'n Huis in drie dae

Augetto Graig - Die tekort aan bekostigbare behuising gaan binnekort getakel word met 'n tegniek waardeur huise binne drie dae met boublokke opgerig kan word op dieselfde wyse as wat kinders met Lego's bou.Die minister van stedelike en landelike ontwikkeling, me. Sophia Shaningwa, die goewerneur van die Khomasstreek, me. Laura McLeod-Katjirua, en die burgemeester van Windhoek, mnr. Muesee Kazapua, was gisteroggend teenwoordig by die bekendstelling van Polycare Namibië. Die adjunkambassadeur van Duitsland, mnr. Ullrich Kinne, was ook teenwoordig. Die maatskappy beplan om 'n einde te bring aan die behuisingskrisis in die land deur nuwe tegnologie waarmee 'n 56m²-huis binne drie dae en vir net N$250 000 gebou kan word.Dr. Gerhard Dust, stigter van die Duitse maatskappy Polycare, het verduidelik hoe die tegnologie ontstaan het. Ná sy aftrede in 2010 was hy diep geraak deur die aardbewing in Haïti en die noodreddingspogings het hom twee lesse geleer. "Mense kan dae lank sonder kos of water leef, maar sonder skuiling kan 'n mens nie een aand ná so 'n ramp oorleef nie,” sê hy, en ook "hoe gelukkig ek was om altyd 'n dak oor my kop te kon hê”. “Ons het gedroom om 'n nuwe stelsel te ontwikkel waarmee slagoffers met behulp van plaaslike materiaal vinnig hul huise kan herbou.” Hy sê die rede waarom minstens 1,2 miljard mense wêreldwyd dakloos is, is omdat boumateriaal so duur is en die boubedryf soos in antieke tye georganiseer is.Deur Polycare is die tegnologie ontwikkel om gewone sand, soos gevind in Namibië se woestyne en rivierbeddens, met poliësterhars te meng en daarmee boublokke te vervaardig wat soos Lego's inmekaar pas, en gebruik kan word om vinnig 'n woning op te rig. Fabriektoerusting, wat in 'n vraghouer kan pas, is ontwikkel om elk binne 'n uur 120 sulke blokke te vervaardig. Met 1 000 van die blokke kan enigiemand met net twee dae se opleiding 'n huis bou, sê hy.Nou het Polycare in Duitsland 'n vennootskap met die siviele ingenieursfirmas, Namibbeton en KL Building, asook die Swapo-maatskappy Guinas Investments gesmee en saam Polycare Namibië gestig. Elk van die drie vennote besit 'n derde van die aandele in die plaaslike maatskappy.Kinne het gister gesê Duitsland ondersteun die belegging in dié belangrike sektor van die ekonomie vir sosiale ontwikkeling. Hy sê 'n kleuterskool in Otjomuise sal een van die eerste projekte vir die toepas van die tegnologie wees nadat die privaat gefinansierde fabriek in Windhoek opgerig is. Buiten vir die hars wat uit Duitsland kom, sal net plaaslike materiale gebruik word. Shaningwa sê sy is baie positief en uiters optimisties oor die ontwikkeling. Volgens haar dra die nasionale tekort aan bekostigbare behuising grootliks by tot armoede in Namibië. Nie net is die regering bereid om alternatiewe boumetodes te ondersteun nie, maar Namibië is ook gierig om die res van suidelike Afrika te lei op die pad na bekostigbare behuising, sê sy. Volgens haar sal die Polycare-metode 'n uitstekende toevoeging tot bestaande tradisionele boumetodes in Namibië wees. Sy het plaaslike spelers in die boubedryf, veral banke, gevra om te kyk hoe hulle kan bydra en lenings aan mense met toegang tot grond vir die bou van dié huise te verskaf. Sy moedig ook Namibiërs aan om te spaar, om in die toekoms hul eie huise te kan bou. Burgemeester Kazapua sê dat die bestaande bouregulasies en munisipale verordenings, wat in die verlede alternatiewe boumateriaal en metodes se toepas vertraag het, nie die nuwe tegnologie direk verbied nie. “Dit is net 'n kwessie van inkorporasie en aanpassings,” sê hy.

'n Huis in drie dae

Kommentaar

Republikein 2026-06-19

Meld asseblief aan om kommentaar te lewer

'n Huis in drie dae

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.