'n Vriend vir almal

Een van die stigterslede van die Windhoek Afvalgilde (WAG) en iemand wat op senior vlak in die motorbedryf van Namibië 'n reuse-rol gespeel het, mnr. Gawie Koekemoer, is Vrydag aan Covid-19 in die hoofstad oorlede.'n Vriend vir almal en altyd bereid om die ekstra myl te stap. Dit was Gawie Koekemoer vir almal met wie sy pad gekruis het, skryf Deon Eysele, oudjoernalis en 'n jarelange vriend van hom.“Vir die man op straat is hy nou dalk net deel van die kommerwekkende hoë sterftesyfers as gevolg van die Covid-19-pandemie waardeur Namibië op die oomblik worstel, maar vir die besonderse groot vriendekring en familie wat hy agterlaat, was hy 'n lewenstonik en ligstraal. Meestal in 'n goeie bui, saggeaard met 'n unieke sin vir humor was hy baie gewild en bemind,” skryf Eysele in 'n huldeblyk.Gabba, soos wat sy vriende hom ook geken het, het 'n oop hart en hand vir mense gehad. Hy en sy vrou Tilla was entoesiastiese lede van 'n jarelange toergroep van familie en nabyvriende wat minstens een keer per jaar die uithoeke van Namibië gaan verken het. Dis hier waar sy liefde vir fotografie en sy versameling van duisende foto's ook aangewakker is.Gawie en Tilla was by uitstek sosiale wesens wat nooit 'n geleentheid sou laat verbygaan om hul groot vriendekring te onthaal of te vermaak nie.Wat dit betref, was hy een van die stigterslede van die Windhoek Afvalgilde (WAG) wat een keer per maand byeengekom het om smaaklike afvalgeregte voor te berei en dan daaraan te smul.Gawie sal onthou word vir die rol wat hy op senior vlak in die motorbedryf van Namibië gespeel het. Hy was ook bekend as een van Wanderers-rugbyklub se kranige ondersteuners met woord en daad oor vele jare, nadat hy in sy jonger dae ’n stut vir dié klubspan was.“Ons eer jou nagedagtes, ou Gabba, tot ons weer anderkant die rivier ontmoet.”

'n Vriend vir almal

Kommentaar

Republikein 2025-12-16

Meld asseblief aan om kommentaar te lewer

'n Vriend vir almal

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.