Mutanimiye eis van staat

Jacqueline Louw Regsargument is Dinsdag in Windhoek se hoërhof aangehoor in 'n skadevergoedingseis wat een van die vrygespreektes in die Caprivi-hoogverraadverhoor teen die staat ingestel het.Mnr. George Mutanimiye, wat die staat vir N$22 miljoen se skadevergoeding dagvaar vir die meer as 13 jaar wat hy in aanhouding deurgebring het ná die Caprivi-afstigtingsaanvalle, is in Februarie 2013 deur regter Elton Hoff vrygespreek.Sy eis teen die minister van veiligheid en sekuriteit, die aanklaer-generaal en Namibië se regering spruit uit sy inhegtenisname saam met ander beweerde afstigters in die Caprivistreek ná gewapende aanvalle in Katima Mulilo op 2 Augustus 1999.Mnr. Slysken Makando het namens Mutanimiye voor regter Johanna Prinsloo aangevoer die Namibiese polisie het vals klagte teen hom gebring ná sy inhegtenisname op 4 Augustus 1999. Makando het ook gesê die optrede teen sy kliënt kom neer op kwaadwillige vervolging. In die alternatief tot die eis vir kwaadwillige vervolging eis Mutanimiye skadevergoeding vir die voortsetting van sy vervolging nadat alle getuienis wat hom kon impliseer teen 2 Februarie 2006 afgehandel was, maar hy steeds in aanhouding gebly het tot hy op 11 Februarie 2013 vrygespreek is.alternatiewe eisMutanimiye het ook 'n alternatiewe eis vir die skending van sy grondwetlike regte teen die verweerders ingestel.In sy betoogshoofde voer Makando aan dat daar ten tyde van Mutanimiye se inhegtenisname geen bewys daarvan was dat hy 'n lid van die United Democratic Party (UDP) was nie. Hy sê verder dat daar nie genoeg getuienis in Mutanimiye se dossier was om die klagte teen hom te handhaaf nie.Ter afsluiting het Makando gesê: “Die eiser het 'n saak uitgemaak vir kwaadwillige vervolging, beide deur te bewys dat die verweerders kwaadwillig en sonder redelike en waarskynlike gronde 'n onsuksesvolle kriminele saak teen hom ingestel het, wat tot skade aan sy persoon, reputasie en krediet gelei het.”Senior advokaat Ishmael Semenya, van Suid-Afrika, het namens die verweerders aangevoer dat daar tydens Mutanimiye se inhegtenisname 'n noodtoestand in die Caprivistreek afgekondig is as gevolg van die opstande deur die Caprivi-bevrydingsleër. Dit is die staat se saak dat Mutanimiye in hegtenis geneem is gebaseer op inligting van die polisie se intelligensiediens dat hy 'n organiseerder en/of ondersteuner van die UDP was en dat hy mense beïnvloed het om wapens op te neem om die Caprivistreek van Namibië af te stig.Mutanimiye is saam met 125 ander mense in hegtenis geneem. Die groep het onder andere tereg gestaan op klagte van hoogverraad, openbare geweld, moord en poging tot moord.“Vir die eiser se eis om te slaag moet hy bewys dat strafregtelike verrigtinge ingestel is, dat daar geen redelike gronde vir sodanige verrigtinge bestaan het nie, dat die verweerders kwaadwillig opgetree het en dat die vervolging misluk het,” het Semenya in sy betoogshoofde uitgebrei.Semenya het Mutanimiye se alternatiewe eis, wat handel oor die staat se voortgesette vervolging nadat geen verdere getuienis teen hom in die verhoor geopenbaar is nie, betwis. “Mutanimiye het 'n gemeenskaplike doel met die ander 125 beskuldigdes gedeel om die regering deur middel van geweld omver te werp,” het Semenya aangevoer. “Om die vervolging op 17 November 2005 of 30 Januarie 2006 stop te sit sou voortydig, riskant en nadelig vir die staat wees.” Hy het die hof versoek om die eiser se aansoek van die hand te wys met koste.Uitspraak sal op 23 Junie gelewer word.

Mutanimiye eis van staat

Kommentaar

Republikein 2026-01-07

Meld asseblief aan om kommentaar te lewer

Mutanimiye eis van staat

Kommentaar

Republikein 2026-01-07

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.