'n Raat vir elke kwaal of skeet

Tanja Bause - “As jy 'n ouma het, vra haar oor die kruie wat sy gebruik het toe sy jonk was om kwale en skete te behandel.” Jacob Basson, beter bekend as Allen, is geen vreemdeling onder Namibiërs nie. Die afgelope twee jaar gesels hy elke Woensdag om 12:00 op die program Kaisames op die nasionale uitsaaier se Damara/Nama-radiostasie. “Ek gee mense raad en vertel hulle van die gebruike van onder meer kruie, tradisionele medisyne, plante, blare en wortels wat ons voorvaders gebruik het. Ek vertel hulle wat hulle vir allerhande kwale kan gebruik met wat hulle reeds in die huis het – soos uie, knoffel en meel.”Allen is op Mariental gebore en getoë. “Ek onthou uit my kinderdae op Mariental dat ons kinders nooit die binnekant van 'n hospitaal gesien het nie. My ma het ons met allerhande kruie behandel. Sy het die waarde en genesende eienskappe van verskillende plante en kruie by haar ma geleer, wat dit weer by haar ma geleer het.”Allen het as kind dikwels tyd saam met sy ma op die plaas in die veld bestee terwyl sy onder meer duiwelsklou en hoodia geoes het.“Ek het saam geloop en gekyk wat sy oes, vrae gevra oor hoekom sy dit oes; hoekom dié deel van die plant, en geleer. Ek het alles geproe wat sy gemaak het,” sê hy. In 2016 het Allen hartprobleme ontwikkel.“Ek het dokter toe gegaan vir toetse en hulle het vasgestel ek het 'n vergrote hart. Dit is toe ek my ma en haar kruie onthou het. Sy het altyd van die rooi brandrissies en hul wonderlike genesende eienskappe gepraat. Ek het my ma se resep begin maak en brandrissies daagliks ingeneem. Ek het tot vandag toe geen verdere probleme met my hart gehad nie, en dít is waar my belangstelling in tradisionele medisyne, kruie en plante opgevlam het.”Allen sê hy het navorsing begin doen en 'n belangstellingsgroep op die Telegram-toep gestig.“WhatsApp was te klein, maar op Telegram is ons 2 000 lede. Mense kan die toep aflaai en hul naam vir my stuur, dan sit ek hulle op die groep. Daar is ook baie groot dames wat tradisionele medisyne ken, en dikwels antwoord hulle ook vrae en gee raad.” Volgens Allen kry hy baie oproepe – veral van plaaswerkers en mense in afgeleë plekke wat nie toegang tot hospitale of dokters het nie. “Die ander dag het 'n plaaswerker my gebel oor haar kind wat 'n loopmaag het. Ek het net gevra of sy meel in die huis het en haar gehelp met iets so eenvoudig soos meel.“Wanneer ek voel my hulp bied net tydelike genesing verwys ek mense dokter toe. Dikwels sê ek my raad kan verligting bring, maar dit is dalk steeds nodig om 'n dokter te sien.”Allen meng die olies wat hy gebruik wanneer hy mense masseer ook self. “Ek meng verskillende olies. Brandrissieolie is byvoorbeeld vir mense wat rumatiek, spatare of sinusprobleme het. Wortelolie is vir mense wat gordelroos of ander velprobleme het. Dit help ook onder meer dat mense se hare beter groei,” sê hy. AANHANGERS SêHy het 'n lang lys plante wat met kwale help, sê hy. Volgens hom is gemmer goed vir nier- en blaasprobleme, knoffel vir aambeie, brandrissies vir sirkulasie en die blare van die koejawelboom vir onder meer 'n lastige hoes. “Ek toets alles wat ek meng eers self uit om seker te maak dit werk en doen geen skade nie. Ek doen my navorsing oor elke plant of raat voor ek dit aanbeveel,” sê hy.“Ek weet byvoorbeeld uie wat in groot ringe gesny word en op 'n kind geplaas word wat koors het, trek die koors uit. Dit verminder die koors, maar dan moet die oorsaak van die koors steeds vasgestel word.”Volgens Albertine Situde, 'n aanhanger van Allen, werk sy mengsel vir menstruasiepyn soos 'n droom. “Ek en my dogter neem die middel sodra ons begin menstrueer, en vir ons al twee is dit iets van die verlede,” sê sy. Thusnelda Gamibes sê sy neem Allen se wortelolie en natuurlike pille vir haar menopousale gloede.“Voorheen het ek binne 'n uur sommer vier of vyf gloede gekry. Ek het met my kop in die yskasdeur gestaan en was sopnat. Nou kry ek een gloed en dit is by verre nie meer so erg nie.”

'n Raat vir elke kwaal of skeet

Kommentaar

Republikein 2025-11-05

Meld asseblief aan om kommentaar te lewer

'n Raat vir elke kwaal of skeet

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.