Mynkleims sluk Okongava in

Catherine Sasman Die oorblywende 15 160 ha van deel A van die plaas Okongava no 72 in die Erongostreek word deur mynmaatskappye beset.Mnr. Utoni Nujoma, minister van grondhervorming, het dít Donderdag in die parlement erken. Volgens hom het die Advieskommissie vir Grondhervorming (LRAC) 'n aanbeveling van Erongo se hervestigingskomitee vir die opstel van 'n uitgebreide grondgebruikplan aanvaar.Dié plan oormerk sekere sones vir mynboubedrywighede en voorgenome boerdery-aktiwiteite.Hoewel die plan in Januarie eers aanvaar is, het mynboubedrywighede reeds op die plaas afgeskop. Nujoma het gesê kennisgewing is in Desember 2014 ontvang dat die Tsoaxudaman- tradisionele owerheid onder hoofman Jonathan Neumbo eienaarskap van die plaas geneem het. Die minister het gesê ondersoeke en beraadslaging met Neumbo in 2015 het getoon die Tsoaxudaman- tradisionele owerheid het 'n geskrewe ooreenkoms aangegaan met 'n venootskap tussen Bescheer Investment CC en Bohale Investment CC, wat in Februarie 2015 onderteken is.Dié ooreenkoms was vir die bou van 'n pad om graniet en marmer op die plaas te verken. Hierná het dit onder die ministerie se aandag gekom verskeie mynmaatskappye is met mynbedrywighede op die plaas besig, het die minister gesê.Een van die mynmaatskappye is die Kanadese Desert Lion Energy (Pty.) Ltd, wat volgens Nujoma die aktiefste op die plaas is.'n Namibiese maatskappy, !Huni-/Urib Investments, het 20% se aandele in Desert Lion. Nujoma se neef, mnr. Thomas Mushimba, is 'n aandeelhouer en die direkteur van !Huni-/Urib, en is ook op Desert Lion se Namibiese bestuurspan. Desert Lion myn litium by die ou Rubicon-myn en het dit reeds na China begin uitvoer.Nujoma het verlede week gesê die suiwer Namibiese maatskappy Gecko Limestone het by die ministerie aansoek om goedkeuring van die myn van kalksteen op die plaas gedoen.Vier entiteite het eksklusiewe prospekteerlisensies (EPL'e), waarvan twee mynlisensies het en ses mynregte op Okongava.Bohale Investments CC, Desert Lion, Navachab-goudmyn en Ngendahala A.K. Frans Indonga is die vier maatskappye met EPL'e.Bohale en Desert Lion het ook mynlisensies. Twee van die ses mynboukleims is aan Jan George JNR Enslin en Gecko Limestone toegeken. Johannes Shikwambi en Megameno Angula het een kleim, en die res behoort aan onderskeidelik Ebson Gamxamub en Claus Gertze. Nujoma het gesê opsigters wat as veiligheidspersoneel op die plaas ontplooi is het in Junie 2017 onwettige mynbou-aktiwiteite deur BC Drilling CC aangemeld – 'n maatskappy wat oënskynlik nie by die Owerheid vir Sake- en Intellektuele Eiendom (Bipa) geregistreer is nie. AgtergrondDie ministerie het die betrokke stuk grond in 2014 teen meer as N$15 miljoen aangeskaf met die doel om die Otjimbingwe- kommunale gebied uit te brei.Dié beplande uitbreiding het nooit gebeur nie en Nujoma het by herhaling gesê die plaas is nooit aan die Tsoaxudama- tradisionele owerheid toegeken of oorhandig nie. Hy het gesê dis nie duidelik op wie se instruksie die tradisionele owerheid eienaarskap geneem het nie, omdat geen opdrag deur die ministerie ontvang is nie, en hulle ook nie bewus is van enige korrespondensie wat die inskakeling van die plaas by die Otjimbingwe- kommunale gebied goedkeur nie. Nujoma het gesê die tradisionele owerheid het in 2015 kampe, of regte sonder die grondministerie of streekkantoor se goedkeuring of kennis op die plaas toegeken, en “ander het eenvoudig plaas toe getrek en die voortslepende droogte as hoofrede vir hul onwettige besetting van die plaas aangevoer”. Volgens die minister is 'n uitsettingsbevel in 2015 en 2018 uitgereik, waarvan dadels gekom het.Hy't gesê daar is steeds 18 onwettige bewoners op die plaas.

Mynkleims sluk Okongava in

Kommentaar

Republikein 2025-09-19

Meld asseblief aan om kommentaar te lewer

Mynkleims sluk Okongava in

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie