’n Halfeeu se wel en wee met lesse geleer

In my leeftyd van ’n hele halwe eeu het ek baie lesse geleer.

1. Leer uit jou foute en moenie jou kop soos ’n donkie twee keer stamp nie.

2. Vriendelikheid kos regtig niks.

3. Mense wat nie van diere hou nie, kan nie vertrou word nie.

4. ’n Mens wat ’n dier slaan, sal ’n vrou, kind of bejaarde ook slaan.

5. ’n Hond is jou beste vriend, maar katte kraai koning in die huis.

6. Jakkals verander van haar, maar nie van snaar.

7. Onbeskofte, onregverdige base was boelies op skool.

8. Musiek, reën en die natuur is my beste terapie.

9. Boeke is my beste vriende.

10. Eer jou vader en jou moeder.

11. Vriende kan soos familie voel.

12. Luister na wat kinders sê.

13. Geld kan nie geluk koop nie, maar ryk mense se probleme word darem in groter gemak opgelos.

14. Ek gaan nooit ooit van snobs hou nie.

15. Snobs hou net van mekaar.

16. Soort soek soort.

17. Reis maak jou ryker.

18. Daar kan wêreldvrede wees as een kind uit elke hoërskool vir ’n jaar lank in ’n ander land gaan bly.

19. Leer nog ’n taal of nog ’n musiekinstrument speel.

20. Gay mans is baie nicer as straight mans.

21. Nie alle mans is trash nie.

22. Mense met anger issues gaan altyd anger issues hê.

23. Moenie brûe verbrand nie.

24. Moenie te veel aandag aan die verkeerde mense skenk nie.

25. Ek gaan nooit ’n vrolike vinkie-oggendmens wees nie.

26. Oggendmense en naguile kan nie onder een dak in vrede bly nie.

27. Ek kan nie regtig nie ordentlik wakker word sonder koffie nie.

28. Ek is verslaaf aan koffie.

29. In Namibië draai alles om reën.

30. Dra elke dag sonskerm in hierdie land van fel sonskyn.

31. Ek hou nie van rassiste en homofobe nie. Laat die son oor almal skyn.

32. Ek hou regtig niks van Donald Trump nie.

33. Ek hou nie van renoster- , olifant-, of enige wildstropers nie.

34. Ek hou ook nie van die smokkelaars van ivoor of renosterhorings of enige wildprodukte nie.

35. Ek hou niks van die gebruikers van renosterhoring nie. Hulle is dom. Eet jou eie naels.

36. Wilde diere hoort nie in aanhouding nie.

37. Ek hou nie van enige vorm van geweld nie, veral nie teen vroue, kinders, diere en bejaardes nie.

38. Ek sal altyd ’n plaasmeisie bly. Ek kan nie in ’n stad bly nie.

39. Ek verstaan nie mense wat marathons hardloop nie, maar ek bewonder hulle. Ek sal nooit kan nie.

40. Afrika is nie vir sissies nie.

41. Die lewe is onregverdig.

42. Die lewe skuld jou niks.

43. Die lewe gaan aan. Hou by.

44. Leer om nee te sê.

45. Moenie sê “fonteintjie uit jou sal ek nooit drink” nie.

46. Jy moet stem, anders kan jy nie kla of kritiseer nie.

47. Daar is sekere goed buite jou beheer waaraan jy niks kan doen nie.

48. Sing, dans en lag meer.

49. Kanker is ’n nare bliksem, maar wonderwerke gebeur wel.

50. Tel jou seëninge elke dag.