Nama-kultuur word herdenk

Die Nama kultuurgroep "Suide maak Vrede" het onlangs sy vyfde bestaansjaar gevier. Hoewel hulle uit die Suide kom, verg hul werksomstandighede dat hulle almal tans in Windhoek woon. Hoewel daar tradisioneel sowat 13 verskillende Nama-stamme is, word slegs drie stamme in hierdie groep verteenwoordig. Hulle tree graag op versoek by geleenthede op en het vir uitvoerings reeds tot in Zimbabwe en Botswana gereis. Tydens hul herdenkingsnaweek is ? skoonheidskompetisie die Vrydagaand gehou waartydens Mej. Suide Maak Vrede gekies is. Die Saterdag was gekenmerk deur die dramatisering van verskillende tradisionele Namagebruike. Heelwat tradisionele disse en drank is voorgesit en deelnemers het vrolik op tradisionele deuntjies gedans. Die doel van hierdie vieringe is grootliks om die jeug daarvan te leer en sodoende te verhoed dat hul kultuur uitsterf.