MTBR ‘los landbou hoog en droog’ – Agri SA

William Horne – Agri SA is “diep teleurgesteld” dat Tito Mboweni, minister van finansies, geen erkenning gegee het vir die moeilike struikelblokke wat die landbousektor in die gesig staar nie.Die landbou-organisasie het Woensdag in ’n verklaring gesê die sleutelrol wat landbou in die land se ekonomie speel, is bloot geïgnoreer in die mediumtermynbegrotingsraamwerk (MTBR) wat Mboweni in die parlement ter tafel gelê het.“Al is dit so dat die MTBR nie gedetailleerde bestedingsplanne of belastingvoorstelle bevat nie, kon die minister werklik meer erkenning gegee het vir die rol wat landbou speel en sy veerkragtigheid midde-in verskeie struikelblokke, soos die impak van langtermyndroogtes,” sê dr. Requier Wait, hoof van Agri SA se Ekonomie- en Handelsentrum vir Uitnemendheid.Droogtes wat nou al verskeie jare lank Suid-Afrika se damvlakke laat agteruit boer het, het veral landbouproduksie gekniehalter.Sakevertroue in die landbou het in die derde kwartaal steeds onder die neutrale vlak van 50 punte op 46 te staan gekom.Dit beteken dat landbou-ondernemings negatief bly oor heersende saketoestande.Agbiz en die Nywerheidsontwikkelingskorporasie (IDC) se indeks het teenoor die tweede kwartaal se punt van 44 ietwat verbeter, maar bly baie naby aan einde 2018 se 42 – die laagste punt wat die indeks in 10 jaar behaal het.Faktore wat tot die agteruitgang van sakevertroue in die landbousektor bydra, volgens Agbiz, sluit in omset, inkomste, kapitaalinvestering, ekonomiese groei en die koste van finansiering vir landbou-ondernemings.Agri SA sê hy sal as kampvegter sy werk voortsit om die regering te kry om die landbou behoorlik te ondersteun, veral in die streke wat die swaarste deur droogte getref word.Volgens die landbou-organisasie is dit nie net belangrik om indiensneming te bevorder en armoede te bestry nie, maar ook om voedselsekerheid te verseker.Agri SA het reeds gewaarsku dat die herinstelling van beurtkrag verdere druk op voedselsekerheid plaas.Meer as 25% van alle kos wat in die land verbou word, kom van bedrywe wat energie-intensief is of op ’n ander manier kwesbaar is vir kragonderbrekings.Verdere risiko’s vir voedselsekerheid maak die organisasie dus “baie bekommerd”. – Netwerk24

MTBR ‘los landbou hoog en droog’ – Agri SA

Kommentaar

Republikein 2025-06-19

Meld asseblief aan om kommentaar te lewer

MTBR ‘los landbou hoog en droog’ – Agri SA

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie