My vrae aan die direkteur
Oud-opvoeder skryf:
Ek reageer op die brief "Direkteur reageer op aantygings" in die uitgawe van 18 November 2016.
Die direkteur van die //Kharas-onderwysstreek het myns insiens weereens sy voorspelbaarheid bewys deur op die onlangse SMS-boodskap aan Republikein te reageer. Soos gewoonlik sit hy, met sy blitsige respons, wat my betref die pot heeltemal mis.
Die inhoud van die SMS is geensins ‘n beskuldiging dat die direkteur homself verryk met wederregtelike reis-en-verblyfeise nie. Almal, insluitend die outeur van die SMS, weet dat hy die nodige toestemming sal kry en die uitgawe verder sal motiveer met die toepaslike dokumente.
Hyself is so oortuig van die korrektheid van hierdie administratiewe handeling dat hy dapper genoeg is om ‘n ondersoekspan na die streek te nooi. Maar dit is nie hoe ek hierdie en ander die SMS-klagtes lees nie.
Die outeur van die SMS bevraagteken nie die geldigheid van die eise nie, maar twyfel of dit positief tot effektiewe bestuur en die kwaliteit van onderwys bydra. Is daar enige aanduiding dat sogenaamde beplanningsessies in die Noord-Kaap enigsins positief impakteer op leer en onderrig in //Kharas?
Voeg eindelose besoeke aan skole, die bywoning van funksies by skole en begrafnisse van onderwysers - op staatskoste? - waarde toe tot onderwys in //Kharas? Die antwoord is volgens my sonder twyfel nee.
Die direkteur behoort, as ‘n ingeligte onderwyskundige, te weet reis-en-verblyfeise, die bywoning van kultuurfeeste in Pella en Augrabies, deelname aan beplanningsaksies in en saam met die Noord-Kaapse onderwysdepartement, om totsiens te gaan sê vir onderwysers wat aftree en die bring van ‘n laaste huldeblyk aan ‘n onderwyser wat heengegaan het, is nie aanwysers van die kwaliteit van onderwys nie.
‘n Mens wil nie hardvogtig teenoor hierdie sake staan nie, maar hulle is definitief nie sulke aanwysers nie.
Die direkteur moet aanvaar dat skole nie effektiewe onderrig en leer kan laat gebeur sonder goeie toesig deur sy kantoor nie. Hy moet fisies op kantoor wees en weet dat sy personeel (professionele en administratiewe personeel) die nodige steun aan die skole gee. Hy moet oortuig wees dat die streekkantoor goeie en effektiewe diens aan personeel verskaf.
Die swak graad 10- en 12-uitsale sowel as die klagtes van diensdoenende onderwysers bring mens nie onder sodanige indruk nie.
Monitering en beheeruitoefening is twee van die direkteur se belangrikste take. Hy moet altyd daarvan verseker wees dat die sisteme wat in werking gestel is om die skole te ondersteun, werk. Hy moet weet dat die bronne (geld, personeel en tyd) tot sy beskikking gestel effektief aangewend word.
Hy moet die uitleg van sy begroting so bepaal dat elke sent sy eie nis vind.
Hy kan onmoontlik daardie sekerheid hê as hy gedurig op pad is.
Verder is daar nog ‘n vraag wat te make het met onderwys in //Kharas wat beantwoord moet word. Hoe kan die stelsel deursigtig wees as die gemeenskap nie ‘n aandeel daarin het nie?
Die Onderwyswet skryf duidelik voor dat daar ‘n Onderwysforum (Education Forum) in elke streek gestig moet word. Indien hierdie bepaling geskrap is, moet die direkteur die publiek sodanig inlig anders behoort hy die afwesigheid daarvan te verduidelik.
Wat die direkteur se uitnodiging aan die onderwysministerie ten opsigte van ‘n ondersoek betref. Ek wil nie voorbarig wees nie, maar ek wil hom hierin ondersteun.
Maar die terme vir so ‘n ondersoek wat hy in sy skrywe noem (voorafverkrëe toestemming en toepaslike dokumentasie) sal niks verduidelik nie. So ‘n ondersoek moet vra of die uitgawes vir reis en verblyf bydra tot effektiewe streeksbestuur en kwaliteit onderwys in die skole. Dit behoort die verwysingsraamwerk vir sondanige ondersoek te wees.
Ek vertrou dat die owerhede aan hierdie versoek sal voldoen.
Ek reageer op die brief "Direkteur reageer op aantygings" in die uitgawe van 18 November 2016.
Die direkteur van die //Kharas-onderwysstreek het myns insiens weereens sy voorspelbaarheid bewys deur op die onlangse SMS-boodskap aan Republikein te reageer. Soos gewoonlik sit hy, met sy blitsige respons, wat my betref die pot heeltemal mis.
Die inhoud van die SMS is geensins ‘n beskuldiging dat die direkteur homself verryk met wederregtelike reis-en-verblyfeise nie. Almal, insluitend die outeur van die SMS, weet dat hy die nodige toestemming sal kry en die uitgawe verder sal motiveer met die toepaslike dokumente.
Hyself is so oortuig van die korrektheid van hierdie administratiewe handeling dat hy dapper genoeg is om ‘n ondersoekspan na die streek te nooi. Maar dit is nie hoe ek hierdie en ander die SMS-klagtes lees nie.
Die outeur van die SMS bevraagteken nie die geldigheid van die eise nie, maar twyfel of dit positief tot effektiewe bestuur en die kwaliteit van onderwys bydra. Is daar enige aanduiding dat sogenaamde beplanningsessies in die Noord-Kaap enigsins positief impakteer op leer en onderrig in //Kharas?
Voeg eindelose besoeke aan skole, die bywoning van funksies by skole en begrafnisse van onderwysers - op staatskoste? - waarde toe tot onderwys in //Kharas? Die antwoord is volgens my sonder twyfel nee.
Die direkteur behoort, as ‘n ingeligte onderwyskundige, te weet reis-en-verblyfeise, die bywoning van kultuurfeeste in Pella en Augrabies, deelname aan beplanningsaksies in en saam met die Noord-Kaapse onderwysdepartement, om totsiens te gaan sê vir onderwysers wat aftree en die bring van ‘n laaste huldeblyk aan ‘n onderwyser wat heengegaan het, is nie aanwysers van die kwaliteit van onderwys nie.
‘n Mens wil nie hardvogtig teenoor hierdie sake staan nie, maar hulle is definitief nie sulke aanwysers nie.
Die direkteur moet aanvaar dat skole nie effektiewe onderrig en leer kan laat gebeur sonder goeie toesig deur sy kantoor nie. Hy moet fisies op kantoor wees en weet dat sy personeel (professionele en administratiewe personeel) die nodige steun aan die skole gee. Hy moet oortuig wees dat die streekkantoor goeie en effektiewe diens aan personeel verskaf.
Die swak graad 10- en 12-uitsale sowel as die klagtes van diensdoenende onderwysers bring mens nie onder sodanige indruk nie.
Monitering en beheeruitoefening is twee van die direkteur se belangrikste take. Hy moet altyd daarvan verseker wees dat die sisteme wat in werking gestel is om die skole te ondersteun, werk. Hy moet weet dat die bronne (geld, personeel en tyd) tot sy beskikking gestel effektief aangewend word.
Hy moet die uitleg van sy begroting so bepaal dat elke sent sy eie nis vind.
Hy kan onmoontlik daardie sekerheid hê as hy gedurig op pad is.
Verder is daar nog ‘n vraag wat te make het met onderwys in //Kharas wat beantwoord moet word. Hoe kan die stelsel deursigtig wees as die gemeenskap nie ‘n aandeel daarin het nie?
Die Onderwyswet skryf duidelik voor dat daar ‘n Onderwysforum (Education Forum) in elke streek gestig moet word. Indien hierdie bepaling geskrap is, moet die direkteur die publiek sodanig inlig anders behoort hy die afwesigheid daarvan te verduidelik.
Wat die direkteur se uitnodiging aan die onderwysministerie ten opsigte van ‘n ondersoek betref. Ek wil nie voorbarig wees nie, maar ek wil hom hierin ondersteun.
Maar die terme vir so ‘n ondersoek wat hy in sy skrywe noem (voorafverkrëe toestemming en toepaslike dokumentasie) sal niks verduidelik nie. So ‘n ondersoek moet vra of die uitgawes vir reis en verblyf bydra tot effektiewe streeksbestuur en kwaliteit onderwys in die skole. Dit behoort die verwysingsraamwerk vir sondanige ondersoek te wees.
Ek vertrou dat die owerhede aan hierdie versoek sal voldoen.
Kommentaar
Republikein
Geen kommentaar is op hierdie artikel gelaat nie