‘n Bokjol met ‘n span b-woorde

Nee. Blou en bollie is nie twee van hulle nie . . . :-)

As ‘n man geen noemenswaardige sangstem, musiek-, dans-, fisieke of sporttalent het nie, en jy’s boonop in die koerant- en mediabedryf, is daar nie juis vir jou veel oor as die bolero van alliterasie, assonansie, ritme en beeldspraak nie.

Hopelik het Dapperrerige Daniëltjie al oor die storm en dwang (nie net met rym nie) van sy universiteitsdae gekom.

Die ander aand sit die uwe met ‘n halwe oor en oog in by ‘n Afrikaanse sepie wat vroulief graag kyk. “Almal is so moerig en beswaard in hierdie episode,” val ek die kassie in die rede. “Regtig, wat gaan aan met die mense!”

Vroulief het my nie in die boosdoos gedruk nie.

Op ‘n nuuskantoor word dikwels intens oor sake van die dag en algemene lewensvraagstukke geboe en geba. En nie net oor die masker(-bakkies-)bal waarin die Pandemie ons in 2020 gedwing het nie.

Ernstige dinge. Soos padsterftes en verkeersveiligheid, die ekonomie (of gebrek daaraan), misdaad, geslagsgeweld, politiek en dies meer, ensovoort.

Die ongeluk op die verbypad waarin Ingrid van Wyk Scholtz laat verlede jaar tragies gesterf het, het die vraag in hierdie dapper haarspan aangesteek of ‘n groot klomp van die mensdom se gebreke nie maar gewoon aan die afwesigheid van bedagsaamheid toegeskryf kan word nie.

B-woord nommer 1.

En saam met hom ‘n verwante niggie: Bewustheid. Van ander en jou omgewing – in al hul boeiende fassette.

Dinsdagaand is die dr. Leon de Stadler (een van my ouddosente) se tesaurus nadergetrek.

Nee, dit is nie een of ander oerdier met skubbe en vlymskerp tande nie. Die skrywer gaan ook nie hier uitlap wat dit is nie; in die hoop dat lesers dit in die woordeboek sal opsoek. Of dan maar google, as dit moet.

Anders as ‘n woordeboek se lemmas (nog ‘n oer- of fantasiedier?) bestaan ‘n tesourus uit ‘n indeks en artikels.

Watter wonders lap die leksikografiese gids uit?

(Behalwe, terug by die sepie, dat daar blykbaar veel meer idiome, gesegdes en uitdrukkings oor negatiewe gedrag as oor die positiewe en die opbouende is.)

Bedagsaam is nou verwant aan: ontvanklik, sorgsaam, barmhartig, hoflik, omsigtig – en laaang lyste ander baie belangrike beginsels (BBB’s). Kortom om hoed in die hand deur die lewe te gaan.

Van bewus se talle maats is oplettend, noulettend, konsentrasie, besinning, belangstelling, wakker, waaksaam, en selfondersoek of introspeksie.

Oppas nou vir enumerasie. Dit kan ewe erg as rymdwang wees.

Lui daar al iewers ‘n bel?

Byna al die probleme waarmee ons sukkel, het op ‘n manier met bedag en bewus te make. Verwagte en gerade gedrag, word onder andere deur moraliteit, etiek, norme, wette en regulasies voorgeskryf.

Maar. Sonder hierdie twee b-woorde is sulke raad verdoem om te boemerang?

En, dink Dapper beskeie, is dit nie maar soort van ‘n kernwet hier op aarde en in die dimensies daarna nie? Baie korter ook as die Tien Gebooie.

Laat ons dekking vat. Predikant is hierdie skrywer nie en wil hom ook nie die argwaan van teologe en die publiek op die hals haal nie.

Kom ons Teranosourus Ramba! En Harambee. Opreg.

Warmhartige groete