’n Ratse Jaguar is los in die Afrikabos

Ferdi de Vos

’n Jaguar wat grom in die ruie Afrika-bos?
Kan nie wees nie. Maar nee, dis g’n oom Schalk Lourens-mampoerstorie nie, dis ’n feit soos, wel, ’n koedoekoei.
Want sien, die jongste welp vanuit Solihull in Brittanje is nie meer volstrek ’n slinkse straatkat nie, maar besit nou ook stewige boskatgene. En hoewel hierdie kruising Jaguar-puriste in hul komkommertoebroodjies sal laat stik, is die telers in Whitley so opgewonde oor dié nuwe aankomeling dat hulle meen dit gaan die Coventry-kat se getalle plaaslik aanstonds verdubbel.
Dis die nuwe F-Pace, die eerste sportnutsryding met die grommende katkenteken sedert die maatskappy byna ’n eeu gelede deur sir Williams Lyons en William Walms­ley gestig is – en ook die eerste wat gerieflik in die Afrika-veld kan jag.
Die F-Pace (sy naam kom klaarblyklik van Lyons se omskrywing vir Jaguar – “grace, space and pace”) is egter nie teen hardebaard-Afrika-veterane soos sy groter Landie-stalgenote en Cruisers gemik nie.
Nee, sy naels is skerpgemaak om nuwerwetse weelde sportnutse, spesifiek die Porsche Macan, BMW X3/X4, Mercedes GLC/GLC-koepee, Audi Q5 en Range Rover Evoque te pak. Tog, grootte- en veral spasiegewys, is die X5/X6 en GLE/GLE-koepee-modelle ook hierdie kat se prooi.
Die F-Pace se agterkant, sy syinlate en die kenmerkende agterligte het besliste trekke van die F-Type-sportmotor, wyl die prominente, regop sierrooster, die forse aluminium-enjinkap, en slanke LED-hoofligte deur die C-X17-konsepmodel geïnspireer is.

veelsydig
Boonop is die sportnuts prakties en veelsydig met oorgenoeg plek vir vyf insittendes en hul bagasie. Tog, die volgrootte spaarwiel in Suid-Afrikaanse modelle maak die bagasieruim van 463 liter minder prakties en beïnvloed ook die pakruimte (1 740 liter).
Die uitleg van die kajuit met sy lekker hoë sitposisie en skulpvormige instrumentpaneel is tipies Jaguar – heel luuks en afgewerk met sagte leer en dubbele stikwerk sigbaar.
Danksy ’n stewige asafstand (2,8 m) is die beenruimte agter heel goed (Jaguar sê dis die beste in sy klas), maar ons hou die meeste van die gedagte dat jy jou sitplekke agter met elektriese verstelling kan bestel.
Die sitposisie agter is ’n raps hoër as die res gemaak, maar tog het ons gevind dat daar genoeg kopruimte agter is (ondanks die koepeedaklyn).
Op die instrumentpaneel is ’n groot raakskerm vanwaar jy jou nutsfunksies beheer. Ons het veral van die volskerm-funksie vir die satnavstelsel gehou. Iets wat wel gepla het, is die plasing van die vensterskakelaars hoog op die deurpaneel. Dit is nie intuïtief nie, en menige keer het ’n mens die deur se sluitknoppe (langs die handvatsel) gedruk wanneer jy die venster wil afrol.
Die F-Pace is op die F-Type se modulêre onderstel gebou en bestaan 80% uit aluminium. Dit help natuurlik om heelwat kilo’s af te skud.
Drie enjins is plaaslik te kry: ’n tweeliter-turbodiesel, ’n drieliter-turbodiesel en ’n drieliter-V6 met ’n drukaanjaer. ’n Agtgang outomatiese ratkas stuur die krag na die agterwiele, maar die blikbrein kan die krag tussen die asse wissel na gelang van jou vastrap en greep.
Op die pad het die tweeliter (die intreevlakmodel) heel gewillig gevoel, wat in ’n mate toegeskryf kan word aan die voertuig se billike gewig van 1,8 ton. Tog vermoed ons die frisser drieliter-diesel sal die gewildste in die gesin wees.
Hy bied ’n goeie balans tussen spoed en stukrag, maar dis sy deftige afwerking binne wat hom ’n tweede kyk werd maak. En ja, ondanks sy vet tekkies (22-duimers) is die binneruim steeds goed klankdig gemaak.
Afhangend van jou model is nutsfunksies soos wringkragverspreiding en aanpasbare dempers daar om jou rit sportiewer of gemakliker te maak.
Kortom, sit jy die topmodelle se talle skakels aan, hoef die F-Pace dinamies niks vir die Porsche Macan terug te staan nie. Hy is ook beslis ratser as die groter BMW X- en Merc GLE-modelle.

vierwielvastrap
Uiteraard is die F-Pace nie werklik veldrygerig nie, maar die vierwielvastrap is slim genoeg dat die blikbrein krag van ’n tollende wiel kan wegneem en na die ander kant van die as kan versprei (die stelsel werk met die ABS-remme – die blikbrein sal die tollende wiel laat vasknyp sodat krag na die ander wiele gedwing word).
Die ritmodusse werk in ’n mate soos Land Rover se Terrain Response-stelsel. Kies ’n modus, en die blikbrein verstel jou voertuig namens jou.
Hoewel die F-Pace nie ’n laestrekratkas het nie, help ’n spesiale vastrapverstelling (wat net teen eersteratsnelhede werk) dat jy tog katvoet teen ’n gladde, skuins oppervlak kan uitry. Dit is basies ’n versigtige deurvoer van krag met wieltol wat vinnig gesmoor word.
Die F-Pace is relatief duur, en vir dieselfde geld kan ’n Range Rover Sport of ’n sewesitplek-Volvo XC90 aangeskaf word.
Tog sê Jaguar daar is genoeg aanvraag vir die nuweling. Die eerste besending is reeds uitverkoop, en die vervaardiger beplan om minstens 300 eenhede voor die einde van die jaar van die hand te sit.
Wie weet, dalk kan dié Jaguar wel deel word van die Groot Vyf (Audi, BMW, Mercedes-Benz, Porsche en Lexus) in dié klas. 
– Netwerk24