Muur van hoop
Foto's, vrywilligers en 'n trust word onder meer beplan om die ouers van piepklein vroeggebore babas hoop en ondersteuning te bied.
Henriette Lamprecht - Dis ’n miernes van bedrywighede soos personeel en ouers om die vroeggebore babas kloek.
Per skof is sewe verpleegsters aan diens, met 'n minimum van 36 vroeggebore babas wat hier behandel word tot hulle sterk genoeg is om óf ontslaan te word óf na ’n gewone saal oorgeplaas te word.
Aan die hoof van dié afdeling van die Sentrale Hospitaal in Windhoek se kraamafdeling staan dr. Wim de Mey, wat as pediater hier diens doen.
De Mey het nou met die hulp van die dokumentêre fotograaf, me. Aneen Graupe, ’n baie spesiale fotoprojek begin om op vroeggebore babas te fokus wat vandag “groot en gesond” is.
Die doel is om ouers van vroeggebore babas hoop te gee, sê De Mey, en om te wys al is hulle so klein en weerloos by geboorte, word hulle groot en staan ook hul plek in die wêreld vol.
De Mey hoop ’n spesiale trust en ’n netwerk van vrywilligers sal die tekort aan personeel by die eenheid kan hokslaan.
“Ons wil ’n netwerk begin van ma’s wat ook in so ’n posisie was en verstaan waardeur die ma van ’n vroeggebore baba gaan,” verduidelik hy.
“Hulle kom om te help, maar is ook daar vir raad en ondersteuning. Dis ’n kwessie van ma’s wat ma’s help.”
Deel van die netwerk is ook tuisbesoeke aan nuwe mammas. “Jy hoef nie gekwalifiseerd te wees nie, dit gaan oor die ervaring van self ’n ma wees.”
Die foto wat deel van De Mey se spesiale projek uitmaak, gaan op die gange se mure pryk.
“Die eenheid voel nie baie verwelkomend nie en van die ma’s wie se babas hier versorg word, voel dikwels verlore en alleen. Die foto’s sal dit hopelik besweer.”
Tien kinders is reeds vir die projek geïdentifiseer en sluit ’n drieling van Katima Mulilo in.
Volgens De Mey word babas wat op 25 weke gebore word as “lewensvatbaar” beskou. Ses mediese beamptes roteer in die eenheid, en die neonatale intensiewesorgeenheid spog met agt ventilators. Vanaf dié eenheid beweeg die babas na die hoësorgeenheid waar hulle van die ventilators afgehaal word.
“Hul voeding word verhoog en die babas het nie meer aarvoeding nodig nie,” verduidelik De Mey.
‘Handvol babatjie’
Yulian Bezuidenhout is ’n gesonde, woelige tweejarige seuntjie wat op 11 November 2015 met sy geboorte die skaal op ’n skrale 785 g laat trek het. Pa Damian Beukes vertel sy seuntjie was ’n kleine “handvol babatjie” en is met die hulp van ’n keisersnee gebore.
Ma Yolandie Bezuidenhout was ses en ’n half maande swanger toe sy noodgedwonge weens hoë bloeddruk vroeg die lewe aan Yulian moes skenk.
“In ons familie het daar nog nooit so iets gebeur nie. Ek kan nie beskryf hoe ek gevoel het toe ek hom sien nie, dit was net snot en trane! ’n Mens wil mos nie jou kind so met daai pype sien nie,” onthou Damian.
Damian vertel klein Yulian was vir drie maande in die broeikas, met pa en ma wat getrou langs hom gewaak het.
Hulle kon wel hul seuntjie vashou.
“Jy was bang om aan hom te raak en om hom op te tel, sy velletjie was sag!”
Vandag is hul seuntjie ’n handvol en “baie oraait”, sê Damian.
“Hy is verskriklik stout en het nou geleer om van ’n bank af te spring! Dit gaan baie goed met hom, hy was hierdie jaar nog nie een keer siek nie.”
Dit is fotograaf Aneen se verantwoordelikheid om die ouers te kontak en reëlings vir die fotosessies te tref. Drie van die geoormerkte gesinne is reeds gekiek. Om die foto’s te laat druk en raam, gaan sowat N$1 700 per foto kos.
“Ons probeer borge kry om dié koste te dra. Die besigheid se naam sal dan op ’n naamplaatjie by die foto verskyn.”
Aneen hoop om teen Wêrelddag vir vroeggebore babas in November alles gereed te hê en die projek aan die publiek bekend te stel.
“Ek is eintlik ’n dokumentêre familiefotograaf, maar doen hierdie as portrette soos Wim dit wil hê. Ek het darem ’n paar van hom en die een seun geneem en ook van twee ander kleintjies wat die saal besoek het.”
Wat Aneen die meeste van die projek geraak het, is hoe sterk die kinders is.
“Die kleintjies is sulke gelukkige kinders. Die ouer seun by wie se skool ons was, was so trots - dit het die grootste impak op my gehad.”
Vir meer inligting oor die fotoprojek, trust en netwerk van vrywilligers, kan De Mey by 081 266 5132 geskakel word.
Per skof is sewe verpleegsters aan diens, met 'n minimum van 36 vroeggebore babas wat hier behandel word tot hulle sterk genoeg is om óf ontslaan te word óf na ’n gewone saal oorgeplaas te word.
Aan die hoof van dié afdeling van die Sentrale Hospitaal in Windhoek se kraamafdeling staan dr. Wim de Mey, wat as pediater hier diens doen.
De Mey het nou met die hulp van die dokumentêre fotograaf, me. Aneen Graupe, ’n baie spesiale fotoprojek begin om op vroeggebore babas te fokus wat vandag “groot en gesond” is.
Die doel is om ouers van vroeggebore babas hoop te gee, sê De Mey, en om te wys al is hulle so klein en weerloos by geboorte, word hulle groot en staan ook hul plek in die wêreld vol.
De Mey hoop ’n spesiale trust en ’n netwerk van vrywilligers sal die tekort aan personeel by die eenheid kan hokslaan.
“Ons wil ’n netwerk begin van ma’s wat ook in so ’n posisie was en verstaan waardeur die ma van ’n vroeggebore baba gaan,” verduidelik hy.
“Hulle kom om te help, maar is ook daar vir raad en ondersteuning. Dis ’n kwessie van ma’s wat ma’s help.”
Deel van die netwerk is ook tuisbesoeke aan nuwe mammas. “Jy hoef nie gekwalifiseerd te wees nie, dit gaan oor die ervaring van self ’n ma wees.”
Die foto wat deel van De Mey se spesiale projek uitmaak, gaan op die gange se mure pryk.
“Die eenheid voel nie baie verwelkomend nie en van die ma’s wie se babas hier versorg word, voel dikwels verlore en alleen. Die foto’s sal dit hopelik besweer.”
Tien kinders is reeds vir die projek geïdentifiseer en sluit ’n drieling van Katima Mulilo in.
Volgens De Mey word babas wat op 25 weke gebore word as “lewensvatbaar” beskou. Ses mediese beamptes roteer in die eenheid, en die neonatale intensiewesorgeenheid spog met agt ventilators. Vanaf dié eenheid beweeg die babas na die hoësorgeenheid waar hulle van die ventilators afgehaal word.
“Hul voeding word verhoog en die babas het nie meer aarvoeding nodig nie,” verduidelik De Mey.
‘Handvol babatjie’
Yulian Bezuidenhout is ’n gesonde, woelige tweejarige seuntjie wat op 11 November 2015 met sy geboorte die skaal op ’n skrale 785 g laat trek het. Pa Damian Beukes vertel sy seuntjie was ’n kleine “handvol babatjie” en is met die hulp van ’n keisersnee gebore.
Ma Yolandie Bezuidenhout was ses en ’n half maande swanger toe sy noodgedwonge weens hoë bloeddruk vroeg die lewe aan Yulian moes skenk.
“In ons familie het daar nog nooit so iets gebeur nie. Ek kan nie beskryf hoe ek gevoel het toe ek hom sien nie, dit was net snot en trane! ’n Mens wil mos nie jou kind so met daai pype sien nie,” onthou Damian.
Damian vertel klein Yulian was vir drie maande in die broeikas, met pa en ma wat getrou langs hom gewaak het.
Hulle kon wel hul seuntjie vashou.
“Jy was bang om aan hom te raak en om hom op te tel, sy velletjie was sag!”
Vandag is hul seuntjie ’n handvol en “baie oraait”, sê Damian.
“Hy is verskriklik stout en het nou geleer om van ’n bank af te spring! Dit gaan baie goed met hom, hy was hierdie jaar nog nie een keer siek nie.”
Dit is fotograaf Aneen se verantwoordelikheid om die ouers te kontak en reëlings vir die fotosessies te tref. Drie van die geoormerkte gesinne is reeds gekiek. Om die foto’s te laat druk en raam, gaan sowat N$1 700 per foto kos.
“Ons probeer borge kry om dié koste te dra. Die besigheid se naam sal dan op ’n naamplaatjie by die foto verskyn.”
Aneen hoop om teen Wêrelddag vir vroeggebore babas in November alles gereed te hê en die projek aan die publiek bekend te stel.
“Ek is eintlik ’n dokumentêre familiefotograaf, maar doen hierdie as portrette soos Wim dit wil hê. Ek het darem ’n paar van hom en die een seun geneem en ook van twee ander kleintjies wat die saal besoek het.”
Wat Aneen die meeste van die projek geraak het, is hoe sterk die kinders is.
“Die kleintjies is sulke gelukkige kinders. Die ouer seun by wie se skool ons was, was so trots - dit het die grootste impak op my gehad.”
Vir meer inligting oor die fotoprojek, trust en netwerk van vrywilligers, kan De Mey by 081 266 5132 geskakel word.
Kommentaar
Republikein
Geen kommentaar is op hierdie artikel gelaat nie