'n Sinkplaatpad is nie 'n teerpad nie
Liewe Gerda,
Wou nie weer so gou skryf nie, maar toe sien ek 'n onderhoud in Rooi Rose met Charlize waar sy so mooi praat oor haar kinders en oor jou en watter goeie ouma jy is. Dis darem 'n groot kompliment vir jou. Ek wou al lankal vra of Charlize vriende is met Harry en Meghan. Ek het nie vir Charlize by die troue gesien nie, maar dalk het sy agter gesit. Mooi meisie, dié Meghan, maar haar familie is darem maar vir jou common, die arme ding. En dié dat haar pa nou sommer krediet vir alles wil vat, want volgens hom is dit hy wat haar die duchess gemaak het wat sy is. Haar ma was vir my so statig en ordentlik in die kerk, sies tog, vir my heel verlore so op haar eie op die kerkbank en foto's gelyk.
Sy is mos ook 'n enkelmoeder soos Fonteine, een van my ma se susters se een dogter. Haar ma-hulle het vir jare op Kombat gebly en was maar altyd iewers by 'n myn. Nou, Fonteine is glo tydens 'n Oujaarsbraai by die Otavi-fonteine gemaak – vandaar die naam. Arme Fonteine, Klaradyn se stiefpa sê altyd al het sy so 'n grênd naam, moes my suster die arme meisiekind ook maar van babatyd af mooi aantrek, anders het niemand haar raakgesien nie. So 'n valetjie, lyk soos haar pa wat nou die pad gevat het iewers na 'n olieboor op die diepsee. Toe hy nou kortpad vat see toe, toe sit arme Fonteine vingeralleen met drie orrelpypies en dít met 'n salaris by die China Shop op Tsumeb. Dis nou 'n storie vir 'n volgende brief, die Chinese wat nou al tot Duitse bakkerye in ons land oorneem, verbeel jou, brötchens wat verdomp lyk soos 'n fortune cookie.
Elk geval, toe kry Fonteine se ma haar so jammer, want die arme kind lyk toe nou nóg valer as gewoonlik, jy sukkel om uit te maak is dit 'n man of 'n muis. Bak pannekoek vir 'n vale vir verkoop voor die Spar en stuur pakke vol koeksisters saam met haar man werk toe om te loop smous. Ken jy vir Hannon, die Glam Guru? Mooie man met die mooiste geaardheid ook, voorkop so glad soos Swakop se see ná Oosweer.
Maar hy stoot nie in ons skrum nie, só sê Klaradyn se pa. Hy sê Hannon se pa moes hom doerietyd army toe gestuur het, dan het hy nie nou soos 'n balletdanser gelyk wat sy grimering en leotard aan vergeet het nie. Klaradyn se pa is soms so ongevoelig, nog van die generasie wat dink die army is die oplossing vir alles. Elk geval, toe het Fonteine nou uiteindelik 'n kaartjie vir Hannon se make over by die klub. Ek was self nie daar nie, maar blykbaar het Hannon sy hande vol gehad om iets met die vrouens by die myn se damestee reg te kry. Dis nou met hul hare en grimering en klere en so aan. Klaradyn se pa sê dit is omdat dit moeilik is om 'n sinkplaatpad sommer net so in 'n teerpad of 'n highway te verander.
Fonteine se ma vertel Hannon het vreeslik met die vrouens geraas wat so home perm. Volgens hom is dit groter sonde as om vir die Blou Bulle te skree. En blou eye shadow is ook lankal uit die mode, selfs al dra jy dit by jou Blou Bul-sweetpak. Ai tog, en die Lady Di-hofskoene, Hannon sê die vrou is jare terug al deur die tonnel en in die graf, los haar en haar skoene net daar in Parys (nie die een in die Vrystaat nie). Blykbaar is bum cream ook nie die oplossing vir plooie onder die oë nie.
Fonteine se ma het foto's van die make over gestuur en die kind lyk heel skaflik, jy sal haar darem nou kan saamvat kerk toe. Klaradyn se pa sê sy kan nou actually saam met ons by die Spur gaan eet. Volgens haar ma is Fonteine nou soggens vroeg op om haar hare te straight en make-up op te sit. Glo ook 'n hele klerekas gaan lay buy by die boetiek. Fonteine se ma sê sy hoop haar skoonseun sien dit en besluit om die boor op see te los en eerder vir sy vrou te gaan.
Ek moet vir Klaradyn by haar kleedrepetisie gaan aflaai, ek skryf later weer.
Groete,
Klaradyn se ma
Wou nie weer so gou skryf nie, maar toe sien ek 'n onderhoud in Rooi Rose met Charlize waar sy so mooi praat oor haar kinders en oor jou en watter goeie ouma jy is. Dis darem 'n groot kompliment vir jou. Ek wou al lankal vra of Charlize vriende is met Harry en Meghan. Ek het nie vir Charlize by die troue gesien nie, maar dalk het sy agter gesit. Mooi meisie, dié Meghan, maar haar familie is darem maar vir jou common, die arme ding. En dié dat haar pa nou sommer krediet vir alles wil vat, want volgens hom is dit hy wat haar die duchess gemaak het wat sy is. Haar ma was vir my so statig en ordentlik in die kerk, sies tog, vir my heel verlore so op haar eie op die kerkbank en foto's gelyk.
Sy is mos ook 'n enkelmoeder soos Fonteine, een van my ma se susters se een dogter. Haar ma-hulle het vir jare op Kombat gebly en was maar altyd iewers by 'n myn. Nou, Fonteine is glo tydens 'n Oujaarsbraai by die Otavi-fonteine gemaak – vandaar die naam. Arme Fonteine, Klaradyn se stiefpa sê altyd al het sy so 'n grênd naam, moes my suster die arme meisiekind ook maar van babatyd af mooi aantrek, anders het niemand haar raakgesien nie. So 'n valetjie, lyk soos haar pa wat nou die pad gevat het iewers na 'n olieboor op die diepsee. Toe hy nou kortpad vat see toe, toe sit arme Fonteine vingeralleen met drie orrelpypies en dít met 'n salaris by die China Shop op Tsumeb. Dis nou 'n storie vir 'n volgende brief, die Chinese wat nou al tot Duitse bakkerye in ons land oorneem, verbeel jou, brötchens wat verdomp lyk soos 'n fortune cookie.
Elk geval, toe kry Fonteine se ma haar so jammer, want die arme kind lyk toe nou nóg valer as gewoonlik, jy sukkel om uit te maak is dit 'n man of 'n muis. Bak pannekoek vir 'n vale vir verkoop voor die Spar en stuur pakke vol koeksisters saam met haar man werk toe om te loop smous. Ken jy vir Hannon, die Glam Guru? Mooie man met die mooiste geaardheid ook, voorkop so glad soos Swakop se see ná Oosweer.
Maar hy stoot nie in ons skrum nie, só sê Klaradyn se pa. Hy sê Hannon se pa moes hom doerietyd army toe gestuur het, dan het hy nie nou soos 'n balletdanser gelyk wat sy grimering en leotard aan vergeet het nie. Klaradyn se pa is soms so ongevoelig, nog van die generasie wat dink die army is die oplossing vir alles. Elk geval, toe het Fonteine nou uiteindelik 'n kaartjie vir Hannon se make over by die klub. Ek was self nie daar nie, maar blykbaar het Hannon sy hande vol gehad om iets met die vrouens by die myn se damestee reg te kry. Dis nou met hul hare en grimering en klere en so aan. Klaradyn se pa sê dit is omdat dit moeilik is om 'n sinkplaatpad sommer net so in 'n teerpad of 'n highway te verander.
Fonteine se ma vertel Hannon het vreeslik met die vrouens geraas wat so home perm. Volgens hom is dit groter sonde as om vir die Blou Bulle te skree. En blou eye shadow is ook lankal uit die mode, selfs al dra jy dit by jou Blou Bul-sweetpak. Ai tog, en die Lady Di-hofskoene, Hannon sê die vrou is jare terug al deur die tonnel en in die graf, los haar en haar skoene net daar in Parys (nie die een in die Vrystaat nie). Blykbaar is bum cream ook nie die oplossing vir plooie onder die oë nie.
Fonteine se ma het foto's van die make over gestuur en die kind lyk heel skaflik, jy sal haar darem nou kan saamvat kerk toe. Klaradyn se pa sê sy kan nou actually saam met ons by die Spur gaan eet. Volgens haar ma is Fonteine nou soggens vroeg op om haar hare te straight en make-up op te sit. Glo ook 'n hele klerekas gaan lay buy by die boetiek. Fonteine se ma sê sy hoop haar skoonseun sien dit en besluit om die boor op see te los en eerder vir sy vrou te gaan.
Ek moet vir Klaradyn by haar kleedrepetisie gaan aflaai, ek skryf later weer.
Groete,
Klaradyn se ma
Kommentaar
Republikein
Geen kommentaar is op hierdie artikel gelaat nie