'n Groot hart vir wesies

Me. Susanna Kruger, inwoner van Keetmanshoop“Daar is 72 kinders wat gereeld hier kom. Die jongste is drie jaar oud en die oudste is 14. Ek ken elkeen by die naam en wat hulle lewensverhale is, sommiges hartroerend en ander hartverskeurend.”PULL QUOTEIan Nortje – Sy was self ’n weeskind en moes dikwels sonder kos klaarkom. Sy weet hoe dit voel om honger te wees en daarom het sy besluit sy sal self haar hand na behoeftige kinders uitsteek.Sy is ’n vrou met ’n hart van goud.Me. Susanna Kruger is ’n inwoner van Keetmanshoop wat sedert 2010 wees- en weerlose kinders in haar gemeenskap help.Die groothartige Susanna het aan die begin van 2010 ’n behoefte in haar buurt raakgesien, waarna sy toe uit haar eie sak vir die kinders begin kos gee het. “Daar was dikwels weeskinders in die strate naby my huis wat geen kos gehad het nie. Ek het nie regtig geld gehad om dit te doen nie, want ek self het geen inkomste gehad nie en my man het ’n karige salaris as ’n bouer verdien. Maar ek het steeds besluit ek moet hulle help,” sê sy.Volgens haar was daar in daardie stadium net ’n enkele paar kinders wat daagliks by haar huis kom kos haal het, maar die getalle het vinnig vermeerder.“Hulle was aan die begin net ’n handjie vol, maar soos die woord versprei het, het al hoe meer kinders elke dag by my begin opdaag,” sê sy.Byna vyf jaar het intussen verloop en Susanna gee nou daagliks van Maandag tot Vrydag vir meer as 70 kinders ’n bord kos. Deesdae doen sy dit vanuit ’n kerkgebou wat gratis aan haar beskikbaar gestel is. Haar projek het ook ’n naam bygekry – Dorkas Sopkombuis.Hoekom juis dié spesifieke naam? Sy sê dit was ’n vers in die Bybel wat haar geïnspireer het – Handelinge 9:36.“Dit lees: ‘In Joppe was daar ’n gelowige vrou met die naam Tabita, in Grieks Dorkas. Sy was altyd besig om goed te doen en die armes te help.’ Dit is asof God toe self met my gepraat het,” sê sy.Volgens Susanna het dit nou vir haar makliker geword om die kinders te help.“Ek het nou ’n plek waar ek vir die kinders kan kos maak en aan die begin van die jaar het ek hulp van die Kerk Alliansie vir Weeskinders (Cafo) begin ontvang, wat baie help. Dit is ook nie net meer ek nie, want twee vrywilligers, mee. Helena Jantze en Veitjie Jacobs, het ook by die projek aangesluit,” sê sy.Susanna sê die weeskinders het soos haar eie kinders geword. “Daar is 72 kinders wat gereeld hier kom. Die jongste is drie jaar oud en die oudste een is 14. Ek ken elkeen by die naam en wat hulle lewensverhale is, sommiges hartroerend en ander hartverskeurend.”Buiten dat sy sorg dat elke kind ’n vol magie het, het sy dit ook haar taak gemaak om die kinders ’n geestelike opvoeding te gee.“Ons bid en lees elke dag ’n bietjie uit die Bybel en Saterdae doen ons Bybelstudie. Soms sal ons ook ’n kort, geestelike opvoering oefen wat die kinders Sondae in die kerk kan opvoer.”Volgens haar is die kinders dankbaar vir hul tweede huis en “ma”.“Soms gebeur dit dat ek die kinders amper moet ‘wegjaag’ sodat ek weer die gebou kan sluit, want hulle wil nie self weggaan nie. Hulle skryf ook soms briefies om dankie te sê vir wat ons vir hulle doen.”Susanna sê sy sal nog vir solank sy kan haar tyd aan die kinders gee, al doen sy dit sonder enige betaling. “Dit is my droom om vir hulle ’n beter plek te kry om hulle te kan help. Soms gaan dit maar moeilik, maar ons kry darem so af en toe skenkings, wat ons baie waardeer,” het sy gesê.Diegene wat graag ’n skenking van kos, klere en ander noodsaaklikhede wil maak, kan met Susanna by 081 451 5711 in verbinding tree.

'n Groot hart vir wesies

Kommentaar

Republikein 2026-05-05

Meld asseblief aan om kommentaar te lewer

'n Groot hart vir wesies

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.