot die land se welvaartsprogramme, sê die president: “Namibië sal die insette van private strategiese belegging in die landbousektor bevorder en fasiliteer. Hierdie ambisie sal tot nasionale doelwitte vir voedselsekerheid en selfversorgendheid bydra. “Hierdie skema het potensiaal vir produksie van hoëwaarde-gewasse en kan bydra tot uitvoermarkvereistes, terwyl duisende werksgeleenthede geskep kan word,” het hy gesê. Hy sê Namibië se beplande groen en blou ekonomie is ambisieus en in pas met die Afrika Unie se kontinentale groen herstel aksieplan wat in Junie 2021 voorgestel is.– augetto@republikein.com.na

Namibië beplan groen waterstof vir kunsmis

Kommentaar

Republikein 2026-02-03

Meld asseblief aan om kommentaar te lewer

Namibië beplan groen waterstof vir kunsmis

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.