Namdeb: Eise vir taksvakansie
Die vakbond sê hy wil Namdeb se werksaamhede in die toekoms uitbrei.
Ogone Tlhage
Die Mynwerkersunie van Namibië (MUN) se suidelike tak doen 'n beroep op die regering om Namdeb vir vyf tot sewe jaar van belasting kwyt te skeld in 'n poging om te keer dat die myn sluit.
Diamantmynmaatskappye is verplig om 55% korporatiewe winsbelasting bykomend tot 'n 10%-tantième op ongeslypte diamante te betaal.
Volgens die jongste jaaroorsig van die Kamer van Mynwese in Namibië het Namdeb Holdings verlede jaar maatskappybelasting van N$1,571 miljard betaal.
Tantième vir die finansiële jaar het N$1,328 miljard beloop.
Die maatskappy het uitvoerheffings van N$141 miljoen betaal.
Namdeb Holdings se totale dividende vir 2018 was N$800 miljoen. Die regering besit 50% van die aandele in Namdeb Holdings en De Beers die res.
Die regering steun swaar op diamante se ekonomiese bydrae. Volgens die Bank of Namibia (BoN) se jongste ekonomiese vooruitskatting wat verlede week vrygestel is, gaan diamantmynbedrywighede vanjaar 'n verwagte N$17,4 miljard tot die geskatte bruto binnelandse produk (BBP) van sowat N$197,8 miljard teen heersende pryse bydra.
Die sektor se bydrae verlede jaar was sowat N$18,2 miljard.
Volgens die visesekretaris van die vakbond se suidelike tak, mnr. Hashondali Kakuti, sal die voorgestelde kwytskelding van belasting die volhoubaarheid van Namdeb se werksaamhede verseker.
Volgens die vakbond sal die kwytskelding die nodige kapitaaluitgawes vir Namdeb se mariene mynuitbreiding beskikbaar maak, wat die voortgesette bestaan van die myne en die skep van tussen 200 en 300 nuwe werksgeleenthede sal verseker.
“Gesprekke is met die Oranjemund-dorpsraad sowel as die ministeries van myne en finansies gevoer. Ons wil graag tussen drie en vyf jaar se belastingkwytskelding hê. Ons het kontant nodig wat ons in uitbreiding gaan belê. Daarsonder gaan ons kontant van die regering nodig hê,” het Kakuti gesê.
'WETTE VOORSIEN DAARVOOR'
Volgens hom word voorsiening vir die tydelike opheffing van belastingbetalings aan die regering in die minerale- en diamantwette gemaak.
Die ministerie van finansies is ook besig om Namdeb se finansiële verslae tot sover terug as 2011 te ontleed, het Kakuti gesê.
“Om die kwytskelding goedgekeur te kry, is die regering se goedkeuring nodig. In dié verband het ons met Swapo se sekretaris-generaal, me. Sophia Shaningwa, in gesprek getree. Word dit goedgekeur, kan dit tot tussen 200 en 300 nuwe werksgeleenthede lei. Ons doen dit ook vir die myne se volhoubaarheid. Dit hang van die regering af of Namdeb 'n lewe gaan hê of nie,” het Kakuti gesê.
Namdeb se woordvoerder, me. Shangelao Ndadi, het intussen gesê die maatskappy is voortdurend in gesprek met sy aandeelhouers oor die myn se toekoms.
Volgens haar verwelkom Namdeb die vakbond se versoek.
“Namdeb is in ernstige gesprek met al sy rolspelers oor die toekoms van werksaamhede. Hoewel ons in die stadium nie op spesifieke besonderhede kommentaar kan lewer nie kan ons wel bevestig ons verwelkom enige positiewe ingryping om 'n lewensvatbare toekoms vir ons werksaamhede te skep en die werksgeleenthede te beskerm,” het Ndadi gesê.
Dit is nie die eerste keer wat versoeke vir belastingkwytskelding gerig is om Namdeb se werksaamhede 'n hupstoot te gee nie. Soortgelyke versoeke is in 2009 ná die wêreld- ekonomiese krisis gemaak toe Namdeb 600 werksgeleenthede afgeskaf het, asook in 2013.
Die ministerie van finansies se woordvoerder, mnr. Tonateni Shidhudhu, het nie op 'n e-pos gereageer wat op die unie se versoek gestuur is nie. [email protected]
Die Mynwerkersunie van Namibië (MUN) se suidelike tak doen 'n beroep op die regering om Namdeb vir vyf tot sewe jaar van belasting kwyt te skeld in 'n poging om te keer dat die myn sluit.
Diamantmynmaatskappye is verplig om 55% korporatiewe winsbelasting bykomend tot 'n 10%-tantième op ongeslypte diamante te betaal.
Volgens die jongste jaaroorsig van die Kamer van Mynwese in Namibië het Namdeb Holdings verlede jaar maatskappybelasting van N$1,571 miljard betaal.
Tantième vir die finansiële jaar het N$1,328 miljard beloop.
Die maatskappy het uitvoerheffings van N$141 miljoen betaal.
Namdeb Holdings se totale dividende vir 2018 was N$800 miljoen. Die regering besit 50% van die aandele in Namdeb Holdings en De Beers die res.
Die regering steun swaar op diamante se ekonomiese bydrae. Volgens die Bank of Namibia (BoN) se jongste ekonomiese vooruitskatting wat verlede week vrygestel is, gaan diamantmynbedrywighede vanjaar 'n verwagte N$17,4 miljard tot die geskatte bruto binnelandse produk (BBP) van sowat N$197,8 miljard teen heersende pryse bydra.
Die sektor se bydrae verlede jaar was sowat N$18,2 miljard.
Volgens die visesekretaris van die vakbond se suidelike tak, mnr. Hashondali Kakuti, sal die voorgestelde kwytskelding van belasting die volhoubaarheid van Namdeb se werksaamhede verseker.
Volgens die vakbond sal die kwytskelding die nodige kapitaaluitgawes vir Namdeb se mariene mynuitbreiding beskikbaar maak, wat die voortgesette bestaan van die myne en die skep van tussen 200 en 300 nuwe werksgeleenthede sal verseker.
“Gesprekke is met die Oranjemund-dorpsraad sowel as die ministeries van myne en finansies gevoer. Ons wil graag tussen drie en vyf jaar se belastingkwytskelding hê. Ons het kontant nodig wat ons in uitbreiding gaan belê. Daarsonder gaan ons kontant van die regering nodig hê,” het Kakuti gesê.
'WETTE VOORSIEN DAARVOOR'
Volgens hom word voorsiening vir die tydelike opheffing van belastingbetalings aan die regering in die minerale- en diamantwette gemaak.
Die ministerie van finansies is ook besig om Namdeb se finansiële verslae tot sover terug as 2011 te ontleed, het Kakuti gesê.
“Om die kwytskelding goedgekeur te kry, is die regering se goedkeuring nodig. In dié verband het ons met Swapo se sekretaris-generaal, me. Sophia Shaningwa, in gesprek getree. Word dit goedgekeur, kan dit tot tussen 200 en 300 nuwe werksgeleenthede lei. Ons doen dit ook vir die myne se volhoubaarheid. Dit hang van die regering af of Namdeb 'n lewe gaan hê of nie,” het Kakuti gesê.
Namdeb se woordvoerder, me. Shangelao Ndadi, het intussen gesê die maatskappy is voortdurend in gesprek met sy aandeelhouers oor die myn se toekoms.
Volgens haar verwelkom Namdeb die vakbond se versoek.
“Namdeb is in ernstige gesprek met al sy rolspelers oor die toekoms van werksaamhede. Hoewel ons in die stadium nie op spesifieke besonderhede kommentaar kan lewer nie kan ons wel bevestig ons verwelkom enige positiewe ingryping om 'n lewensvatbare toekoms vir ons werksaamhede te skep en die werksgeleenthede te beskerm,” het Ndadi gesê.
Dit is nie die eerste keer wat versoeke vir belastingkwytskelding gerig is om Namdeb se werksaamhede 'n hupstoot te gee nie. Soortgelyke versoeke is in 2009 ná die wêreld- ekonomiese krisis gemaak toe Namdeb 600 werksgeleenthede afgeskaf het, asook in 2013.
Die ministerie van finansies se woordvoerder, mnr. Tonateni Shidhudhu, het nie op 'n e-pos gereageer wat op die unie se versoek gestuur is nie. [email protected]
Kommentaar
Republikein
Geen kommentaar is op hierdie artikel gelaat nie