'Musiek is my taal'

Elvira Hattingh – Ná bykans tien jaar in die musiekbedryf het Tirotsaone Moshosho, beter bekend as " Tiro" , sy langverwagte eerste Afrikaanse album vrygestel.
Die oud-Namibiër wie se sangtalent in matriek deur sy musiekonderwyser, Evada van der Merwe, in Otjiwarongo ontdek is, was verlede week in Namibië om die album plaaslik bekend te stel. Evada is steeds sy bestuurder.
“Daar is ‘n wonderlike storie agter Pak My In Jou Tas. Sakemense het my gebel nadat hulle van ‘n Angus Bachus-konferensie af teruggekom het Pretoria toe, en gesê hulle wil my met R300 000 vir ‘n CD borg,” vertel Tiro.
“My droom was nog altyd om ‘n Afrikaanse album op te neem en dit is toe dat ek die kans raaksien.
" Ek het ‘n verskriklike passie vir Afrikaans en Afrikaanse musiek. Dit het oor die jare gebeur. Ek bly in Pretoria ek het gehoor wat ander kunstenaars doen. Ek het verlief geraak op Afrikaans as taal en Afrikaans as musiek. Ek kon nie anders as om ‘n Afrikaanse album vry te stel nie en is só opgewonde!”
Tiro is die afgelope tien jaar voltyds betrokke in die vermaaklikheidsbedryf en het al sy verskyning op talle kykNET-programme gemaak, van Kwêla tot DKNT Gospel, asook ‘n hele paar SABC- en etv-programme. Hy het onlangs vir die derde keer op Noot vir Noot verskyn. Hy doen aanbiederswerk en het ook ‘n sangskool in Pretoria.
“Ek toer baie en tree oral op – vir kerke, skole, Afrikaanse feeste, korporatiewe funksies en verjaardagpartytjies,” sê hy. Tiro het al op onder meer die Suidoosterfees, Gariepfees, Aardklop, KKNK, Innibos, Brander- en Langebaanfees opgetree en ook saam met groot kunstenaars soos Nianell, Juanita du Plessis, Retief Burger en Bobby van Jaarsveld.
“Die groot ding is, ek geniet wat ek doen. Dit is in my veld, ek hou van skep, ek is ‘n kunstenaar. Dit sal nie vir my werk om in ‘n kantoor te sit nie. Musiek is my taal,” sê Tiro.
Hierdie album is sy “baba” en dit het hom baie besig gehou, antwoord hy op die vraag of hy ‘n meisie in sy lewe het. “Nie dat ek wil sê ek is te besig vir verhoudings nie, maar in die stadium van my lewe is ek gelukkig alleen. Ek geniet my jongmenslewe.”
Pak My In Jou Tas bevat ligte kontemporêre musiek en Tiro het ‘n ooreenkoms met Wow Music van Juanita du Plessis aangegaan om die album te versprei. Hy het die album op 1 Augustus in Pretoria vrygestel. Tydens die geleentheid het hy saam met Bok van Blerk voor 2 000 mense op ‘n rugbyveld gesing en baie goeie terugvoering ontvang.


‘n Boodskap van genade
Hy het met 'n rede die titel van die album gekies.
“Die idee is om vir mense te sê: Vat die album en die musiek wat daarop is, pak dit in jou tas, waarheen jy ook al gaan. Wat die album betref: Ek het ‘n getuienis wat ek met die wêreld wil deel. Agter in die album is ‘n brief hieroor en daarin bedank ek ook almal wat my gebring het tot waar ek vandag is. Dit gaan oor ‘n boodskap van genade en God se liefde. Ek is ‘n kind van die Here en die Here het my met talent geseën. Hy het vir Juffrou Evada op my pad gebring.”
Tiro sê egter, anders as sy vorige drie albums, is hierdie nie ‘n gospel-album nie. “Die liedjies is meer liefdesliedjies, of inspirerende liedjies en lekker luistermusiek.
“As gospel-albums het my vorige albums dalk nie genoeg speeltyd gekry nie – die radiostasies het hul voorkeure. Ons hoop om met hierdie nuwe album ‘n wyer mark te bereik.”
Tiro het met die album ‘n nuwe gebied in die musiekbedryf betree en sê hy gaan dit meer in die toekoms doen.
“My vyfjaarplan is om op ‘n plek te kom waar mense kantoor toe bel en sê my musiek het hulle vrede en hoop gegee. Dan is ek suksesvol.
“Ek hoop natuurlik ook dat die album geld sal genereer, maar dit is nie my hoofdoel nie. Hierdie album was vir my ‘n vorm van bediening, om die boodskap daar buite te kry van hoe ek geseën is. Ek wil teruggee en hierdie is my manier van teruggee.”
Hoekom is dit vir hom so belangrik om vir mense hoop en vrede te gee?
“Ek dink daar is baie seer in die wêreld. Daar is ook baie moedeloosheid. Ek dink daar is baie mense wat net nie meer hoop het nie – baie keer as gevolg van finansies of ander lewensomstandighede.
“Omdat ek soveel hoop het, kan ek nie anders as om ander mense te bemagtig nie. Dit is tog so mooi om te sien as jongmense opstaan, beheer van hul lewe neem en iets daarvan maak.
“Almal wat nie die lig sien nie, is in die donker. Dit is almal in die wêreld se plig as mens om ons lig te laat skyn, maak nie saak of ons Christene of Moslems of ateïste is nie. Die lewe is ‘n wonderwerk wat ons met mense moet deel.”


Begrawe my in my geboorteland
Tiro sê die lekkerste is om vir ‘n slag weer in Namibië te kan kuier.
“Behalwe vir my familie, mis ek die liefdevolle warmte van Namibiese mense die meeste.”
Watter skatte het Namibië hom gegee wat hom vandag help om sy lig te laat skyn?
“Menslikheid. Dit is eienskap van Namibiërs wat ek aangeneem het en nooit, nooit gaan verloor nie. Dit is die rede hoekom ek elke keer terugkom. Dit is my geboorteland en dis waar my kern lê.
“Ook omdat ons so ‘n Christelike land is. Dit is vir my inspirerend. Ons is baie uiteenlopend en Namibië is vir my ‘n wonderlike uitvoerproduk – ons kan oorsee gaan en vir mense sê ons is ‘n mooi land.
“In Suid-Afrika kom ongelooflik baie mense na my toe en sê hulle wil teruggaan Namibië toe. Hulle wil ‘n besigheid begin of net terugkom of selfs net kom toer. Ek dink dit is omdat ons so ‘n mooi land is.
“Namibië het my geleer om die mooi in alles raak te sien.”
Tiro sê al vereis sy loopbaan van hom om vir eers in Suid-Afrika te moet bly, sal hy eendag terugkom Namibië toe.
“Dit is ononderhandelbaar. Hierdie is my aftreeland. Ek gaan hier begrawe word, die grond waarin ek begrawe gaan word, lê iewers in Gobabis en wag vir my. Daar is geen manier hoe ek oorsee of in ‘n ander land begrawe word nie. As ek daar doodgaan, moet hulle my terugstuur, anders spook ek by hulle. Hulle móét my terugbring. Hierdie land steel jou hart.
“Ek sê nie Pretoria of Suid-Afrika sleg nie, ek het dit ook as my land aangeneem, maar hierdie is my geboorteland,” sê Tiro.


Dankie, Namibië
Destyds, net nadat Evada Tiro se talent ontdek het, is hy en vier ander sangers Swede toe genooi om daar te gaan sing.
Hy het N$25 000 daarvoor nodig gehad en Namibiërs het hul harte oopgemaak. Altesaam N$45 000 is vir Tiro ingesamel.
Dit is by hierdie geleentheid waar Tiro die Michelle McLean Award of Excellence ontvang het – ‘n borg om sy sangloopbaan vir ‘n jaar in Suid-Afrika na te jaag. Hy het in 2006 aan die eerste Afrikaanse Idols deelgeneem waar hy die top 16 gehaal het.
Kort daarna het Evada haar werk in Namibië bedank, al haar spaargeld gebruik vir die opneem van Tiro se eerste CD en sy voltydse bestuurder in Suid-Afrika geword. ‘n Jaar nadat hy Suid-Afrikaanse burgerskap bekom het, wen sy debuutalbum, Speak To Me, in 2009 die SAMA vir beste Pop/Rock Gospel-album . Min kunstenaars kan met ‘n SAMA vir hul eerste album spog.
Tiro is steeds innig dankbaar vir sy landgenote wat hom aanvanklik gehelp het om 'n begin te maak.
“Ek wil vir Namibiërs persoonlik dankie sê dat hulle in my geglo het. Toe ek aanvanklik met my loopbaan begin het, was daar mense wat N$1 gegee het en daar was diegene wat vir my N$10 000 gegee het.
“Almal is vir my ewe belangrik, want hulle het my gemaak wie ek vandag is - hulle het in my talent geglo, my bemoedig en net die goeie in my raakgesien. Ek sê dankie vir elke Namibiër wat my ondersteun het – individu’s en instansies.”
Belangstellendes wat Tiro vir ‘n optrede wil bespreek, kan 0027 73 251 7143 skakel of ‘n e-pos na [email protected] stuur.