MTC sê jammer met data
Terugbetalings is gedoen en van vandag af kry alle kliënte 300 MB se data om verskoning te vra vir verlore data.
Augetto Graig
MTC, die grootste verskaffer van mobiele telekommunikasiedienste in die land, het gister om verskoning gevra vir die ongerief wat veroorsaak is gedurende sy onlangse stelselopgradering en het gratis data in die jammerpakkie gegooi.
Die maatskappy het eergister die laaste van die 335 000 kliënte wat krediet en data weens die opgradering verloor het, vergoed, sê die hoof van menslike hulpbronne en korporatiewe kommunikasie, mnr. Tim Ekandjo.
Volgens Ekandjo kan al 2,47 miljoen kliënte van MTC ook vandag om 08:00 uur 300 MB data as troosgeskenk verwag.
Die data is vir 48 uur geldig.
Dié geskenk is vir MTC se vooruitbetaalde kliënte, kontrakkliënte en Turbo Boost-kliënte.
Turbo Boost-kliënte kry 'n ekstra pakket, soortgelyk aan hul huidige pakket, en dit is geldig tot hul volgende betaaldatum, sê hy.
Hy sê ná talle klagtes ontvang is van data wat “verdwyn” en gekoopte krediet wat nie laai nie, het die maatskappy 'n deeglike interne ondersoek ingestel.
Die geraakte kliënte wat geïdentifiseer is, het SMS-boodskappe ontvang oor die terugbetaling van die bedrag, sê hy.
“Daar behoort geen meer kwessies te wees met kliënte wat nie hul terugbetalings ontvang het nie,” sê Ekandjo.
“Ons is nie 'n perfekte maatskappy nie,” sê hy. “Soms maak ons foute.”
Reputasie geknou
Volgens hom sal die maatskappy ook nooit te groot wees om te sê hy is jammer nie. “Ons is werklik jammer,” sê hy.
Volgens hom was die opgradering van die stelsel nodig om nuwe funksies op te stel waarop MTC binnekort verder sal uitbrei. Geen soortgelyke opgradering word vir die afsienbare toekoms beplan nie.
Ekandjo erken MTC se reputasie het weens die probleme met die opgradering skade gely, maar ontken dat baie kliënte om hierdie rede na ander diensverskaffers geskuif het.
“Ons het baie lojale kliënte omdat ons langtermynverhoudings kweek,” sê hy.
Ekandjo kon nie die koste van die terugbetalings bevestig nie, en wou ook nie uitbrei oor hoeveel die 300 MB data-geskenk die maatskappy sal kos nie.
“Ek het dit doelbewus nie uitgewerk nie. Dit is nie in ons karakter om te spog met die koste van 'n troosgeskenk nie,” sê hy.
Ekandjo sê MTC se netwerk sal die verkeer gedurende die gebruik van die paselladata wel kan hanteer.
“As almal gelyk op die stelsel gaan, sal daar 'n opeenhoping wees, maar ons het dit vir 48 uur geldig gemaak om mense tyd te gee om die data te gebruik,” sê hy.
'Melk verval ook'
Ekandjo het ook gesê die tydsbeperking op die geldigheid van data is internasionale standaardpraktyk.
“Melk verval ook,” sê hy.
Volgens hom geniet Namibiërs boonop toegang tot die tweede goedkoopste data in Afrika, en die goedkoopste suid van die Sahara.
Ekandjo sê daar bestaan nie so iets soos data wat “verdwyn” nie.
“Data kan nooit verdwyn nie,” sê hy en voeg by die Nasionale Reguleerder vir die Kommunikasiebedryf (Cran) het in 2016 MTC se faktuurstelsel getoets en kon nie daarmee fout vind nie.
“Al wat ons stelsel doen, is om vir jou 'n rekening te stuur vir die data wat jy gebruik,” sê hy.
Kliënte moet in ag neem mense gebruik deesdae baie meer sosiale media as voorheen en dus word data vinniger opgebruik.
Sy raad is om die datagebruik van slimfone te monitor, toeps af te sit wanneer dit nie gebruik word nie
en om versigtig te wees met opdatering van toeps omdat dit baie data gebruik.
Die maatskappy is van plan om meer te doen om kliënte hieroor op te voed, sê hy.
MTC, die grootste verskaffer van mobiele telekommunikasiedienste in die land, het gister om verskoning gevra vir die ongerief wat veroorsaak is gedurende sy onlangse stelselopgradering en het gratis data in die jammerpakkie gegooi.
Die maatskappy het eergister die laaste van die 335 000 kliënte wat krediet en data weens die opgradering verloor het, vergoed, sê die hoof van menslike hulpbronne en korporatiewe kommunikasie, mnr. Tim Ekandjo.
Volgens Ekandjo kan al 2,47 miljoen kliënte van MTC ook vandag om 08:00 uur 300 MB data as troosgeskenk verwag.
Die data is vir 48 uur geldig.
Dié geskenk is vir MTC se vooruitbetaalde kliënte, kontrakkliënte en Turbo Boost-kliënte.
Turbo Boost-kliënte kry 'n ekstra pakket, soortgelyk aan hul huidige pakket, en dit is geldig tot hul volgende betaaldatum, sê hy.
Hy sê ná talle klagtes ontvang is van data wat “verdwyn” en gekoopte krediet wat nie laai nie, het die maatskappy 'n deeglike interne ondersoek ingestel.
Die geraakte kliënte wat geïdentifiseer is, het SMS-boodskappe ontvang oor die terugbetaling van die bedrag, sê hy.
“Daar behoort geen meer kwessies te wees met kliënte wat nie hul terugbetalings ontvang het nie,” sê Ekandjo.
“Ons is nie 'n perfekte maatskappy nie,” sê hy. “Soms maak ons foute.”
Reputasie geknou
Volgens hom sal die maatskappy ook nooit te groot wees om te sê hy is jammer nie. “Ons is werklik jammer,” sê hy.
Volgens hom was die opgradering van die stelsel nodig om nuwe funksies op te stel waarop MTC binnekort verder sal uitbrei. Geen soortgelyke opgradering word vir die afsienbare toekoms beplan nie.
Ekandjo erken MTC se reputasie het weens die probleme met die opgradering skade gely, maar ontken dat baie kliënte om hierdie rede na ander diensverskaffers geskuif het.
“Ons het baie lojale kliënte omdat ons langtermynverhoudings kweek,” sê hy.
Ekandjo kon nie die koste van die terugbetalings bevestig nie, en wou ook nie uitbrei oor hoeveel die 300 MB data-geskenk die maatskappy sal kos nie.
“Ek het dit doelbewus nie uitgewerk nie. Dit is nie in ons karakter om te spog met die koste van 'n troosgeskenk nie,” sê hy.
Ekandjo sê MTC se netwerk sal die verkeer gedurende die gebruik van die paselladata wel kan hanteer.
“As almal gelyk op die stelsel gaan, sal daar 'n opeenhoping wees, maar ons het dit vir 48 uur geldig gemaak om mense tyd te gee om die data te gebruik,” sê hy.
'Melk verval ook'
Ekandjo het ook gesê die tydsbeperking op die geldigheid van data is internasionale standaardpraktyk.
“Melk verval ook,” sê hy.
Volgens hom geniet Namibiërs boonop toegang tot die tweede goedkoopste data in Afrika, en die goedkoopste suid van die Sahara.
Ekandjo sê daar bestaan nie so iets soos data wat “verdwyn” nie.
“Data kan nooit verdwyn nie,” sê hy en voeg by die Nasionale Reguleerder vir die Kommunikasiebedryf (Cran) het in 2016 MTC se faktuurstelsel getoets en kon nie daarmee fout vind nie.
“Al wat ons stelsel doen, is om vir jou 'n rekening te stuur vir die data wat jy gebruik,” sê hy.
Kliënte moet in ag neem mense gebruik deesdae baie meer sosiale media as voorheen en dus word data vinniger opgebruik.
Sy raad is om die datagebruik van slimfone te monitor, toeps af te sit wanneer dit nie gebruik word nie
en om versigtig te wees met opdatering van toeps omdat dit baie data gebruik.
Die maatskappy is van plan om meer te doen om kliënte hieroor op te voed, sê hy.
Kommentaar
Republikein
Geen kommentaar is op hierdie artikel gelaat nie