Nakale se spoortjies loop dood by pad

Augetto Graig – Die vermiste driejarige Mandela Nakale van Lüderitz se spoor is gevolg tot langs die hoofpad na die lughawe, tussen Area 7 en die NHE-nedersetting, en daar raak dit weg. Hoofinspekteur Theodore Kotungondo het gister uitgebrei oor die omvattende soektog om die seuntjie te vind. Vandat Mandela gister 'n week gelede vermis geraak het, is die kusdorpie behoorlik omgekeer. Polisiebeamptes, spesiale reserwedienslede en talle gemeenskaplede kon laas week, met die hulp van 'n polisiehelikopter, steeds die kleuter nie kry nie. Gisteroggend is polisiehonde ingespan.Kotungondo sê hulle het gister in die oggendure deur Area 7 die spoor gevolg, al met die pad waarlangs die groepie kinders van die gebied met Mandela en 'n vierjarige vriendin gespeel het, tot waar hy laas gesien is. Nadat die honde 'n ruskans gekry het, is weer van voor af begin by die huis waar Mandela oornag het. Teen gisternamiddag het die spoor hulle weer al die pad tot die plek langs die grootpad gelei. “Die polisiehonde het hul werk gedoen. Almal is baie beïndruk met hulle. Eerste in Area 7 waar die seun verlore geraak het, kon hulle sy spoor volg tot waar hy laas gesien is. Later weer vanaf die huis waar hy oornag het, kon die honde ons lei tot by dieselfde punt langs die pad waar hy laas gesien is. Dit dui aan hy het heel moontlik Area 7 verlaat. “Die honde is steeds op die toneel en gaan na enige moontlike plek waar gesoek kan word. Selfs sy tannie se huis, waar hy glo soms opgepas is as die ouers moet werk, het hulle deursoek, maar niks is gekry nie. Die honde het goed gedoen, maar ons het steeds geen geluk met die opsporing van die seun nie,” het hy gesê. “'n Mens wonder wat daar langs die pad kon gebeur het. Kon iemand hom opgetel het? Ons gaan terug na die tekenbord en kyk wat is ons pad van hier af. Ons kan nog geen moontlikheid uitskakel nie en ons moet kyk na almal voordat ons dalk 'n ontvoering kan uitskakel,” sê hy. Die honde het in Lüderitz oornag en vanoggend sal hulle die soektog voortsit, sê hy. Enigiemand met inligting word versoek om die ouers by 081 695 4974 of 081 219 3691, of hoofinsp. Kotungondo by 081 355 1422, of AO Kenahama by 081 3176 432 te kontak.

Nakale se spoortjies loop dood by pad

Kommentaar

Republikein 2026-05-06

Meld asseblief aan om kommentaar te lewer

Nakale se spoortjies loop dood by pad

Kommentaar

Republikein 2026-05-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.