Musikante weens Covid-19 beboet

Augetto Graig – Altesame 31 mense is Saterdag omstreeks 22:30 by die Funky Lab-nagklub in Windhoek se hoofstraat Onafhanklikheidslaan weens die beweerde oortreding van Covid-19-regulasies vasgetrek.Die nagklubeienaar, mnr. Thomas Nakashole (34), bekende musikant Sunny Boy (mnr. Pendukeni Shipushu, 36) en mediapersoonlikheid Jossy Joss (Joseph Ailonga) het glo die regulasies oortree dat die bedrywighede van nagklubs nie mag voortgaan nie, asook rakende die koop en verkoop van alkohol en sosiale afstand.Al die beweerde oortreders is na die Windhoek-polisiekantoor geneem. Die Khomasstreek se polisiehoof, komm. Joseph Shikongo, het bevestig almal is aangekla, maar dié wat onmiddellik die boete van N$2 000 kon betaal, kon daarna huis toe gaan. Ailonga het Sondagaand met Republikein gepraat, nog moeg nadat hy die middag eers by die polisiestasie klaar is. Hy sê Shipushu sou gasheer speel vir 'n aanlyn konsert en Ailonga sou 'n gas wees gedurende die regstreekse uitsending. Ander gaste was onder andere die sanger Top Cheri (me. Monica Pinias), DJ Max-T (Mannetjie Tjiundje) en die radioaanbieder me. Helvi Hishekwa.“Ons was nog besig om te toets. Dit sou om agtuur begin het. Daar was tegniese uitdagings. Kykers kon reeds ons voorbereiding regstreeks sien. Die volle konsert het nooit plaasgevind nie. Die polisie het ingebars. Hulle het gereken daar is te veel mense.“Die polisie het oor die hek gespring en ingestorm. Die mense het hier en daar probeer koes. Hulle het almal laat toustaan. Ons is vreedsaam agter in die bakkies gelaai,” vertel Ailonga.Hy sê hy was onbewus van die teenwoordigheid van die meerderheid mense wat in hegtenis geneem is. “Die plek het leeg gelyk, met net verspreide groepies hier en daar.”Pinias se weergawe stem ooreen. Haar komieklike herbelewenis van die skokvoorval is wyd op sosiale media versprei: “Ja, twaalf mense binne die lokaal waar ek was ... ouens, toe daardie wiwiwiwiwiwi geluide begin, en die ooms en tantes in uniform storm Funky Lab binne, het ek meer as twintig mense van agter gesien aankom. “Hot ouens, jong meisies, groot meisies en miskien 'n oom of twee. Ek het geen idee gehad enige ander mense kuier daar nie,” skryf sy in Engels. “My broe, 'n oompie in uniform met 'n krieketkolf loop reguit na my en sê 'TopCheri, jy drink hier?' In hierdie stadium is ek nog koel, want ek het mos net kom werk voor ek sou teruggaan huis toe. Ek het die beampte reguit in die gesig gekyk en gesê: 'Nee meneer, ek drink nie alkohol nie'.“Teen dié tyd was dit buite 'n sirkus, want dis net wiwiwiwiwiwiwiwi en skrrrrrrrr en polisiekarre wat skreeu, soos in die flieks. My dierbare tante in uniform skreeu 'Arresteer hulle almal, arresteer hulle! Hulle dink hulle is spesiaal. Arresteer hulle!'”Binne 'n vangwa daar is nie eens vashouplek nie en die karakter agter die stuurwiel het hulle om elke draai bo-oor mekaar laat val, beskryf sy. “Die rêrige drama was by die polisiestasie, maar daaroor sal ek liewer eendag 'n fliek maak. Ek soek gewillige akteurs, want sjoe, ek is gereed.”Ailonga sê: “Dis belangrik om in ag te neem dit was nie vir ons 'n partytjie nie, maar 'n werksbyeenkoms vir ons kreatiewe werkers. Ons bedryf is erg getref deur die inperking. Foute is begaan en sekere prosedure is nie gevolg nie, maar van die mense wat nou N$2 000 moet betaal, sou dalk skaars N$500 uit dié werkgeleentheid verdien het,” sê hy. Pinias stem saam van die dansers daar “was jong mans uit die lokasie wat net 'n dollar probeer verdien uit die kuns waarvoor hulle lief is. Selfs vir my was die N$2 000 moeilik om te betaal,” sê sy.- augetto@republikein.com.na

Musikante weens Covid-19 beboet

Kommentaar

Republikein 2025-11-05

Meld asseblief aan om kommentaar te lewer

Musikante weens Covid-19 beboet

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.