’n Tas wat netjies pas

Octavia Tsibes en Chrismarie Siebert - Dit is elke skoolkind se lot om swaar boeke van klas tot klas op sy of haar rug rond te karwei, maar hoe gemaak om dit só te doen dat hul gesondheid en ontwikkeling nie skade ly nie?

Eerstens moet ’n tas met die regte ontwerp gekies word. ’n Tas met twee breë, opgestopte bande en rugkant is ideaal.

Tweedens is dit belangrik dat die kind ‘n gesonde liggaamsgewig en aktiewe lewenstyl handhaaf om spierspanning en -ooreising te voorkom.

‘n Te swaar tas kan fisieke probleme, soos rug- en skouerpyn veroorsaak.

Fisioterapeute bevestig dit.

“Die probleem van skooltasse met wieletjies is dat dit oor ‘n lang tydperk skouerpyn kan veroorsaak, aangesien die tas gewoonlik met een hand gesleep word. Dit word ook by trappe opgedra en oor klipperige grond gesleep,” sê mnr. Munache Chinyama, ’n fisioterapeut van Windhoek.

Ander fisieke probleme kan ook ontstaan as gevolg van die verkeerde soort tas, sê hy.

Afgesien van skouer- en rugpyn kan skoliose (verkromming van die ruggraat) ontwikkel, asook algemene moegheid, wat leerlinge se konsentrasie negatief kan beïnvloed.

Me. Elodie Boshoff, nog ’n Windhoekse fisioterapeut, stem hiermee saam.

“Skole in Namibië het ongelukkig nie sluitkassies nie. Dit is iets wat oorweeg moet word,” sê sy.

Volgens haar moet onderwysers bewus gemaak word van die nadele van té swaar skooltasse.

Verder moet ook by die skool se daaglikse rooster gehou word sodat leerlinge slegs die betrokke dag se handboeke hoef saam te neem.

Kinders loop die gevaar om permanente skade aan hul ruggraat op te doen, as gevolg van tasse wat verkeerd gepak is en swak ontwerp is.

Om vir 12 jaar lank ’n swaargelaaide tas te dra, kan rugprobleme in volwassenheid veroorsaak.

Baie tasse is modieus, maar maak nie noodwendig voorsiening vir eweredige gewigsverspreiding nie en kan pyn tot gevolg hê.

Volg die wenke in die infografiek hiernaas vir ’n tas wat netjies pas.